Read Bawm Chin EZEKIEL 31 Bible Online

EZEKIEL 31 - Bawm Chin bible

EZEKIEL 31

¹Sal ah kan tâng mi a kum leikhatnâk a thla thumnâk a ni khatnâk ni ah LALPA nih ka sinah thu a sim.

²“Thikho mi minung, Aigupta lal leh a mi le tla sinah thu va sim: ‘Thil na ti kho a! Zei hen kan tahṭhimh kho lai?

³Lebanon tlâng ah mi sidar thing dawh tak, Leh a ṭeng dâidul ṭha tak, Sâng tak vândâwm tawngh khet mi hâwi na si.

⁴Ṭhangtirtu ding hen tî a um le, Tual tangah amah châwmtu ding hen tiva tla a um. A khonâk mun chu tî an tawih le, Chu tiva chu tumun ah mi thing zawzawng leiah a luang.

⁵Ṭha tak hen tî tawih asi ruangah, Thing dang tla ngâk hen a sâng dauh. A ṭeng tla khawm a lian hen a sâu.

⁶Va chikip nih a ṭeng tla lakah bû an khuar le; A dâidul lakah ramsa tla nih fa an ring le; Laikulh ah phun tla chu a dâidul ah anna dîn.

⁷Chu thing chu a sâng hen a ṭeng tla a sâu hen thungâi â dawh A ram nih chun thûk takah tî luangnâk a va phanh.

⁸Pathian dûm a mi sidar thing hen khawm tahṭhimh kho asi lo. Zei far thing khawm nih chu hâwi hen ṭeng a nei dah lo. Phâi mi thing khawm chu hâwi hen a nung lo. Pathian dûm khawmah chu hâwi hen thing dawh a um lo.

⁹A ṭeng tla chu dawh tak hen zâm dul hen ka siam. Pathian dûm Eden ah mi thing kip nih an nahsuah.

¹⁰“Tuah, kei, LALPA Zahkâi nih chu thing vândâwm tawngh khettu lakah thil a hawng tlung ding mi chu ka nan simh lai. Sâng dadauh hen a ṭhang le â zûm dadauh;

¹¹churuangah ka nawng le, ramdang mi lâirêltu sinah ka pêk ving awt. Chu thing chu a sual man hen â dêng mi a pêk lai.

¹²Ramdang minung khuaruat lo mi nih an hâu lai le, an mâk thlap lai. A ṭeng tla leh a nah bû a kiak mi tla chu tlâng sâng kipah leh tivakuam ah a tlâ lai. Phun zawzawng a thlaliah ah um mi tla chu an kal hep lai.

¹³Va tla an hawng lai le, thing a tlû mi lakah an fû lai le, ramsa tla nih a ṭeng tla an kanh lai.

¹⁴Tu thawk hen zei thing khawm tî hen ṭha tak châwm mi chu hâwi tluk a sâng hen ṭhang mi a pâr nih vândâwm phanh khet a sâng mi chu a um lai lo rawh. Thikho mi minung tla laikulh thihnâk mun ah an kal mi hâwi hen an ektê hen thi ding hen an vânduai rawh,” a ti.

¹⁵Hi hi LALPA Zahkâi nih a sim mi chu asi: “Chu thing chu laikulh thihnâk mun ah a kal ni ah lungfâk singsiahnâk ding hen tual tangah mi tî ka khuhtir awt. Tiva tla leh tivatê tamtak chu luang lo hen ka siam awt. Chu thing chu a thi rawh ruangah Lebanon tlâng tlûnah mûinâk ka tlungtir lai le, tumun ah thing tla zawzawng ka uaitir ver lai.

¹⁶Laikulh thihnâk ah ka kaltir tik chun niamtirnâk hâu tla nih phun tla a ninh lai. Eden ah mi thing zawzawng leh a ṭha mi zawzawng Lebanon tlâng tlûnah tî hen châwm mi thing tla, laikulh tangah niamh hen a um ruangah anna lâwm lai.

¹⁷Tlû rawh mi tla sinah laikulh thihnâk ah an kal lai. A thlaliah tangah umtu tla zawzawng chu phun tla lakah anna rekrâwi lai.

¹⁸“Thing chu Aigupta lal leh a minung tla an si. Eden a mi thing tla tluk hen sâng lo khawmsele, thinlung a purh. Sikhawmsele tuah Eden a mi thing tla hâwi hen laikulh thihnâk ah lunglo mi leh râltuknâk ah thi mi tla sinah an kal lai. Ka ti asi,” LALPA Zahkâi nih a ti.