Read Bawm Chin EZEKIEL 36 Bible Online

EZEKIEL 36 - Bawm Chin bible

EZEKIEL 36

¹LALPA nih, “Thikho mi minung, Israel tlâng sâng tla sinah thu sim le,

²kei, LALPA Zahkâi nih an rangah thuchah ka nei mi chu ngâi ding hen simh na: Israel mêlma tla nih diriamh hen, Tuah chun a lânah tlâng tla chu kan tâ si rawh!’ an ti.

³“Thu simkan le, kei, LALPA nih ka sim mi thu hi phuang rawh. A kiangkam ah mi phun tla nih an lâk hen Israel tlâng tla an rûn liauah an ektê hen Israel chu an zauhnawmh.

⁴Churuangah kei, LALPA Zahkâi nih, tlâng sâng tla leh tlâng tênâu tla sinah tivatê leh tivakuam tla sinah, mun tla râwk hen kaltâk rawh mi leh khuapi an rûn le a karo hen mâk rawh mi, a kiangkam ah phun tla zawzawng nih an nihsanh mi sinah thu ka sim mi chu tuah ngâi u.

⁵“Kei, LALPA Zahkâi nih, ka thinthawknâk hen a kiangkam mi phun tla leh a bîk hen Edom kalh hen thu ka sim asi. Lâwm leh siarlo tak hen ka ram tla an lâk le, ram ningno tla anna ting.

⁶“Churuangah kei, LALPA Zahkâi nih phun tla nih zauhnawmh hen an nâuneh na mi ruangah ka thîknâk thinthawknâk thusim chu Israel ram tlâng sâng tla, tlâng tênâu tla, tivatê tla leh tivakuam tla sinah thu chu simh na.

⁷A kiangkam ah mi phun tla chu nâutir hen an um lai ti hen, kei, LALPA Zahkâi nih bir tak hen thu ka tiamh asi.

⁸Sikhawmsele, Israel tlâng sâng tla tlûnah thing tla chu a nah a chawrh lai le, ka mi Israel rangah rah an suah lai. Tam sâwtlo hen in leiah nan hawng tlung lai rawh.

⁹Nanmah lei ṭângṭawm mi ka si, nan ram phâisen tla chu nâwn nawlh asi lai le, chunah chun thlâi chî vawrh asi nawlh lai.

¹⁰Nan minung khawm ka pungtir lai. Chu khuapi tla ah chun nan um lai le, thil zeizawng a râwk rawh mi chu nan dirh nawlh lai.

¹¹Minung leh ran tla tamtak ka zantir lai. A lânah mi ngâk hen nan tam lai le, te leh fa tamtak nan nei lai. Um ding nan tum mi hâwi hen chunah ka nan umtir na lai le, a lân ngâk hen sul-le-lam tluang dauh hen kan siam na lai. Churawhchun LALPA ka si ti nan theih lai rawh.

¹²Nannih ka mi Israel tla, ram lakah um nawlh ding hen ka nan kîrpi na lai. Nan ram asi lai rawh le, nan fa le chu sungvâng hen an um lai lo rawh.

¹³“Kei, LALPA Zahkâi nih, minung eitu ram leh phun lakah mi fa tla râwktu asi an ti mi chu a dik asi ti ka sim asi.

¹⁴Sikhawmsele tu thawk chun mi eitu leh nan fa tla râwktu an si lai lo rawh. Kei, LALPA Zahkâi nih ka sim asi.

¹⁵Ram nih chun phun tla nih an zauhnawmhnâk chu a theih lai lo rawh le, a nihsanhtu tla khawm a muh lai lo rawh. Ram nih phun fa tla chu a râwk lai lo rawh. Kei, LALPA Zahkâi nih ka sim asi,” a ti.

¹⁶LALPA nih ka sinah thu a sim.

¹⁷“Thikho mi minung, Israel mi tla an ram ah an um liauah an umdân leh an thilti nih ram an nawmh. An umdân chu nunau nih thlasiar hen an nunau râitâ an nei liau mi hâwi hen thianglo hen ka ngaih.

¹⁸Ram lakah mi an thah na mi ruangah leh milem hen ram an nawmh mi ruangah ka thinthawknâk fâk tak ka tawngtir na.

¹⁹An umdân leh an thilti lakah ka mawhtir le, ramdang minung ram ah ka rekrâwitir na.

