Read Bawm Chin EZEKIEL 38 Bible Online

EZEKIEL 38 - Bawm Chin bible

EZEKIEL 38

¹LALPA nih ka sinah thu a sim.

²“Thikho mi minung, Magog ramah Mesek leh Tubal phun tla lakah lâirêltu lian Gog chu sâwi rawh.

³Anmah chu sâwi hen kei LALPA Zahkâi hi a mêlma ka si ti simh.

⁴Ka her ving lai le, a khâ lakah siau hen ka banh lai le, amah leh a kawrsen tla siau hen ka nuk ver na lai. A kawrsen leh an rang tla, chuantu tla thuamthil chu thungâi a rokual le, kawrsen kip nih an bân ah phaw leh nâmsâu anna put.

⁵Persia leh Sudan mi leh Libia mi tla khawm a sinah an um le, an ektê hen phaw leh lukhuh an nei hep.

⁶Gomer ram ah râltuktu tla zawzawng leh marlei ah Beth Togarmah mi tla khawm a sinah an um le, chu hâwi hen phun dang tamtak lakah mi khawm an um.

⁷A tîm zet ding leh a kawrsen tla zawzawng a thupêk lakah a tîm ding hen simh.

⁸Kum tamtak nûnah phun tamtak lakah mi munkhat hen kîrtir mi ṭihnâk neilo tla umnâk ram rûn ding hen thu ka pêk awt. Israel tlâng sâng tla sâwt tak a karo hen siah mi leh râwk mi, tuah mi zawzawng him tak hen an umnâk chu a rûn lai.

⁹Anmah leh a kawrsen tla, a sinah phun tamtak um mi tla nih thlipi hâwi hen an do lai le, ram chu sûm hâwi hen an vurh dep lai,” a ti.

¹⁰Hi hi LALPA Zahkâi nih Gog sinah thu a sim mi chu asi: “Chu chu a hawng tlung tikah thilsual leikâng dawn na dawmh lai.

¹¹Ṭangpitu neilo ram thlangam tak leh him tak hen kulh neilo leh vêngtu neilo khuapi ah an um mi tla chu rûn na tum lai.

¹²Veikhat siat leh râwk hen um rawh mi zapi minung umnâk khuapi chu na rûn hen na râwk lai. Phun tamtak lakah mi chu anna pûm le, tu chun ranrual tla, thil-le-rî tla an nei le, laikulh lamṭhuam ah an um.

¹³Seba leh Dedan mi tla leh Spain ram ah khuapi ah mi sawlehtu tla nih, ‘Do hen râwk leh rûn ding hen na kawrsen tla na pumh na rawh ma? Ngûn, tangka, ranrual leh thil tla lâk hen thil-le-rî tla zawzawng kalpi na tum ma? ti hen an deih lai,” a ti.

¹⁴Churawhchun LALPA Zahkâi nih Gog sinah thu a sim mi tla chu va simh ding hen hawng ka fial:

¹⁵“Tuah ka mi Israel tla, thlangam tak hen an um liauah na umnâk marlei ram thawk hen kawrsen tamtak thiltikho tak phun tamtak lakah mi rang tlûnah chuan mi tla put hen an suak lai.

¹⁶Ram kanh dak hen ka mi Israel tla chu thlipi hâwi hen na do na lai. Chu chu a tlung tikah phun tla chu âu ka si ti theih ding leh nangmah mang hen ka thenhlimhnâk muhtir ding hen ka ram rûn ding hen ka nan fial awt.

¹⁷A lân thawk hen Israel lakah mi khuavâng ka to-aw mang hen thu ka sim liauah ni a hawng tlung ding mi lakah chun âumawh Israel do ding hen ka hawng tir lai, ti thu ka ruah mi chu nangmah hi na si,” a ti. LALPA Zahkâi nih a sim asi.

¹⁸LALPA Zahkâi nih, “Gog nih Israel a do tikah ka thin a thawk lai.

¹⁹Chu ni ah chun ka thinthawknâk fâk tak hen Israel ram ah lînîn fâk tak a um lai ti ka phuang asi.

²⁰Nga leh va, ramsa a lian a mê leh tual tlûnah minung tla chu keimah ṭih hen an thir lai. Tlâng sâng tla leh kham tla a chim lai le, kulh zawzawng a chim lai.

²¹Vânduainâk chikip hen Gog chu ka lauh lai. Kei, LALPA Zahkâi nih ka sim asi. A mi tla chu an nâmsâu hen anmah anna thah lai.

²²Râi leh thisen suahnâk hen ka rêp lai. Ruah tukpi leh rial, mei leh kât hen amah leh a kawrsen tla leh amah lei ṭângṭawmtu phun tamtak tlûnah ka sûrtir lai.

²³Hi hâwi hen phun zawzawng tla chu ka rokual zia leh ka thenhlimh zia ka zauhtir na lai. Chu tikah kei LALPA ka si ti an theih lai,” a ti.