Read Bawm Chin EZEKIEL 40 Bible Online

EZEKIEL 40 - Bawm Chin bible

EZEKIEL 40

¹Kum thar ni rânâk asi rawh, chu chu sal ah kan tâng mi kum kul leh kum nganâk leh Jerusalem an lâk mi kum leilinâk asi. Chu ni ah chun LALPA umpinâk thiltikho tak ka theih le, a ka put ving.

²Muhtirnâk ah chun Pathian nih Israel ram ah hawng ka put ving le, tlâng sâng tlûnah hawng ka siah. Ka mâika ah khuapi hâwi hen in sak dul mi ka muh.

³Nâi dauh ah hawng ka kalpi le, minung pakhat tlâr hâwi hen a tlêu mi ka muh. Chu nih chun tahnâk puannêm rî leh tahnâk fung a put le, kawtkâ lâi chirah a dîr.

⁴Anih nih chun ka sinah, “Thikho mi minung, ngâk rih. Thil zeizawng ka nan muhtir ding mi chu nâi dauh hen thiamthih tak hen ngâi, hi ruangah hinah put hen na um mi asi. Thil zeizawng na muh mi chu Israel mi tla na simh na ding asi,” a ti.

⁵Ka muh mi chu Biakin asi le, hêl dak hen kulh asi. Chu minung nih chun a tahnâk fung feet 10 sâu mi chu a lâk le, kulh chu a tah rawh. A sânglei feet 10 a sah lei feet 10 asi.

⁶Churawhchun saklei kângah a hawi mi kawtkâ leiah a kal rawh. Kâibak lakah a kâi le, a tlûnah mi tualmâi a tah le; feet 10 hen a niam.

⁷Chu pîn leiah chun latnâk a um le, chu nih chun a sîr chiauah vêngnâk kardang pathum a nei asi. A kardang chu kil li nei hep asi le, a sîr tla chu feet 10 chiau asi le, an kar lakah mi vâm chu a sah lei feet 8 asi. Chu vêngnâk kardang pînlei chun latnâk a um le, Biakin leikângah hawi hen um mi kardang kâu tak latnâk feet 10 sâu mi chu a um.

⁸Chu kardang chu a tah le, feet 14 hen a niam hen a theih. Kawtkâ dawng ah Biakin naih chem ah um mi asi le, kulh dawnghnâk a lât chemnâk feet 3 sahnâk ram ah mi asi.

⁹

¹⁰(Chubang vêngnâk kardang tla an sîr kipah latnâk chu â tia hep le, an kar lakah mi vâm tla khawm a sah dân â bang hep.)

¹¹Chu nûn chun, chu minung nih kawtkâ leiah latnâk kauh dân a tah. A ektê hen feet 22 asi, kawtkâ â awng mi tla kar chu feet 16 asi.

¹²Vêngnâk kardang mâika kipah kulh a niam mi a um le, a sâng lei inchi 20, a sahlei inch 20 asi. (Chu kardang tla chu kil li hen feet 10 asi.)

¹³Churawhchun kardang pakhat kulh lênglei thawk a tah hen latnâk kardang anna lat dân chu feet 42 asi.

¹⁴A kardang lât chem dawnghnâk thawk hen kulh suaknâk tiang asi. Chu kardang chu a tah le feet 34 kâu hen a theih.

¹⁵Kulh lênglei mi kawtkâ thawk hen kulh dawngnâk a sîr lât tak nâk tiang chu a kawtkâ dung zawzawng fawnh hep hen feet 84 asi.

¹⁶Kardang zawzawng ah chun kulh lênglei suaknâk bîtê a um ver le, a sunglei ah kardang leh kardang karah mi vâm lak khawmah a um ber. Latnâk leikâng hawi hen a sungah mi vâm lakah tûm thing lem tla a um.

¹⁷Chu minung nih kawtkâ ah hawng ka lanpi le, kulh sungah hawng ka kalpi. Chunah chun lênglei mi kulh lakah in kardang sâwmthum a um le, an tualmâi chu lung hen phah mi asi le,

¹⁸a kulh kiangkam a luah ver. Chu lênglei mi kulh chu sunglei mi kulh ngâk hen a niam dauh.

¹⁹Sunglei mi kulh kalnâk chu a sângnâk ah mi hen chan cho hen kawtkâ a um. Chu minung nih kawtkâ panih kar lât dân a tah le, feet 168 asi.

²⁰Churawhchun chu minung nih chun marlei kâng a mi lênglei kulh kalnâk kawtkâ chu a tah.

²¹Latnâk sîr kipah vêngnâk kardang pathum a um le, an kar lakah mi vâm tla chu saklei mi kawtkâ tla bang cho hen kardang kâu an nei ver. Kawtkâ dung chu fawnh hep hen feet 84 asi le, a kauh lei chu feet 42 asi.

²²Kardang kâu, langawtkawt tla leh tûm thing lem siam mi tla chu saklei mi kawtkâ hen â bang. Chunah chun kulh kawtkâ leiah kâinâk chu bak sarih asi le, kardang kâu nih kulh dawnghnâk lei a hawih.

²³Saklei kâng sîrah a um mi hâwi hen marlei a mi kawtkâ thawk hen kulh kawtkâ tan phak hen kawtkâ dang sunglei ah kalnâk kawtkâ a um. Chu minung nih kulh kawtkâ panih kar lât dân chu a tah le, feet 168 asi.

²⁴Churawhchun chu minung nih simlei kângah hawng ka kalpi le, chunah chun kawtkâ dang kan muh. Chu chu a tah le, a dang tla hen â bang ver.

²⁵Hi kawtkâ khawm a dang hâwi ber hen kardang ah langawtkawt tla a um. Kawtkâ dung chu fawnh ver hen feet 84 asi, a kauh lei chu feet 42 asi.

