Read Bawm Chin EZEKIEL 46 Bible Online

EZEKIEL 46 - Bawm Chin bible

EZEKIEL 46

¹LALPA Zahkâi nih, “Kulh sunglei ah kalnâk saklei mi kulh kawtkâ chu rianṭuan ni ni ruk sung chu khâr ding asi. Dinhni leh Thla Thar Kût ni ah chun awng ding asi lai.

²Lal chu lênglei kulh thawk hen kardang kâu leiah mi kawtkâ ah a kal lai le, bâwlpu tla nih a bâwlnâk duah hep mi leh kawmhnâk thil ap an ap liauah kawtkâ ah kawtkâ tung kiangah a dîr lai. Chu kawtkâ ah chun Pathian a sawnh lai le, a suak nawlh lai. Chu kawtkâ chu zânlei tiang hen khâr ding asi lo.

³Dinhni leh Thla Thar Kût ni kipah chu kawtkâ tualmâi ah chun mi zapi zawzawng LALPA an sawnh hen an kûn ding asi.

⁴Dinhni ah chun lal nih duah hep ding mi bâwlnâk LALPA sinah dawrâ fa paruk leh dawrâ chal pakhat simsâwinâk umlo mi a put ding asi.

⁵Dawrâ chal kip lakah fâng litre leisarih leh a khing ap mi leh dawrâ kipah pêk ding a duh mi zeizawng a put ding asi. Chubang fâng ap mi kipah chun oliv sariak litre thum a put ding asi.

⁶Thla Thar Kût ni ah chun chawchal tuai pakhat, dawrâ fa paruk leh dawrâ chal pakhat simsâwinâk umlo mi hep a ap lai.

⁷Dawrâ chal leh chawchal ap kipah fâng litre leisarih leh a khing ap sih asi lai le, dawrâ fa kip lakah chun lal nih pêk ding a duh mi zawng ap asi lai. Fâng ap mi kipah oliv sariak litre thum a ap sih ding asi.

⁸Lal chu kardang kâu lakah mi a suak awt chun, a hawng lûtnâk kawtkâtê hen a suak nawlh ding asi.

⁹“Mi tla chu zei kût ni tal ah LALPA sawnh ding hen an hawng tikah marlei kângah mi kawtkâ hen hawng lûttu tla chu Pathian an sawnh thluh nûnah simlei mi kawtkâ leiah an suak ding asi, simlei kawtkâ hen hawng lûttu tla chu marlei kawtkâ hen an suak ding asi. Âukhawm a hawng lûtnâk lampi lei hen a suak ding asi lo, sikhawmsele a hawng lûtnâk kulh kawtkâ hen â zâwn mi kulh kawtkâ ah a suak ding asi.

¹⁰Lal chu zapi minung an lût tikah a lût bâk lai le, an suak tikah a suak bâk lai.

¹¹Kût ni ah leh puai ni ah chawchal leh dawrâ chal ap mi kipah a duh mi zawng a pêk lai. Chubang fâng thil ap mi kipah oliv sariak litre thum ap sih ding asi.

¹²“Lal nih mah duh thu hen LALPA sinah thil ap siam ding a duh tikah duah hep mi thil ap mawh kawmhnâk thil ap mawh zei mi tal a ap awt chun kulh kawtkâ sungah kainâk saklei mi kulh kawtkâ chu an awng piak ding asi. Dinhni ah a ti mi hâwitê hen thil ap chu a ap lai le, a suak nawlh tikah kulh kawtkâ chu khâr ding asi,” a ti.

¹³LALPA nih, “Zîng siar hen kum khat mi dawrâ fa sâwinâk umlo mi, LALPA rangah thil ap ah a duah hep ding asi. Chu thil ap chu nisiar hen a ti ding asi.

¹⁴Sangvut kilogramme nih zîng siar a siam mi hen oliv sariak litre khat sangvut hen chawmh mi khawm ap ding asi. Hi LALPA sinah apnâk dân hi zeiliau zawngah ti ngelchel ding mi asi.

¹⁵Dawrâ fa, sangvut leh oliv sariak tla chu zîng siar hen ap kumza ding asi,” a ti.

¹⁶LALPA Zahkâi nih thu a pêk le: “Lal nih a ram lakah mi pakhat rangah a pêk chun, a dâwngsungkhur lakah a fapa pakhat tingvo asi lai.

¹⁷Sikhawmsele lal nih amah rianṭuan piaktu âu sin tal ah a ram a pêk chun, dirhnawlhnâk kum a hawng tlung chun lal thil-le-rî ber asi nawlh lai. A bîk hen amah tâ asi ruang chun amah leh a fapa tla cho nih anna ting pawt kho.

¹⁸Lal nih mi thil âu tâ khawm a lâk piak na ding asi lo. A fapa tla rangah ram a pêk na mi chu amah tâ lakah mi asi ding asi, chu tikah an ram lâk piak hen ka mi tla nehsawhtu asi lai lo,” a ti.

¹⁹Churawhchun, chu minung nih kardang tla tualmâi marlei a hawih mi, kulh sungah mi simlei sîr kulh kawtkâ kiangah hawng ka kalpi. Chu chu bâwlpu tla umnâk thenhlimh tla asi.

²⁰Chu kardang tla thlanglei kâng sîr mun chu a khît le, “Hi mun hi bâwlpu tla nih sual bâwlnâk ah ap mi leh rulhnawlhnâk thil ap lakah mi sa an suangnâk leh ap mi sangvut emnâk asi, lênglei ah mi zapi rangah nganfâk tawng ding hen thil thenhlimh kulh lênglei ah suakpi asi lonâk ding hen,” a ti.

²¹Churawhchun kulh lênglei ah hawng ka kal pi le, kil li lakah a ki kipah kulh mê dauh mi, a sâu lei feet 68 a kauh lei feet 48 mi hawng ka zauhtir.

²³Lung kulh a kiangkam ah hêl dak hen an nei chiau le, chu kulh lakah chun tappi an siam mi hen.

²⁴Chu minung nih chun, “Hi bang tla hi mi nih bâwlnâk an ap mi Biakin rianṭuantu tla buh-an suangnâk in asi,” ti hen hawng ka simh.