Read Bawm Chin EZEKIEL 22 Bible Online

EZEKIEL 22 - Bawm Chin bible

EZEKIEL 22

¹LALPA nih ka sinah thu a sim.

²“Thikho mi minung, mi thahtu hen a khat mi khuapi lâirêl ding hen na râlring ma? Thil fihnungkâi a ti mi zawzawng thianh ver.

³Kei, LALPA Zahkâi nih ka sim mi chu khuapi rangah simh: Na mi tla tamtak na thah na hen milem tla sawnh hen na nâwmtir ruangah na tik a tlung rawh.

⁴Mi na thah na mi leh milem na siam mi hen na nâwmtir le, na ni a tlung rawh, na tik a tlung rawh! Churuangah asi phun tla ka nan zauhnawmhtir le, ram zawzawng ka nan nihsanhtir mi chu.

⁵Dân lo hâwi hen na um ruangah na kiangkam ah mi ram leh a lâtnâk ah mi ram nih an nihsanh.

⁶Israel ruitu tla zawzawng chu anmah chaknâk an rinhsanh le mi an thah.

⁷Khuapi lakah âukhawm nu leh pa zahtu an um lo. Ramdang minung chu na perpet le, numei leh mi ngâkṭah tla chu dingchangnâk ah na mang na.

⁸Mun thenhlimh khawm zahnâk na nei lo le, Dinhni khawm na ulh lo.

⁹Na mi tla zeimaw mi nih mi dang thu ah thah na ding hen âwkrâwl thu an sim. A zeimaw mi nih milem sinah ap mi bâwlnâk an ei. A zeimaw mi an thilduh lakah an lungâwi kumza.

¹⁰A zeimaw mi nih an pa nupi an ihpi. A zeimaw mi nih thi an nei liauah tleihrêm hen an ihpi na.

¹¹A zeimaw mi nih ṭângdang an pawm le, midang nih an monu mawh an nu ei fanu mawh an lêm.

¹²Na mi lakah a zeimaw mi nih a man lâk hen mi an thah. A zeimaw mi nih mah hâwi Israel mi lakah pûk an pêk mi lakah a pung an lâk, anmah lakah dingchangnâk lâk hen neihnâk an tawng. An hawng ka philh rawh,” a ti. LALPA Zahkâi nih a sim.

¹³“Na mi rawkmang leh thahtu tla tlûnah ka kuttum ka thlâk awt.

¹⁴Na lakah thilti ka lîm tikah na kut lek ding hen chaknâk leh râlṭhatnâk nei ding hen ma na ruat? Kei LALPA nih thu ka sim le, ka thu chu ka zulh.

¹⁵Na mi tla chu ram kipah leh phun lakah ka rekrâwitir na lai le, nan thilsual ti ka dawngtir lai rawh.

¹⁶Churawhchun phundang tla nih an zah na lai lo rawh le, sikhawmsele LALPA ka si ti nan theih lai,” a ti.

¹⁷LALPA nih ka sinah,

¹⁸“Thikho mi minung, Israel tla chu kei rangah mang ding mi an si lo. Thîr, dâr, tâmâ leh suan tangka mei lakah êr nûnah a êk lawnh mi mangtlâk lo hâwi an si.

¹⁹Churuangah tuah kei LALPA Zahkâi nih chu hâwi hen mangtlâk lo an si ti ka simh na. Jerusalem ah ka pumh hep na lai le,

²⁰tangkasa, dâr, thîr leh suan êr ding mi êrnâk mei ah siah mi hâwi hen. Ka thinthawknâk leh ka thinrunnâk nih mei nih êr ding mi a zawrtir hâwi hen a zawrtir na lai.

²¹Asi, Jerusalem ah ka pumh na lai le, an tanglei ah mei ka tih lai le, ka thinthawknâk hen ka zawrtir na lai.

²²Tangkasa â êrnâk mei nih a zawrtir mi hâwi hen Jerusalem ah an zawr lai le, chu tikah LALPA thinthawknâk an tuar mi an theih lai rawh,” a ti.

²³LALPA nih ka sinah thu a sim nawlh.

²⁴“Thikho mi minung, Israel mi tla rangah, an ram a nâwm ruangah ka thinthawknâk hen ka rêp mi asi ti simh na.

²⁵Ruitu tla chu chakeibaknei nih ramsa an seh le, an rûm mi hâwi an si. Mi tla an thah na le, an tangka leh an thil-le-rî an tawng mi tla chu an lâk piak hep na le, an mi thah ruangah numei tamtak an um.

²⁶Bâwlpu tla khawm nih ka dân an buar le, thil thenhlimh tla zahnâk an nei lo. A thenhlimh mi leh a thenhlimhlo mi thliarnâk zeikhawm an nei lo. Thil thenhlimh leh a thenhlimh lo mi thu ah an sîntir lo, Dinhni khawm an sunhsak lo. Churuangah Israel mi tla nih an hawng ka zah lo.

²⁷Sawrkar rianṭuantu tla chu, chingngia nih ramsa an thah mi sâm diptu hâwi an si. Nei ding duh hen mi an thah na.

²⁸Khuavâng tla khawm nih, mi nih hawl hen kulh an nalh mi hâwi hen chubang sualnâk chu lang lo ding hen an pheh. Muhnâk diklo tla an muh le, simkannâk diklo tla an sim. LALPA Zahkâi thu simtu ah anna ruat le, sikhawmsele kei LALPA nih annih tla chu ka sawnh na lo.

²⁹Neihnâk nih a perpet na le, a râwk na. Mipâm tla an nehsawh na le, ramdang mi tla chu dingchang phahnâk ah an mang.

³⁰Mi âumawh kulh siam khotu ding, kulh râwknâk mun ah dîr khotu leh ka thinthawknâk nih a râwk awt liauah vêngtu ding ka hâwl le, sikhawmsele pakhat khawm ka tawng na lo.

³¹Churuangah an tlûnah ka thinthawknâk ka thlah thlap lai le, an thilti ruangah mei hâwi hen ka veih na awt,” a ti. LALPA Zahkâi nih a sim.