Read Bawm Chin EZEKIEL 44 Bible Online

EZEKIEL 44 - Bawm Chin bible

EZEKIEL 44

¹Biakin mun saklei kâng sîrah mi kulh kawtkâ lênglei ah chu minung nih chun hawng ka kalpi.

²Kulh kawtkâ chu khâr pang hen a um le, LALPA nih ka sinah, “Hi kulh kawtkâ hi khâr kumza asi lai le, awng asi lai lo rawh. Kei, LALPA Israel Pathian ka lût ruangah zei minung rang khawm mang siang asi lo. Khâr kumza hen a um ding asi.

³Lal lam chu ka mâika ah râwl thenhlimh ei ding hen a kal kho lai. A lût lai le, a sung chem ah mi kardang kâu ah lan hen kawtkâ leiah a suak lai,” a ti.

⁴Churawhchun, chu minung nih chun marlei mi kulh kawtkâ ah hawng ka lanpi le, Biakin tualmâi ah hawng ka kalpi. Ka zauh le, Biakin chu LALPA umpinâk chêu mitser rê hen a khat mi ka muh.

⁵Tual ah ka bawkbukhup le, LALPA nih ka sinah, “Thikho mi minung, thil zeizawng na muh leh na theih mi lakah ngâi set. Biakin dân leh ti ding mi dân ka nan simh awt. Zeitin mi minung tla me Biakin ah lût hen suak siang ding mi leh siang lo ding mi tla thiamthih tak hen singsiah.

⁶“Kei, LALPA Zahkâi nih, thil fihnungkâi an ti mi tla ka tuar kho lo rawh ti Israel mi hel tla simh na.

⁷Fêm tanlo mi ramdang minung keimah lunglotu tla chu bâwlnâk thâu leh thisen ka sinah an ap liauah ka Biakin ah an lûttir na le, an nawmh asi. Churuangah ka mi tla nih thil fihnungkâi an ti mi zawzawng hen ka thudântuk chu an buar rawh.

⁸Ka Biakin ah dân thenhlimh hâwi hen anmah nih thu neilo hen ramdang minung lehlam thu an neitir.

⁹“Ramdang minung fêmtanlo, hawng ka lunglotu tla, Israel lakah ramdang minung um mi tla pakhat khawm ka Biakin ah an lût ding asi lo, ti kei LALPA nih ka phuang asi,” a ti.

¹⁰LALPA nih ka sinah, “Levi tla Israel mi tla hen hawng ka kaltâk hen milem sawnhtu chu ka rêp na.

¹¹Kulh kawtkâ tla ah thunei hen Biakin rianṭuan tla timhtuah hen ka Biakin ah ka rian an ṭuan kho. Mi tla nih duahphung thil ap leh bâwlnâk an ap mi ran tla an thah kho, zapi tla rangah rianṭuantu ah an um kho.

¹²Sikhawmsele Israel mi tla rangah milem sawnhnâk an timhtuah le, chubang hâwi thilti hen mi tla sual leikângah an kalpi na ruangah kei, LALPA Zahkâi nih rêp an si ngelchel lai ti hen thu ka tiamh asi.

¹³Bâwlpu si hen ka rangah rian an ṭuan lai lo rawh le, thil thenhlimh kiangah kal hen Mun Thenhlimh Chem ah an lût ding asi lo rawh. Hi hi thil fihnungkâi an ti ruangah rêpnâk chu asi.

¹⁴Biakin ah rianṭuan niam ṭuan ding hen ka ruat na asi,” a ti.

¹⁵LALPA Zahkâi nih, “Israel lakah mi tla nih an ka kaltâk liauah Levi chi Zadok thlâk ah mi bâwlpu tla nih Biakin ah zumhkâi tak hen ka rian an ṭuan vima. Churuangah tuah annih tla chu ka rianṭuantu leh ka mâika ah bâwlnâk thâu leh thisen ka sinah aptu ding an si.

¹⁶Anmah cho chu ka Biakin ah lût hen ka mâichâm ah rian an ṭuan lai le, Biakin ah sawnhnâk an timhtuah lai.

¹⁷Biakin sunglei mi kawtkâ ah an lût tikah puan mangṭhia anna aih ding asi. Kulh sungah mawh Biakin sungah mawh rian an ṭuan liauah samul hen siam mi zei thil khawm anna aih ding asi lo.

¹⁸Chu tikah an thlan a suak lo ding hen, puannêm upâwng hen puannêm kekawr tluan anna ruk ding asi, tâi anna sâwm ding asi lo.

¹⁹Kulh lênglei ah zapi sinah an suak lânah Biakin ah rianṭuannâk ah anna aih mi chu an lît tâ lai le, kardang thenhlimh ah an siah lai. Nipuan thenhlimh hen zapi tla chu nganfâk an pêk lonâk ding hen nipuan dang anna aih ding asi.

²⁰“Bâwlpu tla nih an sam an mêt peng ding asi lo, sâupi khawm zuah ding asi lo, a sâu tâwk hen an zuah ding asi.

²¹Bâwlpu tla nih kulh sungah an lût lânah uain rerêng an din ding asi lo.

²²Bâwlpu rerêng nih mâk mi nunau an umpi kho ding asi lo; Israel lakah mi nungâk thenhlimh mawh bâwlpu tla nih an rauh mi numei cho an umpi ding asi.

²³“Bâwlpu tla nih ka mi le chu thil thenhlimh leh thenhlimhlo â bang lonâk, dân hâwi hen thiang mi leh thianglo mi an sîntir ding asi.

²⁴Dân lakah elnâk a suak chun, bâwlpu tla nih keimah dân hâwitê hen thu chu an thlûk ding asi. Phûng kût tla chu ka dân leh ti ding dân hâwi hen an ti lai le, Dinhni thenhlimh tak hen an ulh ding asi.

²⁵“Bâwlpu tla chu anmah nu leh pa mawh, mah fa mawh, mah unau mawh, pasal neilo rih mi farnu mawh asi lo chun dân hâwi hen a ruak tawngh hen a nâwmtir ding asi lo.

²⁶A thiang nawlh nûnah ni sarih a um lai le,

²⁷chu tikah Biakin kulh sungah a va lût lai le, a thianhtirnâk bâwlnâk a va ap lai le, chu tikah Biakin ah rian a ṭuan nawlh kho lai rawh. Kei, LALPA Zahkâi nih ka sim asi.

²⁸“Bâwlpu tla chu bâwlpu sinâk Israel tla lakah ka pêk na mi chu thlâk khat thawk hen thlâk dang a um ding mi lakah anna ap singsuan vima ding asi. Israel lakah mi thil anna tleih kumza ding asi lo; an thil herh zawzawng chu keimah ka si.

²⁹Fâng thil ap, sual thil ap leh rulhnâk thil ap chu bâwlpu tla ei ding mi asi le, Israel lakah mi thil zeizawng ka rangah a dang ê hen an siah mi chu an tawng ding mi asi.

³⁰Bâwlpu tla nih, rah masachem lakah a ṭha chem mi zei thil tal keimah rangah an ap mi chu anna ting ding asi. Mi tla nih sang an em kipah sang tlang masachem chu bâwlpu tla an pêk lai le, an in sungah ka malsâwmnak a um lai.

³¹Bâwlpu tla nih, va mawh, ran mawh, amah lung hen a thi mi mawh, anmah leh anmah anna thah mi an ei ding asi lo,” a ti.