Read Bawm Chin EZEKIEL 41 Bible Online

EZEKIEL 41 - Bawm Chin bible

EZEKIEL 41

¹Chu nûn chun chu minung nih chun a lâi ah mi kardang sungah mun thenhlimh ah a hawng ka kalpi. Chu leiah mi latnâk chu a tah: a niam lei chu feet 10,

²a kauh lei feet 18, khatlei sîr vevê vâm chu a sah lei feet 8 asi. A kardang tak chu a tah: a sâu lei feet 68, a kauh lei feet 34 asi.

³Churawhchun a sung chem mi kardang ah a va lût. Chunah lûtnâk lampi chu a tah: feet 3 hen a niam le, feet 10 hen a kâu, khatlei vevê vâm chu feet 12 hen a sah.

⁴A kardang tak chu a tah le, kil li hen feet 34 asi. Churawhchun ka sinah, “Hi hi Mun Thenhlimh Chem asi,” a ti.

⁵Chu minung nih chun Biakin vâm sunglei sah dân a tah le, feet 10 asi. Hi vâm lakah hin Biakin hêl dak hen a sang vima hen kardang tetê tla feet 7 a kâu mi a um.

⁶Chu kardang tla chu chuanh thum asi le, chuanh khat lakah kardang sâwmthum vima a um. Biakin lênglei mi vâm a tangphah kipah mi chu a tanglei ṭuang ah mi ngâk hen a pan dauh le, churuangah chu kardang tla chu vâm lakah a tleih dîrnâk umlo hen a kawp kho.

⁷Churuangah Biakin vâm tla chu a lênglei thawk zauh hen a tlûnlei dawng tiang hen a sah dân bang khap hen a lang. Biakin lênglei mi vâm lakah chun a kardang lênglei mi tlûnah kâinâk panih kâu tak an siam le, churuang chun a tanglei mi chuanh thawk hen a lâivâ mi leh a tlûnah mi chuanh lakah kal kho asi.

⁸Chubang kardang lênglei mi vâm chu feet 8 hen a sah le; chu kardang sungah Biakin marlei kângah kawtkâ pakhat a um le, pakhat chu simlei kângah a um. Biakin hêl dak hen hawrkuang chawh mi a kauh lei feet 8 ka muh le; Biakin vâm kiangah kardang chan cho hen a um le, chu chu tual thawk hen a tlûnlei feet 10 hen a sâng. Bâwlpu nih an mang mi in leh hawr an chawh mi karah mun lâwng feet 34 Biakin sîr leiah tan phak hen a um.

¹²Chu mun lâwng lât vat dawnghnâk ah Biakin sîr tlâklei kângah in pakhat a um le, a sâu leikâng feet 150, a kauh lei feet 116 asi le; hêl dak hen a kulh sah dân chu feet 9 asi.

¹³Chu minung nih chun Biakin lênglei a tah le, a sâu lei feet 168 asi. Chun, Biakin dunglei thawk hen lênglei mi mun lâwng kanh hen Biakin sîr thlanglei kâng tiang hen anna lât dân khawm chu feet 168 asi.

¹⁴Biakin tualmâi mi mun lâwng kanh hen khatlei sîr vevê mi mun lâwng telh hen a lât dân metre sâwmnga asi.

¹⁵Thlanglei kâng tiang hen Biakin dung chu a tah le, kardang latnâk khatlei khatlei sîr a mi tleih hen chu khawm feet 168 asi.

¹⁶Biakin tualmâi mi kardang, Mun Thenhlimh leh Mun Thenhlimh Chem chu a ṭuang thawk hen a langawtkawt tla tiang chu thing hen thuamh mi hep asi. Chubang langawtkawt tla chu khuh kho asi.

¹⁷Biakin sunglei mi vâm tla chu kawtkâ tlûnlei tiang hen tûm thing lem siam mi leh thilnung thla lem hen a khat dil.

¹⁸Tûm thing leh thilnung lem chu lâkṭhelh hen an siam le, pakhat khat hen sang vima hen kardang hêl dak hen an um. Thilnung kip nih mêl panih an nei.

¹⁹Minung mêl chu sîr khat leiah tûm thing leikângah â hawi, chakeibaknei mêl chu sîr khat leiah thing leikângah â hawi.

²⁰Chu hâwi hen vâm zawzawng hêl dak hen ṭuang thawk hen kawtkâ tlûnlei tiang a um.

²¹Mun thenhlimh a mi inkhâr tung chu kil li asi. Mun Thenhlimh Chem kawtkâ ah chun thing mâichâm hâwi mi a um.

²²A sânglei feet 5, a lianh lei feet 4. A ki mi tung tla, a tohnâk tla, a sîr zawzawng chu thing hen siam mi hep asi. Chu minung nih ka sinah, “Hi dawhkân hi LALPA mâika ah um mi asi,” a ti.

²³Mun Thenhlimh leiah latnâk dawng ah inkhâr pakhat a um le, Mun Thenhlimh Chem latnâk dawng ah inkhâr pakhat a um.

²⁴Inkhâr chu thuang nih hen a lâi ah a thlaih mi asi.

²⁵Vâm lakah mi hâwi hen mun thenhlimh a mi inkhâr lakah khawm tûm lem leh thilnung thla lem siam asi. Chu tualmâi mi kardang kawtkâ lênglei tlûnah chun thing hen khuhnâk a um.

²⁶Chu kardang sîr leiah chun langawtkawt tla a um le, a vâm tla chu tûm lem hen ṭialh asi.