Read Bawm Chin EZEKIEL 23 Bible Online

EZEKIEL 23 - Bawm Chin bible

EZEKIEL 23

²“Thikho mi minung, veikhat chu far panih an um.

³An nungâk liauah Aigupta ah an um le, an nungâk thenhlimh sinâk an thlâu le, â zuar mi nunau ah anna chang.

⁴A upa dauh mi min chu Oholah (chu chu Samari zauhtirnâk asi le), a ngâksia dauh mi min chu Oholibah asi, (chu nih chun Jerusalem a zauhtir.) An panih hen ka umpi na le, fa tla an ka ring piak.

⁵Keimah nupi asi khawmah Oholah chu â zuar nget rih, Asiria ram a mi amah mêldîtu tla duhnâk hen a khat.

⁶Kawrsen hâwi hen dumpâwl hen anna thuam le, milian leh hotu lian hâwi hen; anmah chu rang tlûnah chuan mi tlangvâl mêlṭha tak hep an si.

⁷Chu nunau chu Asiria hotu zawzawng lakah a hur le, Asiria milem tla sawnh hen a duhnâk nih amah a nawmhtir.

⁸Aigupta ah a nungâk thenhlimh sinâk thlâu hen nunau â zuar mi asi vima. Seinotê asi liauah mipa nih an ihpi le, nunau â zuar mi hâwi hen an ti kumza.

⁹Churawhchun amah mêldîtu tla Asiria tla a duh tak mi sinah ka pêk ving.

¹⁰A nipuan an lît piak le, takkaro hen an siah le, a fapa leh a fanu tla an tleih le, amah chu nâmsâu hen an thah. A thihnâk chu munkip ah mi nunau nih thuruatnâk ah an mang.

¹¹“Chu chu a unaunu Oholibah nih a muh khawmah Oholah umdân ngâk hen â zuar zia a zual dauh.

¹²Anih khawm Asiria milian tla leh hotu tla, thuam dawh tak thuam mi kawrsen rang tlûnah chuan mi tla tlangvâl mêlṭha zawzawng duhnâk hen a khat.

¹³A hur tatak zia leh a masa dauh mi a unu hâwitê a hur bâk ti ka muh.

¹⁴“A hurnâk lakah a pil dadauh. Babulon milian tla lem vâm lakah an siam mi rawng sen hen an buaih le, an tâi ah sâwm mi leh an lû ah thuamh mi upâwng pawnh mi nih a thinlung a lâk ving.

¹⁵

¹⁶A muh na kâ hen, duhnâk hen a khat le, Babulon leiah mi a fial na.

¹⁷Babulon mi tla chu amah ihpi ding hen an hawng. An ihpi hen thungâi an nâwmtir le, a dawnghnâk ah chun anmah lakah fihnungkâi hen a hawng um rawh.

¹⁸Zatlâng theih hen a um le, mikip nih mi hur asi mi an theih rawh. A unaunu ka fih mi hâwitê hen amah khawm ka fih.

¹⁹A lân ngâk hen â zuar dân a fâk dadauh le, Aigupta ram ah a nungâk liauah â zuar mi nunau asi liau hâwitê hen thil a ti.

²⁰Mipa duhnâk leiluat hen a khat le, rang tilkhei lo hurnâk a put,” a ti.

²¹(Obolibah, Aigupta ram ah na nungâk liauah hur hen na sual le, chunah mipa tla nih na nûk an pangpi le, na nungâk thenhlimh sinâk na veih mi kha ti nawlh ding na duh asi.)

²²“Asi chun tuah Oholibah, hi hi kei LALPA Zahkâi nih na sinah thu ka sim mi chu asi. Nangmah an mêldîtu tla chu na neng na rawh le, sikhawmsele na lakah an thin ka thawktir na lai le, nangmah hual ding hen ka hawngpi na awt.

²³Babulon mi tla leh Kaldai mi tla, Pekod, Soa leh Koa leh Asiria ram zawzawng thawk hen ka hawng tir na lai. Milian mêlṭha tak tla, leh hotu tla, rianṭuantu mi pawiherh, rang tlûn totu milian tla ka pumh na lai.

²⁴Marlei thawk hen kawrsen tamtak leh kari tla hen, eibâr phurhtu kari tla put hen a nan do lai. Phaw leh dâr lukhuh vêngnâk ah mang hen a nan hual lai. Anmah kut ah ka nan pêk lai le, anmah dân hâwi vima hen na tlûnah lâi an rêl lai.

²⁵Na lakah ka thinrun ruangah an thinthawknâk hen na tlûnah thil ka titir na awt. Na nâr leh na nakhaw tla an lep phak lai le, na fa tla an thah lai. Asi, na sinah mi na fapa leh na fanu tla an tleih lai le, a nung hen mei ah an paih lai.

