Read Bawm Chin EZEKIEL 35 Bible Online

EZEKIEL 35 - Bawm Chin bible

EZEKIEL 35

¹LALPA nih ka sinah thu a sim.

²“Thikho mi minung, Edom ram sâwi rawh.

³Kei, LALPA Zahkâi nih ka sim mi thu hi zapi tla simh na: Edom tlâng sâng tla, na mêlma chu keimah hi ka si! Siat leh râwk dep hen ka nan siam awt.

⁴Na khuapi tla ka râwk ver lai le, Na ram chu a karo hen ka siah awt; Chu tikah kei, LALPA ka si ti na theih lai.

⁵“Nang chu Israel mêlma na si kumza le, a vânduai liauah leh a sual ruangah rêpnâk madungchem liauah a mi tla thahtirtu na si.

⁶Churuang chun, kei, LALPA Zahkâi, Pathian nung ka si sung zawng chun thihnâk chu na vânduainâk asi le, âwl kho na si lo. Na mi thah ruangah na mawh le, thahnâk nih a nan zûl lai.

⁷Edom tlâng ram chu a karo hen ka siam lai le, chu lakah mi velvâ tla chu thah an si lai.

⁸Tlâng sâng tla chu ruak hen ka khattir lai le, râltuknâk ah thah hen an um mi ruak tla chu tlâng leh tivakuam a khat lai.

⁹Zeiliau zawngah a karo hen kan umtir pawt lai le, na khuapi ah mi âukhawm an um lai lo rawh. Chu tikah kei LALPA ka si ti na theih lai.

¹⁰“Juda leh Israel phun nih tla chu an ram hen na tâ ah ting ding hen na ruat le, sikhawmsele kei, LALPA chu an Pathian ka si.

¹¹Churuangah kei, LALPA Zahkâi Pathian nung ka si sung zawng chu ka mi tla lakah na thinrunnâk leh na nahsuahnâk, leh na hua na mi lehrûl ka nan sam awt. An lakah na ti na mi ruangah ka nan rêp mi na si ti an theih lai rawh.

¹²Churawhchun, Israel tlâng tla chu a karo hen a um le, anmah veih ding hen nangmah tâ si rawh hen na sim mi chu kei LALPA nih ka theih ti na theih lai rawh.

¹³Ka tlûnah siarlo tak hen na khâwng zia tla ka theih,” a ti.

¹⁴LALPA Zahkâi nih, “Ka tâ Israel mi tla siat leh râwknâk lakah na lâwm mi hâwitê hen,

¹⁵a karo hen ka nan siam lai le, niamh hen na um mi lakah laikulh pumpi anna lâwm lai. Asi, Seir tlâng sâng tla Edom ram zawzawng a karo hen an um lai. Churawhchun mikip nih LALPA ka si ti an theih lai rawh,” a ti.