Read Bawm Chin EZEKIEL 24 Bible Online

EZEKIEL 24 - Bawm Chin bible

EZEKIEL 24

¹Sal ah kan tâng mi a kum kuanâk thla rânâk a ni râ ni ah LALPA nih ka sinah thu a sim.

²“Thikho mi minung, Babulon lalchem nih Jerusalem a hual mi ni asi ruangah tusûn ni zat rîn.

³Kei, LALPA Zahkâi nih tahṭhimh thu ka sim mi hi ka mi hel mang tla simh na: Bêl chu mei lakah khîng le, tî khat phak hen tleng.

⁴A sungah meh a kê leh a dâr sa thlah le, a ruh neknâwi tla khawm thlah.

⁵Dawrâ a ṭha chem mi sa mang le; bêl tangah thing sawh zat. Tî tlawktir le; a ruh leh a meh suang,” a ti.

⁶Hi hi LALPA Zahkâi nih a sim mi chu asi: “Mi thahtu khuapi chu a vânduai rawh! Bêl a rêt kâi mi a thiang kholo mi hâwi asi. Tâwm tâwm hen a meh chu thur hen a um le, semh khat khawm a um lo rawh.

⁷Khuapi sungah mi thahnâk a um le, sikhawmsele thî chu valeidip nih khuh khonâk ah tual ah thlêt lo hen lungpi tlûn salam ah thlêt hen a um.

⁸Lehrûl samtu ding thinthawk ding hen a langhnâk ah thî chu ka siah,” a ti.

⁹Hi hi LALPA Zahkâi nih a sim mi asi: “Mi thahnâk khuapi chu a vânduai rawh! Keimah ngelchel nih tih ding mi thing ka pawng awt.

¹⁰Thing tampi hawng put u! Meialh zâp u! Sa suang u! An nah leh a thlah ral dep hen suang u! A ruh tla rawh hep u!

¹¹Tuah meiṭil lakah dârbêl karo toh ule, sen rê hen linh u. Churawhchun bêl chu a dân hâwitê hen a rêt a kâng phin rawh chun a tliang lai le,

¹²sikhawmsele a rêt chu meialh lakah lang lo hen a um lai lo.

¹³Jerusalem, na hurnâk thilti nih a nan nawmh. Thiangtir ding ka nan tum khawmah na nâwm nget rih. Ka thinthawknâk zawzawng na theih lân lo chu na thiang ding asi lo rawh.

¹⁴Kei, LALPA Zahkâi nih ka sim asi. Ti ding hen ka tik a tlung rawh. Na sualnâk chu theih lo hen mawh pawi ti hen khuaruatnâk ka nei awt lo. Na thilti ruangah rêp hen na um lai,” a ti. LALPA Zahkâi nih a sim asi.

¹⁵LALPA nih ka sinah thu a sim.

¹⁶“Thikho mi minung, veikhat vuak hen na duh chem mi minung chu ka lâk ving awt. Na vûirâm ding asi lo, na ṭap ding asi lo, na mitthli rêng a tlâ ding asi lo.

¹⁷Na phu-ûk hâu khawm theih hen um lah seh. Na lungfâknâk zauhtir ding hen na lû karo leh kê karo hen kal lah. Na mêl khuh lah le, mi lungfâk tla nih an ei mi buh khawm ei lah,” a ti.

¹⁸Zîngtê hen zapi tla hen thu kan ruat. Chu zânlei chun ka nupi a thi rawh, a thâituan ah simh ka si zia hâwi hen thil ka ti.

¹⁹Mi nih, “Zeirangah hi hâwi hen thil na ti,” an hawng ka ti.

²⁰Churawhchun kei nih an sinah, “LALPA nih nannih Israel mi tla rangah hi thuchah hi an simh na ding hen hawng ka simh:

²¹Biakin nanna rinhsanh. Va zauh ding leh va pal ding khawm nan duh thlo le, sikhawmsele LALPA nih a nawmh awt. Chun nan in sungkhur ah a ngâksia dauh mi tla Jerusalem ah um rih mi tla chu râltuknâk ah thah hen an um lai.

²²Churawhchun ka ti mi chu nan ti lai rawh. Nan mêl nan khuh lai lo le, lungfâk tla ei mi buh nan ei lai lo.

²³Lû karo mawh kê karo hen mawh kal hen lungfâk hen nan ṭap lai lo. Nan sualnâk ruangah veih hen nan um lai le, nanna rûm tawnh lai.

²⁴Churawhchun nan rangah singsiahnâk ka si lai le; ka ti mi zawng chu nan ti lai. LALPA nih, chubang chu a tlung tikah amah chu LALPA Zahkâi asi ti nan theih lai rawh,” ka ti.

²⁵LALPA nih, “Tuah, thikho mi minung, Biakin bir tak anna zûm phahnâk leh anna lâwmnâk, an zauh zûn mi leh pal ding an duh mi chu ka lâk piak ving na awt. An fanu leh an fapa tla khawm ka lâk piak ving na lai.

²⁶Hi thil ka ti ni ah siatnâk ah a âwl mi tla chu an hawng lai le, a thâwngthâng an simh na lai.

²⁷Chu ni lîlâ ah nan thlâu rawh mi thu sim khonâk chu nan tawng nawlh lai le, amah chu nan sawnh lai. Chu hâwi hen zapi sinah singsiahnâk nan si lai le, kei, LALPA ka si ti an theih lai rawh,” a ti.