Read Bawm Chin EZEKIEL 33 Bible Online

EZEKIEL 33 - Bawm Chin bible

EZEKIEL 33

¹LALPA nih ka sinah thu a sim.

²“Thikho mi minung, ram lakah râltuknâk ka tlungtir tikah thil a hawng um mi tla na mi le simh na. Chu ram mi tla nih chun vêngtu dingah an lakah mi pakhat an thîm.

³Mêlma a hawng mi a muh tikah, anih nih rihâu mikip theihtir kan ding hen a suah.

⁴Mi âumawh nih theih ko na hen ngaihlo lêm a thlâk chun mêlma a hawng mi nih amah an thah chun a thi mi chu amah mawh asi.

⁵Theihtirnâk hâu ngaihlo lêm a thlâk ruangah a thi mi chu amah diklonâk asi. Ngâi mi sele chu a suak kho ding mi.

⁶Sikhawmsele vêngtu nih mêlma a hawng mi muh ko na hen rihâu a suah lo chun, mêlma a hawng mi nih chubang misual tla a thah na chun an thi mi tla ruangah vêngtu tlûnah mawhnâk ka thâng awt.

⁷“Thikho mi minung, tuah Israel phun tla rangah vêngtu ah ka nan siam asi. Simhkannâk ka nan pêk mi hi na simh vima na ding asi.

⁸Misual chu thi ding asi ka ti mi lakah nung ding hen a umdân lêt ding hen na simhkan lo hen sual si bû hen a thi chun, a thihnâk mawh chu nangmah tlûnah ka thâng awt.

⁹Misual chu nun na simh khawmah a sual hen a lêt lo chun sual bû hen a thi lai le, nang nungnâk lam chu zuah asi lai,” a ti.

¹⁰LALPA nih ka sinah thu a sim, “Thikho mi minung, Israel mi tla thusim chu simh nawlh na: ‘Kan sualnâk leh kan thilti diklonâk rit kan phurh asi. Kan vei thlo rawh. Zeitin kan nung kho zia lai?’ an ti.

¹¹Kei, LALPA Zahkâi Pathian nung ka si sung zawng chu ka mitmuh hen misual a thi mi lakah lâwmnâk ka nei kho lo ti simh na. An sual rim hen an nung mi muh ka duh dauh asi. Israel, na thilsual ti bâng rawh. Zeirangah thi ding na duh eu?

¹²“Thikho mi minung, tuah mi ṭha a sual chun, a thil ṭha ti nih amah a hum kho lai lo ti hen Israel tla simh na. Misual nih a sualnâk a lêt chun rêp hen a um lai lo, mi ṭha nih thilsual a ti chun a nungnâk zuah asi lai lo.

¹³Mi ṭha rangah nung ding hen thu ka tiamh kho, sikhawmsele a lânah thil ṭha ka ti mi â tâwk vaih ti hen thilsual a ti chun, a thil ṭha ti rerêng ka theih piak awt lo.

¹⁴Misual chu a thi ding asi ti hen ka sim mi lakah, a sual a lêt hen thil dik a ti chun,

¹⁵ṭhatnâk leikângah zûnzauh ding hen a um chun thutiam hen a pûk mi a rulh nawlh hen, a fîr mi a pêk nawlh hen a sual a rim hen nungnâk pêktu dân a zûl chun, a thi lai lo le, a nung lai.

¹⁶Thilsual a ti mi tla ka ngaihdam lai le, thil dik leh thil ṭha a ti ruangah a nung lai.

¹⁷“Na mi tla nih ka thilti hi a dik lo asi an ti! Asi lo, anmah umdân a dik lo mi asi.

¹⁸Mirep nih thil ṭha ti a bâng hen thilsual a ti chun a thilsual ti ruangah a thi lai.

¹⁹Misual nih a sualnâk a lêt hen thil dik leh thil ṭha a ti chun, a nungnâk a hum asi.

²⁰Sikhawmsele Israel, ka thilti hi a dik lo na ti. Na thilti hen na lakah lâi ka rêl awt,” a ti.

²¹Sal ah kan tâng mi kum leinihnâk a thla rânâk a ni nga ni ah, Jerusalem thawk hen a hawng suak mi a hawng le, khuapi chu a tlû rawh ti hen hawng ka simh.

²²Chu minung a hawng lântê zânleibâi ah, LALPA thiltikhonâk a um ti ka theih. Chu minung chu a thâizing ah a hawng tleng le, LALPA nih thu simkhonâk thiltikhonâk hawng ka pêk nawlh.

²³LALPA nih ka sinah thu a sim.

²⁴“Thikho mi minung, Israel ram ah khuapi a râwk mi lakah um mi tla nih thu an sim: ‘Abraham chu mi pakhat cho asi, ram pumpi pêk hen a um. Tuah chun kan tam thlo rawh, ram chu kan tâ asi,’ an ti.

²⁵“Kei, LALPA Zahkâi nih ka sim mi hi simh na: Sa chu a thî telh hen nan ei. Milem tla nan sawnh. Mi tla nan thah. Ram chu nan tâ si ding hen zeitin nan ruat zia?

²⁶Nan nâmsâu tla nanna rinhsan. Nan thilti tla fihnung a kâi. Mikip nih ṭângdang nan pawm. Zeitin ram chu nan tâ si hen nan ruat zia?

²⁷“Kei, LALPA Zahkâi Pathian nung ka si sung chu khuapi a râwk mi lakah um mi vial chu thah hen an um lai ti hen ka simhkan na mi thu chu simh na. Ram lakah um mi tla chu ramsa tla nih an ei na lai.

²⁸Ram chu a karo hen râwk dep hen ka siam lai le, thiltikho tak hen anna zûmnâk tla chu a dawng lai rawh. Israel tlâng tla chu mâng hen a um lai le, âukhawm mi velvâ an um lai lo.

²⁹Mi tla chu an sual ruangah ka rêp na hen, ram chu a karo hen ka siah tikah, kei, LALPA ka si ti an theih lai rawh,” a ti.

³⁰LALPA nih, “Thikho mi minung, na mi tla nih khuapi kulh kiangah leh an in kawtkâ ah anna tawng liauah nangmah thu an sim. Tuah ‘LALPA thawk hen thu a hawng tlung mi chu ngâi ding hen kan kal lai,’ anna ti.

³¹Churuangah ka mi tla chu na thusim ngâi ding hen anna pûm le, sikhawmsele ti ding hen na simh na mi chu an ti lêm lo. Na thusim chu la salam hâwi an ruat le, an duhleinâk chu a mahmun nget.

³²Annih sinah chun lawmhnâk la leh ṭingṭang tum mi khawm na tluk lo. Na thu zawzawng chu an ngâi le, sikhawmsele pakhat khawm an zûl lo.

³³Sikhawmsele na thusim zawzawng a dik tak hen a hawng tlung tik chun annih khawm an dik bâk lai le, chu tikah an lakah khuavâng a um ti an theih lai,” a ti.