Read Bawm Chin EZEKIEL 34 Bible Online

EZEKIEL 34 - Bawm Chin bible

EZEKIEL 34

¹LALPA nih ka sinah thu a sim. “Thikho mi minung, Israel lâirêltu tla chu sâwi na. Thu simhkan na le, kei, LALPA Zahkâi nih an sinah thu ka sim mi hi simh na:

²Nannih Israel dawrâ vêngtu tla, nan vânduai rawh! Nanmah kawngkâ cho nan ruat le, sikhawmsele dawrâ nan zauhkhenh lo.

³A nûk hâng nan din le, a mul hen puan nan siam mi nanna aih, a ṭha chem mi tla nan thah le nan ei. Sikhawmsele dawrâ tla chu nan zauhkhenh dah lo.

⁴A chak lo mi khawm nan bulsân lo, a damlo mi khawm nan damh na lo, â liam mi tla khawm nan tuam piak lo, a vâi mi khawm nan va dawng na lo, a tlâu mi khawm nan hâwl na lo. Chu ngâk hen nan nehsawh na.

⁵Dawrâ tla nih vêngtu an nei lo ruangah anna rekrâwi ver le, ramsa tla nih an thah na le, an ei na.

⁶Churuangah ka dawrâ tla chu tlâng sâng leh mual tla ah an vâi rawh. Laikulh zawzawng ah anna rekrâwi le, âukhawm nih an zauhkhenh hen hâwl ding an tum lo.

⁷“Tuah, nannih dawrâpu tla, kei, LALPA nih ka nan simh na mi hi ngâi u.

⁸Kei, Pathian nung ka si sung zawng chun ṭhadektê hen ka thu nan ngâi ding asi. Dawrâ vêngtu âukhawm a um lo ruangah ka dawrâ chu ramsa nih an thah na le, an ei na. Ka dawrâpu tla nih dawrâ tla chu hâwl ding an awt lo. Anmah kawngkâ cho anna ruat le, dawrâ rerêng an âwva lo.

⁹Churuangah nannih dawrâpu tla, ka thu ngâi u.

¹⁰Kei, LALPA Zahkâi hi nan mêlma ka si ti ka phuang. Nan lakah ka dawrâ chu ka lâk ving lai le, anmah vêngtu nan si lai lo rawh; mah kawngkâ cho ruattu khawm ka nan sitir na awt lo rawh. Nan lakah mi ka dawrâ chu ruang ka suah na lai le, ka nan eitir na awt lo rawh.

¹¹“Dawrâpu nih a dawrâ tla anna rekrâwi mi a pumh nawlh na le, a zauhkhenh na mi hâwi hen,

¹²kei, LALPA Zahkâi, keimah ngelchel nih ka dawrâ chu ka zauhkhenh awt ti ka nan simh na asi. Vânduainâk ni ah anna rekrâwinâk mun zawzawng mûi lakah mi chu ka lâk nawlh na lai.

¹³Ramdang ah mi tla chu ka suakpi na lai le, munkhat ah ka pumh na lai le, an ram ah ka kîrpi nawlh na lai. Tlâng sâng takah leh Israel ram tinungva ah ka kalpi nawlh na lai le, ram nah ningno nâk mun nuam tak ah râwl ka tlattir na lai.

¹⁴Tlâng sâng belh ningno nâk mun leh tivakuam tla Israel ram ah belh ningno ring dul nâk mun zawzawng ah ka tlawngtir na awt.

¹⁵Keimah tak chu ka dawrâ vêngtu ka si lai le, dinhnâk mun ka hâwl piak na lai. Kei, LALPA Zahkâi nih ka sim asi.

¹⁶“A tlâu mi tla chu ka hâwl na lai le, a vâi mi tla chu ka va khawk na lai, a liam mi tla chu ka tuam piak na lai, a damlo mi chu ka damh lai le; sikhawmsele kei chu dawrâpu thil dik titu ka si ruangah a bit mi leh a chak mi tla ka veih na awt.

¹⁷“Tuah ka ranrual tla, kei, LALPA Zahkâi nih nan lâi ka rêl lai le, a sia mi lakah a ṭha mi kêl lakah mi dawrâ ka thlei awt ti ka nan simh na.

¹⁸Nan lakah a zeimaw mi tla chu belh no ei chim ti an nei lo, nan ei lo mi khawm nan chîl salam ver! Tî fîm nan din le, nan din lo mi chu nan nawih ver!

¹⁹Ka dawrâ dang tla nih chun nan lamhbêk mi belh tla ei hen, nan nawih mi tî tla din ding a suak rawh.

²⁰“Churuangah tuah kei, LALPA Zahkâi nih dawrâ chak leh chaklo lakah lâi ka rêl awt ti ka nan simh na asi.

²¹A nganfâk mi chu khatlei kângah nan eng le, a rual lakah mi chu nan tul ving.

²²Sikhawmsele ka dawrâ tla chu ruang ka suah na lai le, nehsawh ding hen ka siam na lai lo rawh. Ka dawrâ tla chu an lâi ka rêl chiau na lai le, a sia mi lakah a ṭha mi chu ka thlei na awt.

²³Ka to-âw David hâwi mi lalchem an dawrâpu rangah pakhat ka pêk na lai le, amah nih a zauhkhenh na lai.

²⁴Kei, LALPA chu an Pathian ka si lai le, David hâwi mi lalchem chu an lâirêltu asi lai. Keimah nih ka sim mi asi.

²⁵An sinah an himnâk ding hen thudântuk ka siam awt. Ram lakah ramsa ṭihnungkâi ka ṭhiau phin na lai le, churawhchun ka dawrâ tla chu phâisen ah him tak hen an um lai le, tumun tla ah an bawk lai.

²⁶“Mal ka sâwm na lai le, ka tlâng thenhlimh kiangkam ah ka umtir na lai. Chunah chun fâng chî tuhtu nih an herh liauah malsâwmnâk ruah ka sûrtir lai.

²⁷Thing tla nih rah an suah lai le, phâisen tla nih thlâi tla a suah lai, mah ram chiauah mikip him tak hen an um lai rawh. Ka mi tla sal ah siamtu tla lakah mi an rêngkhimh ka sah piak na hen ka suah na tikah chun kei, LALPA ka si ti an theih lai rawh.

²⁸Lunglo phun tla nih an rûn lai lo rawh le, ramsa tla khawm nih an thah hen an ei na lai lo rawh. Him tak hen an um lai le, âukhawm nih an lauh na lai lo rawh.

²⁹Phâisen ningno ṭha tak ka pêk na lai le, ram lakah sungvângnâk ka rehtir lai rawh. Phundang tla nih an nihsanh na lai lo rawh.

³⁰Mikip nih Israel tla chu keimah nih ka vêng na mi leh ka mi tla an si ti an theih lai rawh. Kei, LALPA Zahkâi nih ka sim asi.

³¹“Nannih chu ka dawrâ tla, ka châwm mi dawrâ rual, ka minung tla nan si le, kei lam chu nan Pathian ka si,” LALPA Zahkâi nih a ti.