Read Bawm Chin EZEKIEL 39 Bible Online

EZEKIEL 39 - Bawm Chin bible

EZEKIEL 39

¹LALPA Zahkâi nih, “Thikho mi minung, Gog, Mesek leh Tubal phun tla lakah lâirêltu lian chu sâwi le, a mêlma ka si mi simh.

²Kâng dang thar leiah ka hertir lai le, marlei kâng lât takah mi chu ka suakpi lai le, Israel tlâng sâng tlung tiang hen ka kalpi awt.

³Churawhchun a kehlei mi a chanhtiang kûk chu tlawng phak hen ka sut lai le, a vawrhlei mi thalzum tla khawm thlah ro hen ka sut lai.

⁴Gog leh a kawrsen leh amah lei ṭângṭawmtu tla chu Israel tlâng sâng tla tlûnah an thi lai le, an ruak chu ramsa tla leh va tla râwl ah ka mang lai.

⁵Phâisen ah an ruak tla chu a rîl phut lai. Kei, LALPA Zahkâi nih ka sim asi.

⁶Magog ram ah meialh ka dawmhtir lai le, nawktir lonâk mun ah um mi zawzawng tla mun tiang hen, mikip nih kei LALPA ka si ti an theih lai rawh.

⁷Ka min thenhlimh chu ka mi Israel tla fiang tak hen ka theihtir na lai le, ka min chu ka mualpho lai lo rawh. Churawhchun phun zawzawng nih, kei, LALPA Israel Pathian thenhlimh ka si ti an theih lai rawh,” a ti.

⁸LALPA Zahkâi nih, “Ni a hawng tlung ding mi thu ka sim mi chu tlung ding hen a fiang rawh.

⁹Israel khuapi ah um mi tla nih chun an suak lai le, râlthuam an mâk mi tla chu tih dingah an khawmh lai. Phaw tla, chanhtiang tla, thalzum tla, fei tla, minung tawngpumhnâk in tla chu mei tihnâk ah an mang lai le, kum sarih tiang an tih lai.

¹⁰Râlthuam an mâk mi tih ding an nei ruangah phâisen ah tih ding thing an khawmh lai lo le, tumun ah mi thing khawm an hâu lai lo. Anmah râwktu leh rûntu tla chu an râwk hen an rûn bâk na lai,” a ti. LALPA Zahkâi nih a sim asi.

¹¹LALPA nih, “Hi bang zawzawng tla a hawng tlung tikah Gog chu Israel ram ah vûinâk mun, ‘Khualtlâwng tla Tivakuam’ Tipi Thi saklei ah ka pêk lai. Churawhchun Gog leh a kawrsen zawzawng an vûi na lai le, chu vakuam chu “Hamon-gog’’ (Gog kawrsen tla Vakuam) ti asi lai.

¹²Chubang ruak zawzawng tla vûi hen a ram thiangtir ding hen Israel tla chu thla sarih anna tâwk lai.

¹³Ram lakah mikip nih vûi ding hen an bawmh na lai le, hi ruangah hin ka nehnâk ni ah chun zah hen an um lai. Kei, LALPA Zahkâi nih ka sim asi.

¹⁴Thla sarih a tling nûnah chun ram ṭawltu ding mi an thîm lai le, mithi ruak tual tlûnah vûi lo mi tla an hâwl na lai, ram tla chu thiang ver hen an siam khonâk ding hen.

¹⁵Ram chu tlûnlei tanglei ah an va kal lai le, minung ruak an muh mi kipah singsiahnâk an siam lai, thlân chawhtu an hawng hen Gog kawrsen tla Vakuam ah an vûi khonâk ding hen.

¹⁶(Kawrsen min put hen a kiangah khua a um lai.) Chu hâwi hen ram chu a thiang nawlh lai rawh,” a ti.

¹⁷LALPA Zahkâi nih ka sinah, “Thikho mi minung, bâwlnâk an rangah ka timhtuah mi ei ding hen va zawzawng leh ramsa tla a kiangkam ah mi hawng ding hen kawh na. Israel tlâng tlûnah sa an einâk leh thisen an dinnâk puai rokual tak asi lai.

¹⁸Kawrsen tla ruak an ei lai le, tual ah lâirêltu tla thisen an din lai, chubang zawzawng chu dawrâ chal leh dawrâ fa, kêl tla leh chawchal bit mi hâwi hen thah an si lai.

¹⁹Chubang zawzawng bâwlnâk hâwi hen ka thah tik chun vâ leh sa tla nih khim tak hen an ei lai le, thisen tla chu rî rê hen an din lai.

²⁰Ka dawhkân ah rang leh a tlûnah totu tla chu an chelh rî hen an ei na lai rawh. Kei Lalpa Zahkâi nih ka sim asi,’’ a ti.

²¹LALPA nih, “Phun tla chu ka rokualnâk ka muhtir na hen ka thuthlûk dik mang ding hen ka thiltikhonâk ka mang zia ka zauhtir na lai.

²²Israel tla nih chu thawk chun kei LALPA an Pathian ka si mi an theih vima lai rawh.

²³Phun tla nih Israel mi tla sal ah an tâng mi chu ka lakah thilsual an ti ruangah sal ah an tâng mi asi ti an theih lai rawh. Ka hertâk na le, an mêlma tla chu râltuknâk ah anmah nehtu leh thahtu ah ka siam na.

²⁴Anmah thenhlimh lonâk leh sualnâk hâwi vima hen an tlûnah ka ti na le, ka hertâk na,” a ti.

²⁵LALPA Zahkâi nih, “Sikhawmsele, tu lam chun Jakob thlâk Israel mi tla tlûnah khua ka ruat lai le, sul-le-lam tluang tak hen ka siam na lai. Ka min thenhlimh chu ka hum lai rawh.

²⁶An ram ah him tak hen an um liauah, âukhawm nih nehsawh an si lo liauah kei an ka phiar ruangah ningzak saih hen an um mi khawm an philh kho lai rawh.

²⁷Phun tamtak tla chu ka thenhlimh zia theihtir na ding hen ka mi tla an mêlma tla ram ah an um mi chu ka kîrpi nawlh na lai.

²⁸Churawhchun ka mi tla nih kei an Pathian ka si ti an theih lai rawh. Sal ah ka kaltir na hen tuah pakhat khawm relhlo hen an ram ah ka pumh nawlh na ruangah hi hi an theih lai.

²⁹Ka mi Israel tla tlûnah ka thlarau ka tawih lai le, anmah tla ka kaltâk na lai lo rawh. Kei, LALPA Zahkâi nih ka sim asi,” a ti.