²⁶Na nipuan an thlêk dip lai le, na lungmantam tla an lâk lai.

²⁷Aigupta ram ah na umnâk ah thil nâwmtâm na ti mi leh na hurnâk tla ka bângtir lai rawh. Milem tla khawm na zauh lai lo rawh le, Aigupta lei khawm na dawn lai lo rawh,” a ti.

²⁸Hi hi LALPA Zahkâi nih a sim asi! “Na hua hen na fih na mi minung sinah ka nan pêk awt.

²⁹An hua ruangah na rianṭuan tha ni lawh zawzawng an lâk ver lai le, nunau â zuar mi hâwi hen ni le puan lît hen takkaro hen an siah lai.

³⁰Na zuarnâk leh na hurnâk nih hi hi na lakah a hawng tlungtir mi asi. Phun tla lakah na zuar le, an milem lakah na nawmh.

³¹Na unaunu zia na châwng ruangah amah din mi rêpnâk hâi nget din ding hen ka nan pêk awt,” a ti.

³²LALPA Zahkâi nih, “Na unaunu hâi lian tak leh thûk tak lakah mi na din lai. Mikip nih hâi a khat rawh ti hen a nan zauhnawmh hen a nan nihsanh lai.

³³Na unaunu Samari hâi, ṭihnâk leh râwknâk hâi nih, a nan hamhtir hen a nan rîttir lai.

³⁴Na din lai le, a kang hep lai. A kek mi neknâwi nih na nûk a rawi ver lai. Kei, LALPA Zahkâi nih ka sim asi,” a ti.

³⁵Tuah hi hi LALPA Zahkâi nih thu a sim mi chu asi: “Na ka philh hen dunglei na hawng ka sît ruangah na hur mi leh na zuar mi ruangah na tuar lai,” a ti.

³⁶LALPA nih ka sinah, “Thikho mi minung, Oholah leh Oholibah lâirêl piak ding hen na râlring rawh ma? Thil fihnungkâi an ti ruangah phiar na.

³⁷Ṭângdang an pawm le mi an thah, milem tla lakah ṭângdang an pawm le, fapa an ka ring piak mi tla an thah na. Ka fapa tla chu an milem lakah bâwlnâk ah an mang.

³⁸An thilti chu, chu lâwng khawm asi lo. Ka Biakin tla an nawmh le, ka birhtir rawh mi Dinhni an buar.

³⁹Milem lakah anna bâwl ni takah ka fa tla chu an thah na le, ka Biakin ah an hawng le, an nawmh!

⁴⁰“Mun lât takah um mi tla sâwm na ding hen mi an fial nûnah an fial nawlh na le, mi tla an hawng. Chu unau panih tla chu tak anna khawlh le, an mit rawng an buaih le, lungmantam hen anna thuam.

⁴¹Itnâk dawnh dawh tak tlûnah an to le, an mâika ah thil ṭha hen khat mi dawhkân anna hunh le, ka pêk na mi rimthâw leh oliv sariak hen.

⁴²Zapi minung nuamsabut chenhtu tla, ramkaro thawk hen an hawngpi na mi hâu chu theih kho asi. Nunau tla chu an bân ah zaksiar an bunh na le, an lû ah lallukhuh dawh tak an khuh na.

⁴³Kei nih chun ka thinlung hen ṭângdang pawm hen a dî nek mi nunau chu â zuar mi ah an mang ka ti.

⁴⁴Hi â zuar mi nunau tla sinah hin an va kal nawlh lemang. Oholah leh Oholibah mi hur nunau tla sinah an va kîr nawlh.

⁴⁵Ṭângdang pawmtâk an mang ruangah leh an kut ah thisen â buaih ruangah, mi rep tla nih ṭângdang an pawm mi leh mi an thah mi lakah mawh hen an ruat na lai,” a ti.

⁴⁶Hi hi LALPA Zahkâi nih a sim mi chu asi: “Anmah tla ṭhih ding hen zapi minung hawng put na le râwk na.

⁴⁷Chu zapi minung tla nih lung hen seh na sele nâmsâu hen do na seh, an fa tla thah piak na hen an in tla duah piak na seh.

⁴⁸Ram pumpi lakah hurnâk chu ka bângtir lai le, nunau kip nih an ti mi hâwi tilo rawh ding hen theihtirnâk asi lai.

⁴⁹Nannih unau panih hi nan hurnâk ruangah leh milem nan sawnh mi lakah nan sual ruangah kan rêp na awt. Chu tikah kei, LALPA Zahkâi ka si ti nan theih lai rawh,” a ti.