Read Bawm Chin EZEKIEL 30 Bible Online

EZEKIEL 30 - Bawm Chin bible

EZEKIEL 30

¹LALPA nih thu a sim nawlh.

²“Thikho mi minung, kei LALPA Zahkâi nih ka sim mi hi simkan le, phuang rawh. Hi bang thu tla hi sim rawh: Ni ṭihnungkâi a hawng tlung awt!

³LALPA nih thil a ti ding mi ni chu a nâi rawh, Phun tla rangah sûm zîngnâk ni leh lawksawngnâk asi.

⁴Aigupta ah râltuknâk a um lai le, Sudan ah hamhnâk rokual tak a um lai. Aigupta ram ah mi tamtak thah hen an um lai le; Ram chu an rûn lai le, Râwk dep hen a um lai.

⁵“Chu râltuknâk ah chun kawrsen tla, Sudan, Lidia, Libia, Arabia, Kub ram thawk hen lâk mi tla leh keimah mi lakah mi ngelchel khawm thah hen an um lai,” a ti.

⁶LALPA Zahkâi nih, “Marlei ah mi Migdol thawk hen simlei kângah mi Asuan tiang hen Aigupta vêngtu zawzawng tla chu râltuknâk ah thah hen an um lai. Aigupta ram ah kawrsen zumhkâi tla chu veih an si lai. Kei, LALPA Zahkâi nih ka sim asi.

⁷Ram chu laikulh ah â râwk chem mi ram asi lai le, a khuapi tla chu a râwk dep lai.

⁸Aigupta ram chu mei hen ka duah tikah leh amah vêngtu zawzawng thah hen an um tikah, kei LALPA ka si ti an theih lai.

⁹“Chu ni chu a hawng tlung tikah leh Aigupta chu a vei tikah, Sudan mi zumhkâi tla thawktir na ding hen lawng hen mi ka fial lai le, annih tla chu an lâu lai. Chu ni chu a hawng tlung awt rawh!” a ti.

¹⁰LALPA Zahkâi nih, “Aigupta ram neihnâk dawngtir ding hen Babulon lalchem Nebukadnezar ka mang awt.

¹¹Amah leh a kawrsen khuaruatnâk neilo mi tla chu ram râwk ding hen an hawng lai. Aigupta chu nâmsâu hen an do lai le, ram chu ruak hen a khat lai.

¹²Nile tiva ka kangtir lai le, Aigupta chu misual tla thu thu hen ka siah lai. Ramdang mi nih ram pumpi an râwk dep lai. Kei, LALPA nih ka sim asi,” a ti.

¹³LALPA Zahkâi nih, “Memphis mi milem tla leh pathian diklo tla ka veih lai. Aigupta tlûnah âukhawm lâirêltu an um lai lo, zapi tla chu keimah nih lâunâk ka pêk awt.

¹⁴Aigupta simlei kâng chu ka râwk lai le, marlei mi Zoan khuapi chu mei hen ka duah awt. Thebes khuapi chu ka rêp lai.

¹⁵Pelusium khuapi Aigupta ram ah mi kulh rokual tak nih chun ka thinthawknâk a theih lai. Thebes neihnâk khawm ka veih lai.

¹⁶Aigupta ram chu mei hen ka duah lai le, Pelusium chu a ngaihsia lai. Thebes khua kulh tla chu a chim lai le, chu khuapi chu tîlian nih a khuh lai.

¹⁷Heliopolis khuapi ah mi tlangvâl tla leh Bubastis ah mi tla chu râltuknâk ah an thi lai le, midang tla chu sal ah an put na lai.

¹⁸Aigupta thiltikhonâk ka râwk hen chaknâk â zûm phah mi chu ka dawnghtir tikah chun Tahphanbes tlûnah mûinâk a hawng tlung lai. Aigupta ram chu sûm nih a khuh dep lai le, a khuapi mi minung tla chu sal ah an put hep na lai.

¹⁹Hi hâwi hen Aigupta ka rêp tikah chun LALPA ka si ti an theih lai rawh,” a ti.

²⁰Sal ah kan tâng mi a kum leikhatnâk a thla masachem a ni sarih ni ah LALPA nih ka sinah thu a sim.

²¹“Thikho mi minung, Aigupta lalchem bân chu ka khiak rawh. Chak nawlh leh riamnâm mang nawlh ding hen a tuamtu leh a pâinâk rî siamtu âukhawm an um lo.

²²Tuah hi hi kei, LALPA Zahkâi nih thu ka sim mi chu asi: Kei, hi Aigupta lalchem mêlma chu ka si. A bân a ṭha mi leh a kiak chia khiangkhinih hen ka khiak piak awt, churawhchun a kut a mi nâmsâu chu a tlâ lai rawh.

²³Aigupta mi tla chu laikulh zawzawng ah ka rektir phin na awt.

²⁴Churawhchun Babulon lalchem kut tla chu ka chaktir lai le, a kut ah ka nâmsâu ka puttir awt. Sikhawmsele Aigupta lalchem bân chu ka khiak lai le, a mêlma tla mâika ah rûm hen a thi lai.

²⁵Asi, anih chu ka chak lo tir lai le, Babulon lalchem kut tla chu ka chaktir lai. Ka nâmsâu ka pêk hen Aigupta lei a khît tik chun mikip nih kei, LALPA ka si ti an theih lai.

²⁶Aigupta mi tla chu laikulh pumpi ah ka rektir na lai. Chu tikah LALPA ka si ti an ka theih lai,” a ti.