Read Bawm Chin EZEKIEL 37 Bible Online

EZEKIEL 37 - Bawm Chin bible

EZEKIEL 37

¹LALPA umpinâk thiltikho tak ka theih le, a thlarau nih hawng ka kalpi le, tivakuam ah ruh karo umnâk mun ah hawng ka siah.

²Chu tivakuam ah chun hawng ka kalpi le, ruh tamtak ka muh le, a châr mi ver an si.

³Ka sinah, “Thikho mi minung, hi bang ruh tla hi a hawng nung nawlh kho lai ma?” a ti. Kei nih ka sâng le, “LALPA Zahkâi, nangmah cho nih na sâng kho!” ka ti.

⁴Anih nih, “Ruh tla sinah thu sim rawh. Hi bang tla hi LALPA thu ngâi ding hen simh na.

⁵Kei, LALPA Zahkâi nih an sinah thu ka sim mi hi simh na: Nan lakah thaw ka khumh lai le, ka nan nungtir nawlh na lai.

⁶Mehtît leh thari ka nan pêk na lai le, vun hen ka nan khuh na lai. Nan sungah thaw ka khumh lai le, ka nan nungtir nawlh na lai. Churawhchun kei, LALPA ka si ti nan theih lai,” a ti.

⁷Simh ka si hâwi hen thu chu ka sim rawh. Thu ka sim liau takah rihâu ka theih le, ruh tla chu anna peh rang.

⁸Ka zauh ko liauah ruh tla chu tîttak leh thari nih a tuam le, vun nih a khuh. Sikhawmsele taksa sungah thaw a um lo.

⁹Pathian nih ka sinah, “Thikho mi minung, thli sinah thu sim. Munkip ah mi thli chu LALPA thupêk hen hawng hen hi bang mithi tla sungah thaw khumh ding leh nungtir nawlh na ding hen simh,” a ti.

¹⁰Simh ka si hâwi hen thu chu ka sim rawh. Thaw chu taksa ah a hawng lût le, an hawng nung nawlh le an dîr. Kawrsen rualpi an si rawh.

¹¹Pathian nih ka sinah, “Thikho mi minung, Israel tla chu hi ruh karo hâwi an si. Mâilei ah lungumnâk zeikhawm umlo hen kan châr fêk rawh an ti.

¹²Churuangah ka mi Israel tla chu kei, LALPA Zahkâi nih an thlân ka awng piak na awt ti simh na. Ka suakpi na lai le, Israel ram ah ka kîrpi nawlh na lai.

¹³Ka mi tla vûi hen thlân ka awng hen ka suah na tikah chun, LALPA ka si ti an theih lai rawh.

¹⁴An lakah ka thaw ka khumh lai le, ka nungtir nawlh na lai le, an ram ah ka umtir nawlh na lai. Chu tikah LALPA ka si ti an theih lai rawh. Hi hi ti ding hen thu ka tiamh mi hi ka ti awt asi. Kei, LALPA nih ka sim asi,” a ti.

¹⁵LALPA nih ka sinah thu a sim nawlh.

¹⁶“Thikho mi minung, thing ṭhianṭhunh lâk le, chu lak chun thu rîn le, ‘Juda lalram, ti hen. Churawhchun ṭhianṭhunh dang lâk fâwn le, chu lakah thu rîn le, ‘Israel lalram, ti hen.

¹⁷Chu ṭhianṭhunh panih chu tawnh le, na kut hen tleih, ṭhianṭhunh pakhat hâwi hen lang ding hen.

¹⁸Na mi tla nih, zei tinâk me si ti hen an deih hen chun,

¹⁹kei, LALPA Zahkâi nih, Israel ruangrûl mi ṭhianṭhunh chu Juda ruangrûl mi ṭhianṭhunh hen pakhat ah ka siam na awt tinâk asi ti simh na. Ṭhianṭhunh panih chu pakhat ah ka siam lai le, ka kut hen ka tleih awt.

²⁰“A panih hen na kut hen tleih le, zapi minung zauhtir na.

²¹Churawhchun, kei, LALPA Zahkâi nih an va umnâk phun tla lakah mi ka mi zawzawng chu ka lâk na lai le, ka pumh na lai le, anmah ram takah ka kîrpi nawlh na lai.

²²Israel ram tlâng tla ah phun khat ah tlâi dut hen ka siam na awt. Lal pakhat an lakah lâirêltu dingah an nei lai le, phun nih ah ṭhen hen lalram panih ah an um lai lo rawh.

²³Milem fihnungkâi tla hen anna nawmh lai lo rawh le, sualnâk hen anna râwk lai lo rawh. An hawng ka phiarnâk leh an sualnâk zawzawng lakah mi ka lîttir na lai rawh. Ka thiangtir na lai le, ka mi tla an si lai le, kei, an Pathian ka si lai rawh.

²⁴An lalchem chu ka to-aw lalchem David hâwi asi lai. Lâirêltu pakhat tangah an um ver lai le, ka dân tla zumhkâi tak hen an zûl ver lai.

²⁵An thlâktu tla umnâk ram to-aw Jakob sinah ka pêk mi ram ah an um lai. Chunah chun an thlâk tla hen an fa le hen an um kumza lai rawh. Ka to-aw David hâwi mi lalchem nih an tlûnah lâi a rêl kumza lai.

²⁶Anmah him kumzanâk ding thudântuk ka siam lai. Ka birhtir na lai le, ka zantir na lai, an ram ah ka Biakin ka siah lai le, chunah chun a um kumza lai rawh.

²⁷Chunah an sinah ka um lai; an Pathian ka si lai le, annih chu ka mi tla an si lai.

²⁸An lakah ka Biakin um kumza ding hen ka siah tik chun, Israel mi tla chu kei, LALPA nih ka mi rang dingah ka thîm na mi an si ti phun tla nih an theih lai rawh ka ti mi simh na,” a ti.