Read Bawm Chin EZEKIEL 47 Bible Online

EZEKIEL 47 - Bawm Chin bible

EZEKIEL 47

¹Chu minung nih chun Biakin tualmâi leikângah hawng ka kîrpi nawlh. Tualmâi tanglei hen tî a hawng suak le, Biakin hawinâk saklei kângah a luang. Biakin simlei kâng a tanglei thawk hen simlei kâng mâichâm sîr hen a luang.

²Chu minung nih Biakin mun ah mi chu marlei kâng kulh kawtkâ leiah hawng ka suakpi le, saklei kâng a hawih mi kulh kawtkâ leiah hawng ka hêlpi. Simlei kângah mi kulh kawtkâ sîrah chun tivatê pakhat ah tî a hawng suak.

³Chu minung nih a tahnâk fung hen a suk hen saklei kângah feet 1,680 a tah le, chu tiva chu tan ding hen hawng ka simh. Tî chu ka kemit tiang cho asi.

⁴Churawhchun feet 1,680 a tah nawlh le, tî chu ka khûp tiang asi. Feet 1,680 a tah nawlh le, tî chu ka tâi tiang asi.

⁵Feet 1,680 dang a tah nawlh le, tiva chu a thûk thlo rawh le, ka tan kho lo rawh. Liau hen chun tan ding hen a thûk tuk rawh.

⁶Anih nih chun ka sinah, “Thikho mi minung, hi bang zawzawng hi thiamthih tak hen singsiah,” hawng ka ti. Churawhchun chu minung nih tiva kapah hawng ka kîrpi le,

⁷chunah ka va kal rawh chun tiva kap kipah thing tamtak a um mi ka muh.

⁸Anih nih chun ka sinah, “Hi tî hi ram lakah lan chang hen saklei kângah a luang le, Jordan Vakuam leiah a luang le, Tipi Thi ah a lût. Tipi Thi ah a lût rawh chun chu tipi al chu tî thar ah a changtir.

⁹Chu tiva chu a luangnâk zawngah ran chi kip leh nga chi kip an um lai. Chu tiva nih chun Tipi Thi tî chu tî thar ah a siam lai le, a luangnâk zawngah nungnâk a pêk lai.

¹⁰Engedi tiva thawk hen Eneglaim tiva tiang ngarâltu tla tipi kapah an um lai le, tiva kapah an lên tla an pho lai. Mediteranian Tipi ah mi hâwi hen chunah chun nga chi dang dang tamtak an um lai.

¹¹Sikhawmsele chirhsâwp leh zur tî lam chu thartir asi lai lo. Al tîk hen a um kumza lai.

¹²Tiva kapah mi thing chi kip tla chu ei ding pêktu ding hen an ṭhang lai. An nah tla zeiliau khawm a uai lai lo le, rah an suah kumza lai. Biakin thawk hen tiva a luang mi nih a châwm mi asi ruangah thla kip hen an rah lai. Chu thing tla nih ei ding an suah lai le, an nah tla chu mi tla damhnâk dingah mang asi lai,” a ti.

¹³LALPA Zahkâi nih, “Hi bang tla hi ramri phun leinih lakah ṭhenh na ding mi chu asi, Josef phun nih mun nih anna ting ding mi hen.

¹⁴Nan thlâktu tla chu hi ram hi ting dingah anmah pêk na ding hen bir tak hen thu ka tiamh na mi asi; churuangah tuah bang rang hen a ṭhen u.

¹⁵“Marlei ramri chu saklei kângah Mediteranian Tipi thawk hen Hethlon khuapi leiah Hamat Liamnâk leiah Zedad khuapi leiah,

¹⁶Berothah leh Sibraim khuapi leiah (chu chu Damaska leh Hamat ram karah um mi asi), Tikon khuapi leiah (chu chu Hauran ramri kiangah um mi asi.)

¹⁷Churawhchun marlei ramri chu Mediteranian saklei kâng thawk hen Enon khuapi leiah Damaska leh Hamat ramri lei hen marlei kângah.

¹⁸“Saklei kâng ramri chu simlei kângah Damaska leh Hauran ram kar thawk hen, Jordan Va chu Israel ram thlanglei leh Gilead ram saklei kângah a luang le, Tamar leiah Tipi Thi ah a suak.

¹⁹“Simlei ramri chu sim thlanglei kângah kal hen Tamar thawk hen Kades ramkaro ah, Mar thlang leikâng Aigupta ramri leh Mediteranian ah a lût.

²⁰“Thlanglei ramri chu Mediteranian hen marlei kângah kal hen Hamat Liamnâk thlang leiah.

²¹“Chu ram tla chu nan phun tla ṭhenh zâr na ule;

²²chu chu nanna ting pawt ding mi asi rawh. Nan ṭhenh na tikah nan sinah ramdang mi minung nan sinah um mi fa tla rang khawm an vo nan siam piak na bâk ding asi. Israel mi tatak hâwi hen nan ti na bâk ding asi, ram lakah tingvo thîm tik khawmah Israel phun hâwi hen tingvo thîmnâk an nei bâk ding asi.

²³Bir tak hen ramdang mi an lakah phun um mi tla hen vo an nei ding asi. Kei LALPA Zahkâi nih ka sim asi,” a ti.