Read Bawm Chin EZEKIEL 5 Bible Online

EZEKIEL 5 - Bawm Chin bible

EZEKIEL 5

¹LALPA nih, “Thikho mi minung, nâmsâu hâr tak lâk le, na sam leh na khamul mêtnâk ah mang. Khîng lakah khingh le, anrang thum hen, ṭhen.

²An hual mi â lîm tikah khuapi sungah anrang khat duah. A dang anrang khat chu khuapi lênglei na suak liauah na nâm hen tuk dip. Chun anrang khat a um mi chu thli lakah vawrh phin le, ka nâmsâu hen ka ṭhâwl lai.

³Chun, sam a leifuan tâwmtê chu na puan sâr hen fûn.

⁴Chu lakah mi tâwmtê chu lâk le, mei lakah paih le, kângtir hep. Chu thawk hen chun mei chu Israel phun pumpi ah a hawng zan lai,” a ti.

⁵LALPA Zahkâi nih, “Jerusalem zauh. Laikulh ah ramdang zawzawng nih kulh hen a lâi chirah ka siah.

⁶Sikhawmsele, Jerusalem chu ka thupêk lakah a hel le, phundang tla ngâk hen a sual dauh hen a kiangkam ram tla ngâk hen ê-aw ngâilo dauh mi a langh. Jerusalem nih ka thupêk ngâilo hen ka dân khawm a zûl duh lo.

⁷Jerusalem, tuah, kei LALPA Zahkâi nih thu ka sim mi hi ngâi rawh. Na kiangkam a mi phun tla ngâk hen ka dân na zûl lonâk leh ka thupêk na ngâilonâk nih na lawk an sawngtir. Phundang tla ti dân na châwng.

⁸Churuang chun, Kei, LALPA Zahkâi nih, na mêlma ka si ti ka nan simh asi. Phun zawzawng mitmuh ah na lâi ka rêl awt.

⁹Ka hua mi thil zawzawng na ti ruangah Jerusalem chu a lânah ka ti dah lo mi leh ti khawm ka ti awt lo rawh mi rêpnâk hen ka rêp awt.

¹⁰A hawng um ding mi chu, Jerusalem ah an nu leh pa nih an fa tla an ei lai le, fa tla nih an nu leh an pa an ei lai. A dam lem mi tla chu mun kipah ka rek na lai le, ka rêp na lai.

¹¹“Ka Biakin chu thilsual zawzawng ti hen na nawmh le, thil fihnungkâi na ti ruangah khuaruatnâk tello thlo hen ka nan hâu lai ti hi Pathian nung kei LALPA Zahkâi thusim asi.

¹²Na mi tla anrang thum lakah anrang khat chu khuapi sungah damlo leh sungvâng hen an thi lai le; anrang thum ṭhen hen anrang khat chu khuapi lênglei ah nâmsâu hen thah an si lai; anrang khat a dawnghnâk ah mi chu thli lakah ka thektham lai le, nâmsâu hen ka ṭhâwl na lai.

¹³“Ka dî a riam lânlo chu, ka thinthawknâk leh ka thinrunnâk na tuar lai. Hi bang zawzawng a hawng tlung tikah nangmah zumh na kâilonâk ruangah ka thinthawknâk ka suah mi thu kei, LALPA nih na sinah ka sim mi asi ti na theih lai.

¹⁴Na kiangkam mi phun tla a nan paltu nih a nan nihsanh lai le, a nan kiangtâk lai.

¹⁵“Ka thinrunh leh ka rothawknâk hen ka nan rêp tik chun, nan kiangah phun zawzawng tla an lâu lai. An fih na lai le, an nihsanh na lai.

¹⁶Nan tî-râwl ka sah lai le, sungvâng hen kan siah na lai. Nanmah veihtu chanhtiang thalzum sunh hâwi hen sungvângh a fâk zia nan theih lai.

¹⁷Sungvânghnâk leh nan fa sehtu ding ramsa tla ka hawng fial lai le, damlonâk, siatnâk, nanmah thah ding hen tuknâk ka hawng fial lai. Kei, LALPA nih ka sim asi,” a ti.