Read Bawm Chin EZEKIEL 6 Bible Online

EZEKIEL 6 - Bawm Chin bible

EZEKIEL 6

¹LALPA nih ka sinah thu a sim.

²“Thikho mi minung, Israel umnâk tlâng lei zauh le, ka thuchah simh na.

³Israel tlâng tla chu LALPA thu ngâi ding hen simh na. Kei LALPA Zahkâi nih tlâng sâng tla leh tlângtê tla leh tiva hum thûk leh tivakuam tla ka simh na mi chu theih ding hen: Mi nih milem an sawnhnâk mun chu râwk ding hen nâmsâu ka fial awt.

⁴Mâichâm leh rimthâw duahnâk mâichâm tla chu râwk hen a um lai. Chunah um mi tla chu an milem mâika ah thah an si lai.

⁵Israel zapi ruak tla chu ka rektir phin lai le; an ruh tla chu mâichâm kiangah vawrh phut hen ka siam lai.

⁶Israel khuapi zawzawng chu râwk hen a um lai le, churawhchun an mâichâm leh an milem zawzawng chu mân dip hen a um lai, an rimthâw duahnâk mâichâm tla chu â râwk lai le, an thilsiam zawzawng a vei hep lai.

⁷Mun kipah thah hen an um lai le, a thibang tla nih LALPA ka si zia an theih lai.

⁸“Thahtu tla lakah mi zeimaw mi chu ka hum na lai le, chunah sal ah an tângnâk phun tla lakah rekrâwi hen an um lai.

⁹An thinlung ah zumhnâk neilo hen an hawng ka kaltâk le, kei ngâk hen milem an duh dauh ruangah ka rêp na hen ningzak ka saih na mi asi ti chunah an ka theih lai rawh. Thilsual ti hen anmah niamnâk ding thil an ti ruangah anmah anna fih lai.

¹⁰Kei, LALPA ka si zia leh ka simkannâk chu a salam asi lo zia an theih lai rawh,” a ti.

¹¹LALPA Zahkâi nih, “Israel mi tla nih thil fihnungkâi leh sualnâk zawzawng an ti ruangah na kut bengh le! Na kê lamhbêk le! Ngaihsia tak hen ṭap. Tuknâk lakah leh pâmnâk leh râi lakah an thi lai.

¹²Lât takah um mi tla khawm damlo hen an thi lai; lam nâi ah um mi tla khawm tuknâk lakah an thi lai; chu lakah a thibang tla khawm sungvâng hen an thi lai. Ka thinthawknâk fâk tak chu an theih hep lai.

¹³Ruak tla chu mâichâm leh milem kiangah anna vawrh phut lai le, tlâng sâng kipah leh tlâng sâng tlûnah, thing ring tla leh oak thing tang tla, an milem lakah anna bâwlnâk mun ah anna vawrh phut lai. Churawhchun kei LALPA ka si zia mikip nih an theih lai rawh.

¹⁴Asi, ka kut ka phar lai le, an ram ka râwk lai. Simlei ramkaro thawk hen marlei mi Riblah khuapi tiang Israel umnâk zawzawng zuah lo thlo hen a karo hen ka siam awt. Churawhchun kei, LALPA ka si ti mikip nih an theih lai,” a ti.