Read Bawm Chin EZEKIEL 27 Bible Online

EZEKIEL 27 - Bawm Chin bible

EZEKIEL 27

¹LALPA nih ka sinah,

²“Thikho mi minung, Tura khuapi tipi kap ah um mi,

³tipi kap munkip ah um mi tla hen sawlehtu vûinâk la sak. LALPA Zahkâi thusim simh: Tura, na dawhnâk na zûm phah.

⁴Na in chu tipi asi. A nan siamtu nih ti meilawngpi dawh tak hâwi hen a nan siam.

⁵Na lawng tung chu Lebanon ah mi sidar thing an mang.

⁶Lawng veifung siam ding hen Basan ram ah mi oak thing an lâk le; Na lawng tangphah chu Kupra a mi far thing hen siam asi le, Sâi hâ hen thuamh mi asi.

⁷Na lawng puanzâr chu puannêm, Aigupta ram ah mi puannêm thuamh mi asi. Râllât thawk khawm hen awldek hen theih asi. Na kawtkâ puanzâr chu puan ṭha chem, Kupra tikulh ah puan dumpâwl asi.

⁸Na lawng veitu tla chu Sidon leh Arvad khuapi mi tla an si. Na mi zungthiam tla chu lawng dâwngpu tla an si.

⁹Timeilawngpi ah thing thil siamtu tla chu Biblos mi, ṭha tak hen sin mi an si. Lawng dâwngpu tla tipi kip ah timeilawngpi hen Kal mi tla nih na sinah saw an leh.

¹⁰“Persia, Lidia, Libia ram ah mi kawrsen tla nih na kawrsen sinah rian an ṭuan. Na kawrsen mun ah an phaw leh an lukhuh tla an thlâi. Nangmah rokual tirtu tla an si.

¹¹Arvad ram ah mi kawrsen tla nih na kulh an vêng le, Gamad ram ah mi tla nih na insâng an vêng. Na kulh lakah an phaw tla an thlâi. Nangmah dawhtirtu tla an si.

¹²“Spain ram ah saw na leh le, na thil tamtak man ah tangkasa, thîr, tâmâ leh suan na lâk.

¹³Greek, Tubal leh Mesek ram ah saw na leh le, na thil tla chu sal leh dâr châwknâk ah na mang.

¹⁴Kari nûktu rang tla, râltuktu rang tla, sanatung tla Beth Togarmah ah mi thlengnâk dingah na thil-le-rî na mang.

¹⁵Rodes mi tla hen saw nanna leh tawnh le; ram tamtak mi tla nih na thil thlengnâk dingah sâi hâ leh eboni thing tla a nan pêk.

¹⁶Siria mi tla nih na thil zuar tla leh na ram ah thilsuak tla an châwk. Na thil-le-rî man rangah emeral, puan dumpâwl, thuamhnâk, puannêm ṭha tak, koral leh rubi a nan pêk.

¹⁷Juda leh Israel nih na thil man rang dingah wheat, khuaitizû, oliv sariak leh thil rimthâw an pêk.

¹⁸Damaska mi tla nih na zuar mi tla leh na ram ah thilsuak tla an châwk le, a man rang dingah Helbon ah mi uain leh Sahar ah mi samul an pêk. Na thil-le-rî tla chu thîr tlang leh thil rimthâw tla hen an thleng.

²⁰Dedan mi tla nih rang tlûn puan phah tla hen na thil-le-rî tla an thleng.

²¹Arabia mi tla leh Kedar ram ah lâirêltu tla nih na thil zuar man rang dingah dawrâ fa tla, dawrâ tla leh kêl tla an pêk.

²²Na thil-le-rî tla chu Seba leh Raamah ah sawlehtu tla nih lungmantam tla, ngûn leh rimthâw ṭha chem mi tla hen an thleng.

²³Haran, Kanneh, leh Eden, Seba khuapi sawlehtu, Assur leh Kilmad khuapi tla zawzawng nih na sinah saw an leh.

²⁴Nuamchenhnâk nipuan, puan dumpâwl leh thuamh mi puan, ṭuang tangphah tlêu darh mi tla leh rirual ṭha mi zât leh rirual rarâu na sinah an zuar.

²⁵Na thil zuar tla chu thil phurhtu lawng rual lian tla nih an phurh. Nang chu tipi ah timeilawngpi Thil rit tak phurhtu hâwi na si.

²⁶Na lawng veitu tla nih tipi ah an kalpi liauah, Saklei mi thli nih tlâng thawk hen lât takah a nan râwk.

²⁷Na thilneih zawzawng na zuar mi tla, Lawng veitu tla lakah lawng dâwngpu tla zawzawng, Na timeilawngpi lakah thing thil siamtu tla leh Thil zuartu tla, timeilawngpi sungah kawrsen zawzawng, An ektê hen tipi lakah na lawng a râwk rawh chun an vei hep.

²⁸Lawng dâwngpu tla tî lakah an tla mi âu hâu nih tivakap a râwng.

²⁹“Tu chun timeilawngpi chu a karo hen a um rawh, Lawng dâwngpu tla chu vakap leiah an kal hep.

³⁰An ektê hen nangmah ruangah an lung a fâk tuktarâi le, An lû ah valeidip phulh hen vachâm lakah an rîl.

³¹Nangmah ruangah an lû tla an mêt le, Salâpuan anna aih. An lung a fâk tuktarâi ruangah thungâi an ṭap.

³²Nangmah vûinâk la an sak: ‘Tura tluk khotu âu um lai, Tu chun tipi ah dâidep hen a um mi hi?

³³Tipi tlûnah na thil zuar na put liauah, Phunkip thil herh duh mi hen na khat. Na thil neih nih Lal tla a neihtir.

³⁴Tu lam chun tipi ah na râwk rawh le; Tisumsumriat taw dengah na pil rawh. Na thil tla leh na rangah rianṭuantu zawzawng chu Tipi ah na sinah an vei hep rawh.’

³⁵“Tiva kap mi zawzawng tla nih na thi mi theih hen an thinlung a purh khit. An lal tla tiang khawm an lâu le, an mêl ah lâu mêl an put.

³⁶Nang chu na vei mi rawh, na vei pawt mi rawh, laikulh zawzawng sawlehnâk chu ṭihnungkâi asi rawh, nangmah hâwi hen an thi bâk lai ti an ṭih.”