Read Bawm Chin EZEKIEL 26 Bible Online

EZEKIEL 26 - Bawm Chin bible

EZEKIEL 26

¹Sal ah kan tâng mi kum leikhatnâk thla a ni masachem ah LALPA nih ka sinah thu a sim.

²“Thikho mi minung, hi hi Tura khuapi mi tla lawmhnâk chu asi. ‘Jerusalem khuapi chu a râwk rawh! A sâwlehnâk thiltikhonâk khawm a vei rawh! Hawng kan dotu asi lai lo rawh!’ ti hen an âu.

³“Tuah, hi hi kei LALPA Zahkâi nih ka sim mi chu asi: Tura khuapi, kei hi na mêlma ka si. Phun tamtak a nan dotu ding ka hawng fial lai le, tîlian hâwi hen an hawng kal lai.

⁴Na khuapi kulh tla an râwk lai le, na insâng tla an siat lai. Chu tikah kei nih valeidip zawzawng ka phiat lai le, lungpi cho ka siah lai.

⁵Chu tipi lakah a um mi lungpi tlûnah chun ngarâltu tla nih an lên an pho lai. Kei, LALPA Zahkâi nih ka sim asi. Phun tla nih Tura chu an rûn lai le,

⁶an nâmsâu hen ram sungah khuapi lakah um mi tla chu an thah na lai. Chu tikah Tura nih kei, LALPA ka si ti a theih lai rawh,” a ti.

⁷LALPA Zahkâi nih, Lal zawzawng lakah lal rokual chem Nebukadnezar Babulon lal chu Tura do ding hen ka hawng tir awt. Marlei thawk hen kawrsen tamtak, rang tla leh kari a tlûnah to mi tla hen a hawng lai.

⁸Ram sungah khuapi lakah um mi tla chu râltuknâk ah thah hen an um lai. Mêlma nih khur an chawh lai le, mual pâwng tla an siam lai, phênnâk ding hen kulh bir tak tla an siam nawh na lai.

⁹Kulh râwknâk hen kulh tla an dêng lai le, thîr ngul hen nan insâng tla an siat lai.

¹⁰Rang an tek mi valeidip khû nih a nan vurh dep na lai. Rang tla nih kari nûk hen khuapi a râwk mi kulh kawtkâ ah an lan mi hâu nih kulh dâi a tlirh lai.

¹¹Rang tlûnah totu tla chu vândâwmpi hâwi hen nan khua dungah an hawng lai le, nan mi tla an nâmsâu hen an thah na lai. Nan lungphun lian tatak tla tual ah a tlû lai.

¹²Nan neihnâk leh sawlehnâk tla chu nan mêlma tla rangah dingchangnâk asi lai. Nan kulh tla chu an râwk lai le, nan nuamchenhnâk in tla an râwk lai. Lung tla, thing tla, nâwmtâm tla chu an lâk lai le, tipi lakah an lawnh lai.

¹³Nan lasak tla ka bângtir lai le, nan tumphung rihâu tla ka rehtir lai.

¹⁴Lungpi ngarâltu tla lên phonâk lungpi cho ka siah awt. Chu khuapi chu dirh nawlh asi lai lo rawh. Kei, LALPA Zahkâi nih ka sim asi,” a ti.

¹⁵LALPA Zahkâi nih hi thu hi Tura khuapi a sim nawh ding mi chu asi: “Neh hen na um tikah chun chu ram ah um mi tla chu thah mi râk hâu ah an lâu lai.

¹⁶Tipi ah um mi phun tla lal zawzawng an laltophah thawk hen thlâk an si lai. An lal thuam leh an nipuan thuamh mi tla an lit piak na lai le, tual ah thir bû hen an to lai. Na thihnâk ruangah an lâu tuk ah an thir mi an bâng kho lai lo.

¹⁷Hi mithi vûinâk la hi a nan sak piak lai: Khuapi minthang tak chu a râwk rawh! Tipi mi a lawng tla chu veih peng asi rawh. Hi khuapi mi minung tla nih tipi ah um hen lâi an rêl. A ram ah um mi minung tla an lauh na.

¹⁸Tuah a tlûk ni ah tikulh tla an thir le, Chu hâwi râwknâk lakah an mi tla an lâu,” a ti.

¹⁹LALPA Zahkâi nih thu a sim le: “Âukhawm umlonâk khuapi râwk rawh mi hâwi hen ka nan siam awt. Tisumsumriat tî thûk tak hen ka nan khuh awt.

²⁰A lânah mi tla sinah laikulh thihnâk ah ka nan kaltir awt. A lânah thi rawh mi murui sinah um rawh ding hen zungzâl siat leh râwknâk mun tual tangah ka nan umtir awt. Na sual man chu minung ram ah na mun na luah hen na um nawlh ding asi lo rawh.

²¹Zûnzauh ding ṭihnungkâi ah ka nan siam lai le, chu chu na dawnghnâk asi lai. Mi nih an hâwl khawmsele tawng kho na si lai lo rawh,” a ti. LALPA Zahkâi nih a sim.