Read Bawm Chin EZEKIEL 4 Bible Online

EZEKIEL 4 - Bawm Chin bible

EZEKIEL 4

¹Pathian nih, “Thikho mi minung, tual rawh tlang lâk le, na mâika ah siah le, a tlûnah Jerusalem khuapi lem rîn rawh.

²An hual mi zauhtirnâk ding hen khur chawh le, tual chawh tla, kawrsen mun tla kulh râwknâk hêl dak hen siam.

³Thîr khêng lâk le, chu khuapi lem leh nangmah karah vâm hâwi hen sawng rawh. Khuapi lei hawih hen siah. Hual hen a um le, a hualtu chu nangmah na si. Hi hi Israel phun rangah singsiahnâk ding asi lai.

⁴“Na kehlei sîr hen it le, na tlûnah Israel phun sualnâk ka siah lai. Chunah chun ni zathum leh sâwmkua na um lai le, anmah sual ruangah na tuar lai. Kum khat rûlah ni khat vima hen anmah rêpnâk ding lîm ko hen nangmah ka nan rêp awt.

⁶Chu chu na lîm rawh chun na vawrhlei kâng denh hen a her le, Juda tla sualnâk ruangah rêpnâk chu kum khat rûlah ni khat vima hen ni sâwmli na tuar lai.

⁷“Jerusalem hual mi zauh set. Khuapi tlûnah na kut tum lek le, khuapi um ding mi thu simkan rawh.

⁸An hual mi a lîm lân lo chu khatlei khatlei na her kholonâk ding hen kan phuar pang awt.

⁹“Tuah wheat, barley, bâilep, betê, leh fatun lâk. A ektê hen chawmh le, sang ah siam. Chu chu na kehlei sîr hen ni zathum leh sâwmkua na it kar zawngah na ei ding asi.

¹⁰Nikhat sang na ei tâwk ding chu gram 230 ding asi lai le, chu chu a thâituan tiang ding mi asi.

¹¹Tî din ding zat khawm ni khat ah hâi nih ruat asi.

¹²Minung êk châr hen mei na tih lai le, chu lakah sang chu na em lai le, mikip muhnâk ah ei rawh,” a ti.

¹³LALPA nih, “Hi nih hin Israel mi tla ramdang ah ka rekrâwitir na tikah dân nih a khap mi buh an ei ding mi zauhtirnâk asi,” a ti.

¹⁴Sikhawmsele, kei nih ka sâng le, “LALPA Zahkâi, silo! Zeiliau khawm ka nâwmtir dah lo. Ka mêttê thawk hen ran amah lung hen a thi mi leh ramsa nih a seh mi sa ka ei dah lo. Thianglo hen ngaih mi buh khawm ka ei dah lo,” ka ti.

¹⁵Churawhchun, Pathian nih, “A ṭha ta a. Chu ruangrûl ah chaw êk mang le, chu lakah na sang chu na em kho lai,” a ti.

¹⁶Chun, a sim vima le, “Thikho mi minung, Jerusalem ei ding mi tî-le-râwl, ka sah awt. An buh ei ding leh an tî din ding mi an tah ruangah chunah mi tla chu lawksawng hen an ngaihsia lai.

¹⁷Buh leh tî an sam lai le; thinlung dawng tak hen an um lai le, an sual ruangah an tlâu ver lai,” a ti.