Read Bawm Chin EZEKIEL 32 Bible Online

EZEKIEL 32 - Bawm Chin bible

EZEKIEL 32

¹Sal ah kan tâng mi kum leinihnâk a thla leinihnâk a nikhat ni ah LALPA nih ka sinah thu a sim.

²“Thikho mi minung, theihkan tirnâk khung tak Aigupta lalchem rangah pêk rawh. Ka sinah mi thuchah hi pêk rawh: Chakeibaknei hâwi hen phun tla tlûnah thil na ti le, sikhawmsele tisârtâm tiva ah mi tî persur tirtu na bangh dauh. Na kê hen tî na nawih le, tiva tla na nawmh ver.

³Phun tamtak anna pûm tikah ka lên hen ka nan tleih lai le, vakap leiah ka nûktir na lai.

⁴Tual tlûnah ka nan lawnh thlap lai le, laikulh a mi va leh ramsa tla ka pumh lai le, a nan tlanh lai.

⁵Tlâng leh tiva chu na ruak thû hen ka khattir lai.

⁶Na thî chu tlâng tla ah ka thektham lai le, tiva tla ka khattir lai.

⁷Ka nan veih tik chun vân tla ka khuh lai le, ârfi tla ka nâwt dep lai. Nî chu vândâwm pîn leiah â thup lai le, thlâ a chêu lai lo rawh.

⁸Vân ah mi chêu tla chu ka mih lai le, na laikulh chu mûi nâwngah ka lawnh lai. Kei, LALPA Zahkâi nih ka sim asi.

⁹“Na theih dah lo mi nangmah siatnâk thu ram lakah ka thangtir tikah chun phun tamtak an lawk a sawng lai.

¹⁰Na lakah thil ka ti mi nih phun tamtak a lâutir na lai. Ka nâmsâu ka hawng lek tikah chun lalchem tla chu lâu hen an thir lai. Na tlûk ni ah chun an ektê hen thih ṭih ruangah an thir lai,” a ti.

¹¹LALPA Zahkâi nih Aigupta lalchem sinah, “Babulon lalchem nâmsâu chu na muh lai.

¹²Phun sual tla lakah mi kawrsen sual tla, an nâmsâu tla ka phâwitir na lai le, na mi tla ka thahtir hep na lai. Na mi zawzawng leh thil dang dang na putso mi tla a vei hep lai.

¹³Tî suaknâk khur kipah mi na ranrual tla ka thah na lai. Tî nawihtu ding ranrual leh minung rerêng an um lai lo rawh.

¹⁴Na tî tla chu a mahmuntê ah a um lai le, fîm riang hen a um lai le, dâisiptê hen na tiva chu a luang lai. Kei, LALPA Zahkâi nih ka sim asi.

¹⁵Aigupta chu a karo hen chunah um mi zawzawng ka veih hep tikah LALPA ka si ti an theih lai rawh.

¹⁶Hi simkannâk khung tak hi mithi vûinâk la ah â chang lai. Phun lakah mi nunau tla leh a mi zawzawng nih Aigupta ulhnâk ah an sak lai. Kei, LALPA Zahkâi nih ka sim asi,” a ti.

¹⁷Sal ah kan tâng mi kum leinihnâk a thla khatnâk a ni leinga ni ah LALPA nih ka sinah thu a sim.

¹⁸“Thikho mi minung, Aigupta ram ah mi tamtak ruangah lungfâk hen um rawh. Phundang thiltikho tak tla hen laikulh thihnâk ah kaltir na.

¹⁹An sinah thu simh na: “Midang tla ngâk hen dawh khun hen ma na ruat? Laikulh thihnâk ah na kal lai le, Pathian neilotu tla sinah na zâu lai.

²⁰“Aigupta mi tla chu râltuknâk ah thah mi tla hen an tlû lai. Anmah thah ver ding hen nâmsâu chu tîm chia zet hen a um.

²¹Mi râlṭha chem tla leh Aigupta leiah ṭângṭawm hen dotu tla nih chun laikulh thihnâk ah Aigupta minung tla lawmhtu an si. An âu le: ‘Pathian neilotu, râltuknâk ah thah hen um mi tla chu hinah an hawng le, hinah hin an zâu!’

²²“Asiria chu chunah a kawrsen thlân tla nâwngah a um. An ektê hen râltuknâk ah thah hep hen an um le,

²³an thlân tla chu laikulh thûk chemnâk mun ah a um. A kawrsen tla chu râltuknâk ah an tlû ver le, an thlân nih a thlân chu a kulh dak. Sikhawmsele minung ram chu an lâutir nget rih.

²⁴“Elam chu chunah a kawrsen tla thlân nâwngah a um. Râltuknâk ah thah hep an si le, fêmtan lo hen laikulh thihnâk ah an kal. An dam liauah ningṭih punghtu an si, sikhawmsele tu chun an mualpho rawh.

²⁵Elam chu râltuknâk ah thah hen um mi tla sinah a zâu bâk le, a kawrsen tla thlân nâwngah a um. An ektê hen fêmtan lo an si le, an ektê hen râltuknâk ah thah hen an um. An dam liauah chun ningṭih punghtu an si le, sikhawmsele tu lam chun râltuknâk ah thi bâk hen thihnâk ah an zâu le, an mualpho rawh.

²⁶“Mesek leh Tubal khawm chunah chun an um le, an kiangkam ah an kawrsen tla thlân a um. An ektê hen fêmtan lo an si le, râltuknâk ah thah hen an um. Sikhawmsele a nung mi tla rangah an lâutir nget rih.

²⁷A lânah mi râlṭha râlthuam rangtling hen a thi mi tla, an nâmsâu tla an lû tangah an siah le an phaw tla hen an taksa an khuh mi tla hâwi hen khawm zahkâi tak vûinâk khawm an lawhtir na lo. Hi bang mi râlṭha tla hi veikhat rang chun a nung mi rangah ṭhih na ding hen thiltikho tak an si.

²⁸“Chu chu Aigupta mi tla fêmtan lo tla râltuknâk ah thi mi tla sinah siat leh râwk dep hen an um ding dân chu asi.

²⁹“Edom khawm chunah chun a lalchem tla leh a lâirêltu tla sinah a um. Kawrsen thiltikho tak an si le, sikhawmsele tu chun fêmtan lo tla râltuknâk ah thi mi tla sinah laikulh thihnâk ah an um rawh.

³⁰“Marlei ah lal tla zawzawng khawm chunah an um le, chu hâwi hen Sidon mi tla khawm an um. An thiltikhonâk chu veikhat rang chun ṭihnungkâi ual hen a thang le, sikhawmsele tu lam chun mualpho tak hen râltuknâk ah thah mi tla hen fêmtan lo hen anna dîn rawh. Laikulh thihnâk ah kal mi tla mualphonâk anna ting rawh.

³¹“Hi bang râltuknâk ah thah hen um mi tla muhnâk chu Aigupta lalchem leh a kawrsen tla rangah thlangamnâk asi lai,” LALPA Zahkâi nih a ti.

³²“Aigupta lalchem chu a nung mi tla rangah ṭihnungkâi hen ka siam le, sikhawmsele amah leh a kawrsen tla chu râltuknâk ah thah hen an um lai le, fêmtan lo tla râltuknâk ah thi mi tla sinah an um lai rawh,” LALPA Zahkâi nih a ti.