Read Bawm Chin EZEKIEL 21 Bible Online

EZEKIEL 21 - Bawm Chin bible

EZEKIEL 21

¹LALPA nih ka sinah thu a sim.

²“Thikho mi minung, Jerusalem chu sâwi rawh. Mi zapi tla nih an sawnhnâk mun tla sâwi rawh.

³Israel ram chu kei LALPA nih thu ka sim mi simhkan na: Kei hi nan mêlma ka si, ka nâmsâu ka phâwi lai le, mi ṭha leh misual bang cho hen ka nan thah hep na awt.

⁴Ka nâmsâu chu simlei thawk hen marlei tiang mikip thahnâk ah ka mang awt.

⁵Mikip nih kei LALPA nih ka nâmsâu ka phâwi mi leh ka lêt awt lo mi an theih lai.

⁶“Thikho mi minung, na lung a dawng mi hâwitê hen rûm. Mikip nih a nan theihnâk mun ah ngaihsia tak hen rûm rawh.

⁷Zeirangah ti ti na rûm ti hen an deih chun, thâwngthâng a hawng tlung mi ruangah ti hen simh na. A hawng tlung tikah chun, an thinlung chu lâunâk hen a khat lai le, an kut tla khêng hen an thlâi lai le, an râlṭhatnâk khawm a vei lai le, an khûp khawm a thir lai. A hun a tlung taktê rawh; hi hi asi rawh,” a ti. LALPA Zahkâi nih a sim asi.

⁸LALPA nih ka sinah,

⁹“Thikho mi minung, thu simkan rawh. Kei LALPA nih thu ka sim mi hi, mi tla simh na: Nâmsâu, nâmsâu chu tât hen tlêu vak hen nâwt asi rawh.

¹⁰Thahnâk ah tât siar hen a um le, a tlêu mi chu mîmthlalek hâwi hen a lek. Ka mi tla nih rêpnâk leh simhkannâk an siarlo ruangah lâwmnâk ding a um kho lo rawh.

¹¹Nâmsâu chu tlêu kil hen mang sek ding hen timhtuah ding asi. Thahtu kut ah tât siar leh tlêu vak hen pêk ding asi.

¹²Thikho mi minung, lawksawng hen âu; hi nâmsâu hi ka mi tla leh Israel ruitu zawzawng thahnâk ding asi. Ka mi tla zawzawng hen thah hep an si lai. Thinlung dawng tak hen na thinmakâ chumh.

¹³Ka mi tla chu ka nik na le, an rim duh lo mi asi chun, hi bang thil zawzawng tla hi an lakah a tlung lai.

¹⁴“Thikho mi minung, tuah thu simkan rawh. Na zâ bengh le, nâmsâu nih a do vima lai. Thahtu nâmsâu, nâmsâu ṭihnungkâi leh thahtu asi.

¹⁵Ka mi tla a lâutir na le, a tlûktir na. An khuapi tla chu ka nâmsâu hen ka thah na le, mîmthlalek hâwi hen thah ding sek hen a râlring.

¹⁶Nang, nâmsâu hâr, keh leh vawrh hen tuk! Na hernâk lei zawng tuk.

¹⁷Kei khawm nih ka zâ ka bengh lai le, ka thinthawknâk chu â lîm lai rawh. Kei, LALPA nih ka sim asi,” a ti.

¹⁸LALPA nih ka sinah thu a sim.

¹⁹“Thikho mi minung, Babulon lalchem a nâmsâu put hen a hawng nâk ding lampi panih singsiah. Ram pakhat thawk hen an hawng suak vevê. Lamṭhuam ah singsiahnâk tung phun rawh.

²⁰Pakhat nih chun lalchem chu Amon khuapi Raba leikâng lampi a zauhtir lai le, a dang nih kulhnei khuapi Jerusalem Juda ram leikâng lampi a zauhtir lai.

²¹Babulon lalchem chu lamṭhuam ah mi singsiahnâk tung phunnâk ah a dîr. Zei lei lampi ah kal ding asi lai aw ti hen a chanhtiang thalzum a lek le; a milem sinah thu a deih le; bâwlnâk ran thin a zauhdik.

²²Tuah a kut vawrhlei hen a put mi chanhtiang thalzum nih Jerusalem lei a khît. Chu nih chun kal hen kulh râwknâk siam hen, râltuknâk phuang hen kulh kawtkâ râwknâk siah hen tual pawng tla siam ding leh khur chawh ding hen a simh.

²³Amah hen remnâk an siam ruangah Jerusalem mi nih chubang hâwi hawng um ding an ruat lo thlo. Sikhawmsele an sual ruangah tleih hen an um ding mi thu simkannâk leh an sual theihtirnâk asi.

²⁴Hi hi asi, kei, LALPA Zahkâi nih ka sim mi chu. Nan sual tla chu a lang rawh. Mikip nih nan sual zia nan theih rawh. Nan thilti kipah nan sualnâk a lang. Mawh hen nan um rawh, nan mêlma sinah ka nan pêk na awt rawh.

²⁵“Nannih misual, Israel lâirêltu thenhlimh lo tla, nan ni, nan rangah rêpnâk madungchem ni chu a hawng tlung rawh.

²⁶Kei, LALPA Zahkâi nih ka sim asi. Nan lukhuh leh upâwng lît u. Hi hâwi hi zeikhawm a um nawlh lai lo rawh. Mipâm tla chu thiltikho si ding hen sangh u. Lâirêltu tla chu niamh na u!

²⁷A râwk rawh, a râwk rawh! Asi khuapi chu ka râwk rawh. Sikhawmsele khuapi rêptu dingah ka ruat mi minung a hawng kal lân lo chu hi hâwi hi a um lai lo rawh. Chu tik lam chun amah ka pêk lai.

²⁸“Thikho mi minung, thu simkan rawh. Kei, LALPA Zahkâi nih ka sim mi hi Amon mi tla Israel zauhnawmhtu tla sinah sim. Hi hâwi hen simh na: ‘Nâmsâu chu veih ding hen tîm chia asi le; Mîmthlalek hâwi a tlêu hen thah ding hen tât asi rawh.

²⁹Muhnâk na muh mi khawm a dik lo, na simkannâk thu khawm âwkrâwl asi. Na sual hen na ṭha lo le, na rangah rêpnâk ni, ni dawnghnâk chu a tlung rawh. Nâmsâu chu na ngâwng ah a tlâ awt rawh.

³⁰“Na nâmsâu siah! Na suaknâk ram, siam hen na umnâk mun ah na lâi ka rêl awt.

³¹Meialh hâwi hen na lakah ka hawng thlah tikah ka thinthawknâk chu na theih lai. Mi rualo, râwk thiam mi kutah ka nan pêk lai.

³²Mei nih a nan veih lai. Na thisen chu na umnâk ram ah a luang lai le, âukhawm nih an theih lai lo rawh,’” a ti., LALPA nih a sim asi.