Read Bawm Chin EZEKIEL 45 Bible Online

EZEKIEL 45 - Bawm Chin bible

EZEKIEL 45

¹Ram chu phun kip sinah an vo tla ṭhenh asi rawh chun tingvo khat chu LALPA rangah ap ding asi. A sâu lei chu kilometre leinih leh a khing, a kauh lei kilometre râ asi ding asi. A sung pumpi chu a thenhlimh ding asi.

²Hi sung hin Biakin mun rang ding kil li a sîr kip feet 840 ver siam ding asi, a kiangah mun lâwng hêl dak hen a kauh lei feet 84 a um ding asi.

³Hi mun khingkhuai hi kilometre leinih leh a khing chu kilometre ngâ vima hen tah ding asi; chu sungah chun Biakin a um lai le, Mun Thenhlimh Chem asi hep lai.

⁴Ram lakah thenhlimh mi mun asi lai le, a Biakin ah bâwlpu tla nih LALPA rian an ṭuannâk mun ah ruat asi lai. Chu sungah chun an in tla leh Biakin mun rang a um lai.

⁵Chu mun khingkhuai chu Levi murui Biakin ah rianṭuantu tla rangah ruat asi lai. An rangah a sungah umnâk ding hen khuapi tla a um lai.

⁶Chu sangtu Mun Thenhlimh mun dang a sâu lei kilometre leinih leh a khing, a kauh lei kilometre nih leh a khing chu Israel lakah âuzawng um khonâk ding khuapi ah ruat ding asi.

⁷Lal rang khawmah ram chu ruat ding asi. Thlanglei kângah mi mun thenhlimh hen a rînâk thawk hen thlanglei mi Mediteranian Tipi tiang asi lai le; saklei mi anna rînâk thawk hen saklei mi ramri tiang, Israel mi rangah pêk mi mun pakhat hen a dung a chan ding asi.

⁸Chu chu Israel ram lakah lal nih anna ting mi vo mun chu asi lai le, churawhchun zapi tla rangah nâunehnâk a um lai lo rawh le, a dang a lei mi vial lam chu Israel phun tla rang ding asi.

⁹LALPA Zahkâi nih, “Nannih Isreal lâirêltu tla, nan sual zia a sâwt tuktarâi rawh! Mi rangah siatnâk nan ti mi leh nan nâunehnâk bâng u. A dik mi leh â rep mi ti u. An ram sungah mi ka mi tla nan suaktir na ding asi lo rawh. Kei, LALPA Zahkâi nih hi hi ka nan simh na asi.

¹⁰“Mikip nih tahnâk dik tak leh khinghnâk dik tak nan mang ding asi.

¹¹“A châr mi khinghnâk ephah chu a hâng tahnâk bath hen a tluk ding asi. Tahnâk chu homer asi. A tah dân chu hi hâwi asi: Homer khat chu ephah 10, Ephah 10 chu bath 10 asi.

¹²“Nan khinghnâk chu hi hâwi asi ding asi: gerah 20 chu sekel khat tluk asi. Sekel 60 chu mina 1 hen a tluk.

¹³“Hi hi nan thil ap nan siam ding dân chu asi: Wheat: nan tawng mi lakah a mun 60 ṭhen hen mun khat, Barley: nan tawng mi lakah mun 60 ṭhen hen mun khat, Oliv sariak: nan tawng mi lakah a mun 100 ṭhen hen mun khat. (Bath hen tah hen: Bath 10 chu homer 1 hen a tluk. Homer khat chu Kor 1 hen a tluk.) Dawrâ tla: Israel dâwngsungkhur kip lakah dawrâ 200 lakah pakhat. “Fâng thil ap, ran duah hep ding mi, kawmhnâk thil ap ding mi ran, nan hawng put lai le, nan sual tla ngaihdam asi nâk ding hen. Kei, LALPA Zahkâi nih thu ka pêk asi.

¹⁶“Ram lakah minung zawzawng nih hi bang thil ap tla hi Israel lâirêltu lal sinah nan put ding asi.

¹⁷Ran duah hep ding mi, fâng thil ap, uain thil ap, Thla Thar Kût, Dinhni leh kût dang ni tla ah Israel pumpi rangah pêk chu a rianṭuan asi. Sual thil ap, fâng thil ap, duah hep ding mi thil ap, kawmhnâk thil ap Israel mi tla sual veihnâk dingah a pêk ding asi,” a ti.

¹⁸LALPA Zahkâi nih, “Thla khatnâk a ni khat ni ah chawchal sâwinâk umlo mi hen nanna bâwl lai le, Biakin nan thenh lai.

¹⁹Bâwlpu tla nih chu sual thil ap thisen chu a lâk lai le, Biakin kawtkâ tung, mâichâm kil li, kulh sungah mi kawtkâ tung tla a buaih lai.

²⁰Chu thla a ni sarih ni ah chun âuzawng mah nih tum ruang silo hen mawh theihlo ruangah sual mi tla ruangah chu hâwi ber hen nan ti lai. Chu hâwi hen Biakin chu thenhlimh tak hen nan kil ding asi.

²¹“Chu thla a ni leili ni ah chun Kalkanh Kût mang nanna dawmh lai. Ni sarih kar vial mikip nih sang thilnu telhlo nan ei lai.

²²Kût ni ni masachem ah lal nih amah leh zapi zawzawng sualnâk ruangah chawchal bâwlnâk ah a ap ding asi.

²³Kût ni ni sarih sung nisiar hen LALPA sinah chawchal pasarih, dawrâ chal pasarih simsâwi kawp lo mi, duah hep hen bâwlnâk a pêk lai. Kêl chal khawm nisiar hen sual thil ap ah a pêk ding asi.

²⁴Chawchal leh dawrâ chal hen bâwlnâk pêk kipah fâng litre leisarih leh a khing leh oliv sariak litre thum a ap ding asi.

²⁵“Basâ Kût chu a ni sarihnâk ni leili ah dawmh hen lal nih ni sarih sung nisiar hen bang ver hen sual bâwlnâk, duah hep ding mi thil ap, fâng leh oliv sariak ap mi hâwi hen a ap lai,” a ti.