Read Bawm Chin EZEKIEL 25 Bible Online

EZEKIEL 25 - Bawm Chin bible

EZEKIEL 25

¹LALPA nih ka sinah thu a sim.

²“Thikho mi minung, Amon ram chu sâwi.

³Kei, LALPA Zahkâi nih thu ka sim mi ngâi ding hen simh na: Ka Biakin nawmh hen a um mi muh chu nan duh zia asi, Israel ram râwk hen a um mi muh khawm nan duh zia, Juda sal ah kal mi muh khawm nan duhzia asi.

⁴Chu hâwi nannâ lâwm ruangah saklei a mi phun tla chu nanmah nehtu ah ka siam na awt. Nan ram ah um mun an khuar lai le, chunah chun an um lai. Nan thingthei rah leh nan chaw nûk tla an ei hen an din lai.

⁵Rabah khuapi chu sangâwngsâu tlawngnâk mun ah ka changtir lai, Amon ram pumpi chu dawrâ tlawngnâk mun ah ka siam lai le, chu tikah kei LALPA ka si ti nan theih lai.

⁶“Hi hi LALPA Zahkâi nih a sim mi chu asi: Nan za nan bengh le, lâwm bû hen nanna lawk. Israel ram nan zauhnawmh.

⁷Chu hâwi hen nan um ruangah phundang tla sinah ka nan pêk na lai le, annih nih an râwk na hen an rûn na lai. Ka nan râwk dep na lai le, phun ti tlâk lo leh mah ram neilo mi nan si lai rawh. Chu tikah kei, LALPA ka si ti nan theih lai,” a ti.

⁸LALPA Zahkâi nih, “Moab nih Juda chu phun dang tla hâwi ber asi a ti ruangah,

⁹Moab ramri ah an vêng mi khuapi tla leh khuapi ṭha chem tla--Beth Jesimoth, Baal Meon leh Keriathaim khawm ka dotir sih awt.

¹⁰Saklei ramkaro mi phun tla chu Moab leh Amon nehtu ah ka siam na lai le, Moab chu phun hen ruat asi lai lo rawh.

¹¹Moab chu ka rêp lai le, LALPA ka si ti an theih lai rawh,” a ti.

¹²LALPA Zahkâi nih, “Edom mi tla nih Juda tlûnah ṭha lo tak hen lehrûl an sam le, chu lehrûl samnâk nih Edom tlûnah mawhnâk a tlungtir.

¹³Tuah Edom mi tla chu ka rêp na hen minung leh ran chunah um mi tla chu ka thah na awt ti ka sim asi. Teman khuapi thawk hen Dedan khuapi tiang ka veih lai le, minung tla khawm tuknâk ah an thi lai.

¹⁴Keimah ruangrûl ah ka mi Israel tla nih Edom tlûnah lehrûl an ka sam piak lai le, ka thinthawknâk fâk zia Edom rangah an theihtir. Edom nih phû ka lam mi chu zei asi a theih lai rawh,” a ti. LALPA Zahkâi nih a sim asi.

¹⁵LALPA Zahkâi nih, “Philistia mi tla nih hun sâwt tak an mêlma si rawh mi tla tlûnah ṭha lo tak hen phû an lam le, an hua tuk na ruangah an veih dep.

¹⁶Churuangah Philistia mi tla chu ka do na hen ka veih ving na awt ti ka phuang asi. Philistia phâi ram ah mi a thibang tla khawm ka veih dep na awt.

¹⁷Fâk tak hen ka rêp na lai le, diriam rang hen lehrûl ka sam na awt. Ka thinthawknâk an theih lai rawh. Churawhchun LALPA ka si ti an theih lai rawh,” a ti.