²⁰An va kalnâk kipah mi tla nih, ‘Hi minung tla nih hin an Pathian nih a pêk na mi ram an kaltâk’ an ti na ruangah ka min thenhlimh an mualphoh.

²¹Israel tla nih an kalnâk kipah ka min thenhlimh an mualphotir ruangah ka lung an fâktir.

²²“Tuah Kei, LALPA Zahkâi nih Israel tla rangah thuchah ka nei mi hi va simh na: Hi thil ka ti awt mi hi nannih Israel tla ruangah asi lo le, nan kalnâk ram kipah ka min thenhlimh nan mualphoh mi ruangah ka ti awt mi asi.

²³An lakah nan mualphoh mi ka min thenhlimh rokual, phun tla sinah ka langhtir tikah chun Kei, LALPA ka si ti an theih lai rawh. Kei, LALPA Zahkâi nih ka sim asi. Ka min thenhlimh zia phun tla rangah muhtirtu ah ka nan mang na awt.

²⁴Phunkip leh ram kipah mi chu nan ram ah ka nan kîrtir nawlh na lai.

²⁵Tî thiang ka nan theh na lai le, nan milem zawzawng leh thil dang a nan nawmhtir natu zawzawng lakah mi ka nan thiangtir na awt.

²⁶Thinlung thar leh dawnruatnâk thar ka nan pêk na lai. Lung hâwi mi nan thinlung ê-aw ngâilonâk chu ka lâk ving lai le, ê-aw ngâinâk thinlung ka nan pêk na lai.

²⁷Ka thlarau nan lakah ka siah lai le, ka thupêk kan pêk na mi zawzawng leh ka dân nan zûl mi tla ka nan muh na lai rawh.

²⁸Chu tikah nan thlâktu tla ka pêk na mi ram ah nan um lai rawh. Nannih chu ka mi le nan si lai le, kei, nan Pathian ka si lai rawh.

²⁹An nawmh natu thil zeizawng lakah mi ka nan hum na lai. Fâng tla chu tamtak rah ding hen thu ka pêk lai le, pâm rerêng nan theih lai lo rawh.

³⁰Nan thing thei tla ka rahtir lai le, nan phâisen tla fâng ka tlingtir lai le, phun tla lakah an mualphoh na ding hen pâmnâk rêng a um lai lo rawh.

³¹Nan umdân sual leh thil diklo nan ti mi nan theihkumza lai le, chubang nan sualnâk leh nan thilti diklonâk ruangah nanmah nanna fih lai rawh.

³²Israel, hi bang zawzawng ka ti mi hi nanmah zârah ka ti mi asi lo ti nan theih ding ka duh. Nan thilti lakah ningzak leh mualpho kâi zia nan theih ding hen kan duh na. Kei, LALPA Zahkâi nih ka sim asi,” a ti.

³³LALPA Zahkâi nih, “Nan sualnâk kan thiangtir ver na tik chun nan khuapi ah kan umtir nawlh na lai le, a râwk mi tla chu kan remhtir nawlh na lai.

³⁴Mikip nih phâisen nan va pal mi tla bua leh mâng hâwi hen nan muh mi tla chu ka nan nâwntir nawlh na lai.

³⁵Mikip nih, hi ram hi veikhat chu ramkaro asi rawh mi, Eden dum hâwi asi ving rawh; khuapi tla khawm an siat hen an râwk le, râwk dep hen an siah rawh mi, tu chun an luah nawlh le, kulhnei hen an siam hep rawh an ti lai.

³⁶Chu tikah an kiangkam ah phun tla thibang tla nih, kei, LALPA nih khuapi râwk chia ka dirh nawlh mi leh phâisen râwk rawh mi ka phun nawlh mi asi ti an theih lai rawh. Kei, LALPA nih hi hi ti ding hen thu ka tiamh mi chu ka ti lai,” a ti.

³⁷LALPA Zahkâi nih, “Israel mi tla nih ṭangpi an hawng ka ngiar nawlh lai le, kei nih dawrâ rual hâwi hen ka zantir nawlh na lai.

³⁸Tuah khuapi râwk dep hen um mi tla chu Jerusalem ah kût ni ah bâwlnâk ah ap ding mi dawrâ rual a khat zat hâwi hen mi zapi tla an khat zat lai. Churawhchun kei, LALPA ka si ti an theih lai,” a ti.