Read Bawm Chin EZEKIEL 29 Bible Online

EZEKIEL 29 - Bawm Chin bible

EZEKIEL 29

¹Sal ah kan tâng mi kum rânâk a thla rânâk ni leinih ni ah LALPA nih ka sinah thu a sim.

²“Thikho mi minung, Aigupta lalchem chu sâwi. Amah leh Aigupta ram zawzawng mi tla rêp hen an um ding mi simh.

³Hi hi LALPA Zahkâi nih Aigupta lalchem sinah thu a sim mi chu asi: Kei chu na mêlma ka si le, nang chu tiva ah bawk mi tisârtâm lian tak na si. Nile va chu nang mah siam mi leh na tâ hen na sim.

⁴Na khâ lakah siau hen tleng dak hen ka nan banh lai le, na tiva ah mi ngâ chu na lakah bir tak hen ka kawptir thlir lai. Churawhchun na lakah ngâ a kawp mi tla zawzawng hen Nile ah mi suak zek hen kan nûk lai.

⁵Nang leh ngâ tla chu ramkaro ah kan lawnh lai. Na taksa chu vûi lo hen tual ah a rîl lai. Vâ leh ramsa tla râwl rangah ka pêk na lai.

⁶Chu tikah Aigupta mi zawzawng tla nih LALPA ka si ti an theih lai rawh,” a ti. LALPA nih, “Israel mi tla chu ṭangpitu ding hen nanmah Aigupta mi tla lakah anna ngauh le, sikhawmsele nang chu ṭhianṭhunh nêm pêk mi tluk khawm na si lo.

⁷Na lakah anna ngauh liauah, na kiak le, an zaktang ah na sunh na le, an dunglei ah na ilh na.

⁸Churawhchun tuah, kei, LALPA Zahkâi nih nâmsâu hen a nan dotu ding minung tla ka hâwl lai le, na mi tla leh ran tla an thah lai ti ka nan simh asi.

⁹Aigupta chu a karo hen a um lai rawh. Churawhchun LALPA ka si ti na theih lai. “Nile tiva chu keimah tâ ka siam mi asi na ti ruangah,

¹⁰nangmah leh Nile va mêlma ka si. Aigupta ram zawzawng chu marlei kângah Migdol khuapi thawk hen sim leikângah Asuan khuapi tiang hen Sudan mi tla ramri leikângah lampi zawzawng tla a karo hen ka siam lai.

¹¹Chu ram ah chun minung leh ramsa zeikhawm â vel mi a um lai lo. Kum sâwmli sung chu chunah zeikhawm a um lai lo.

¹²Aigupta chu laikulh ah mun karo siah mi lakah a zual kâi chem mi asi lai. Kum sâwmli sung chu Aigupta khuapi tla chu râwk dep hen a um lai le, khuapi dang ngâk hen a râwk zia khawm a fâk lai. Aigupta mi tla chu ka tektir na lai. Ram kipah an tek lai le, phun dang tla nawngah an um lai,” a ti.

¹³LALPA Zahkâi nih, “Kum sâwmli nûnah Aigupta mi tla chu phun tla nâwngah ka rekrâwitir na mi chu ka kîrtir nawlh lai le,

¹⁴a tîrah an umnâk Aigupta simlei ah ka umtir nawlh na lai.

¹⁵Chunah chun ram chak lo tak an si lai le, lalram zawzawng ah chak lo chem mi an si lai le, phundang tlûnah lâi an rêl lai lo rawh. Phundang tla an thu thu ah siam kho lo ding hen mi pawiherh ah ka siam na lai lo rawh.

¹⁶Israel tla nih anmah ṭangpitu ding hen an lakah anna ngauh lai lo rawh. Aigupta thihnâk nih Israel tla chu an lakah anna ngauh mi a dik lo zia a theihtir na lai rawh. Churawhchun Israel tla nih kei, LALPA Zahkâi ka si ti an theih lai rawh,” a ti.

¹⁷Sal ah kan tâng mi kum kul leh kum sarih a thla khatnâk a ni khat ni ah LALPA nih ka sinah thu a sim.

¹⁸“Thikho mi minung, Babulon lalchem Nebukadnezar chu Tura do ding hen a suak. A kawrsen tla chu thil rit tak an lû kawlh rê hen a phurhtir na le, an liang tla â hâwk ver, sikhawmsele chu zawng anna nawk phahnâk karah chun lal leh kawrsen tla nih zei thil khawm an tawng lo.

¹⁹Churuangah hi hi kei LALPA Zahkâi nih thu ka sim mi chu asi: Aigupta ram chu lalchem Nebukadnezar rangah ka pêk rawh. A kawrsen tla lawh rangah thil tla a râwk hen a rûn lai le, Aigupta neih zawzawng a put hep lai.

²⁰A kawrsen tla nih ka rangah rian an ka ṭuan piak ruangah, a rianṭuan man ah Aigupta ram chu ka pêk asi. Kei LALPA Zahkâi nih ka sim asi.

²¹“Chu chu a hawng tlung tikah Israel mi tla chu ka chaktir na lai le, nang Ezekiel nih mikip theih ding hen thu ka nan simtir lai le, kei LALPA ka si ti an theihnâk ding hen,” a ti.