²⁶A kâinâk chu bak sarih asi, a kardang kâu tak khawm kulh leikâng hawinâk dawng ah a um. A vâm lakah chun latnâk lei hawi hen tûm thing lem a um.

²⁷Hin khawmah a sunglei mi kulh lei kalnâk kawtkâ a um ber. Chu minung nih a kawtkâ panihnâk hen anna lât dân chu a tah le, feet 168 asi.

²⁸Chu minung nih simlei kawtkâ ah lan hen, a sunglei kulh ah a hawng ka kalpi. Chu kawtkâ chu a tah le, lênglei mi kulh kawtkâ hen â tia.

²⁹Vêngnâk in tla, kardang lian tla, leh a sungah kulh tla chu kawtkâ dang tla hen â tia hep. Hi kawtkâ ah mi kardang tla lak khawmah langawtkawt tla a um bâk. A dung leikâng fawnh ver hen feet 84, a kauh lei chu feet 42 asi.

³⁰

³¹A kardang kâu tak chu kulh dang lei a hawi le, latnâk lei mi vâm lakah tûm thing lem a um. Chu kulh kawtkâ kâinâk chu bak riat asi.

³²Chu minung nih chun saklei mi kawtkâ ah lan hen sunglei mi kulh sungah a hawng ka kalpi. Kulh kawtkâ chu a tah le, a dang hen â tia ver.

³³A vêngnâk kardang tla, a kardang kâu tla, a sungah mi vâm tla chu kulh kawtkâ dang tla tah dân hen â bang. Hêl dak hen langawtkawt tla a um le, kardang kâu tla lak khawmah a um. A dung leikâng fawnh ver hen feet 84 asi le, a kauh leikâng feet 42 asi.

³⁴Kardang kâu chu lênglei mi kulh a hawih. Latnâk leikângah mi vâm chu tûm thing lem â rîn hep. Chu kulh kawtkâ kâinâk chu bak riat asi.

³⁵Chu minung nih chun marlei kawtkâ ah a hawng ka kalpi. A tah le, a dang tla hen â bang hep.

³⁶A dang tla hâwi hen vêngnâk kardang tla, sunglei mi vâm rîn mi tla, kardang kâu leh hêl dak hen langawtkawt tla a um. A dung leikâng fawnh ver hen feet 84, a kauh lei feet 42.

³⁷Kardang kâu chu lênglei mi kulh lei a hawih. Latnâk lei mi vâm ah tûm thing lem â rîn hep. Chu kulh kawtkâ kâinâk chu bak riat asi.

³⁸Lênglei ah mi kulh lakah chun marlei kângah a sungah mi kulh hen â tlâi mi in peh a um. Kardang kâu sungah kulh lei hawi hen â awng le, chunah chun bâwlnâk ah duah hep ding mi ran ruak tla an ṭâwl.

³⁹Chu kardang kâu sungah dawhkân pali a um le, kardang sîrah panih vevê hen a um. Chu dawhkân tlûnah chun bâwlnâk ah ap ding mi ran tla, a pum hen duah hep ding mi mawh, sualnâk ruangah bâwlnâk duah mi mawh, rulhnâk thil ap mawh an thah.

⁴⁰Lênglei mi kardang ah chun â bang rang mi dawhkân pali a um, marlei kângah mi kulh kawtkâ tualmâi sîrah panih vevê hen a um.

⁴¹Dawhkân pariat a um le, chu tlûnah chun bâwlnâk ding mi ran tla chu an thah: pali chu kardang sungah, pali chu kulh lênglei ah.

⁴²Dawhkân pali in peh lakah mi chu a pum hen thil ap duah mi timhtuahnâk ah an mang le, chu chu sâi mi lung asi. A sânglei chu inchi 20 asi le, a tlûn râwn chu kil li hen inchi 30 asi. Bâwlnâk ding ran thahnâk thuamthil tla chu, chu dawhkân ah siah asi.

⁴³Dawnh tla inchi 3 a kâu mi chu dawhkân sîr hêl dak hen a um. Sa zawzawng bâwlnâk ah ap ding mi chu, chu dawhkân tlûnah an siah.

⁴⁴Churawhchun kulh sungah a hawng ka lûtpi. Chu a sunglei mi kulh tlûnah chun kardang panih awng hen a um le, pakhat nih marlei kâng mi kulh sîrah simlei a hawih, a dang nih simlei mi kulh kawtkâ sîrah mar leikâng a hawih.

⁴⁵Chu minung nih chun simlei hawih hen a um mi kardang chu Biakin ah rianṭuantu bâwlpu tla rang asi le,

⁴⁶marlei hawi hen a um mi kardang chu mâichâm ah rianṭuantu bâwlpu tla rang asi ti hawng ka simh. Bâwlpu zawzawng tla chu Zadok thlâk an si le; annih tla chu Levi phun lakah mi an si le, anmah tla lâwng LALPA mâika ah a rianṭuan ding hen kal siang an si.

⁴⁷Chu minung nih sunglei mi kulh chu a tah le, kil li hen feet 168 asi. Biakin chu thlanglei kângah a um le, a tualmâi ah mâichâm a um.

⁴⁸Churawhchun Biakin tualmâi lei a mi kardang sungah hawng ka lûtpi. A tualmâi chu a tah le: a niam leikâng chu feet 9 asi, a kauh leikâng chu feet 24 asi, a vâm chu feet 5 a sah vevê mi hen.

⁴⁹Chu kâinâk an dawnh mi kardang tualmâi chu feet 34 hen a kâu le, feet 20 hen a niam. A tung panih a um le, a tualmâi khatlei sîrah pakhat vevê hen.