Read Bawm Chin EZEKIEL 7 Bible Online

EZEKIEL 7 - Bawm Chin bible

EZEKIEL 7

¹LALPA nih ka sinah thu a sim.

²“Thikho mi minung, hi hi Israel ram ah kei LALPA Zahkâi nih thu ka sim mi chu asi: Hi hi ram pumpi dawnghnâk chu asi!

³“Israel, a dawnghnâk a tlung rawh. Na thilti lakah lâi ka rêl mi ruangah ka thinthawknâk na theih lai. Na umdân fihnungkâi zawzawng man ka nan pêk awt.

⁴Na lakah khuaruatnâk nei hen ka nan zauh awt lo. Thil fihnungkâi na ti ruangah ka nan rêp awt, kei LALPA ka si ti na theih lai,” a ti.

⁵Hi hi LALPA Zahkâi nih a sim mi chu asi, “Siatnâk a tlawt tlawt hen na lakah a hawng tlung.

⁶A ektê hen a lîm ver rawh. Hi hi a dawnghnâk asi. Na lîm rawh.

⁷Ram sungah nan um mi tla rangah dawnghnâk a tlung rawh. Tlâng tlûnah sawnh leh biaknâk umlo hen nawknâk karo tlung ding tik a nâi rawh.

⁸“Sâwtlotê ah ka thinthawknâk fâk zia nan theih lai. Na thilti ruangah na lâi ka rêl le, na umdân fihnungkâi man ka nan pêk awt.

⁹Na lakah khuaruatnâk nei hen ka nan zuah awt lo. Thil fihnungkâi na ti mi ruangah ka nan rêp awt, a nan rêptu chu kei, LALPA ka si ti na theih lai rawh,” a ti.

¹⁰Israel mi tla rangah siatnâk ni a hawng tlung. Siatnâk a zual. Zumhnâk a fâk.

¹¹Râwknâk nih sualnâk a suah. An neihnâk mawh, an lianhnâk mawh an rokualnâk mawh an rangah thil zeikhawm a um lai lo.

¹²A tik a tlung rawh. Mikip tlûnah bang khap hen Pathian rêpnâk a tlung awt ruangah châwk leh zuarnâk duan dân a um awt lo ding mi ni a nâi rawh.

¹³Mikip tlûnah Pathian thinthawknâk a um ruangah sawlehtu âukhawm nih a thil vei rawh mi tawng nawlh ding hen tam sâwt a um lai lo rawh. Misual rerêng chu a âwl kho lai lo.

¹⁴Tâwtawrâwt a hawng âwn le, mikip tîm zet hen an um. Sikhawmsele âukhawm râltuk ding hen an kal lo, mikip tlûnah Pathian thinthawknâk bang khap hen a tlung awt ruangah.

¹⁵Zâwllâi ah donâk a um le, in sungah damlonâk leh sungvângnâk a um. Âuzawng ram lakah suaktu chu donâk lakah an thi lai le, âuzawng khuapi sungah um mi tla chu damlonâk leh sungvângnâk an tuar lai.

¹⁶A zeimaw mi chu tivakuam ah mi vaṭhu tla an lâu mi hâwi hen tlâng leiah an tek lai. An ektê hen anmah sual ruangah an rûm lai.

¹⁷Mikip kut a uai lai le, an khup tla â nîn lai.

¹⁸Salâpuan anna aih lai le, an thir lai. An lû tla an mêt lai le, ningzakkâi tak hen an um hep lai.

¹⁹LALPA nih a thinthawknâk an tlûnah a tawih tik chun ngûn leh tangka nih ruang a suah na kho lo ruangah, an ngûn leh tangka tla chu nâwmtâm hâwi hen khua lâi ah an lawnh lai. An duhnâk lakah leh an paw khimnâk khawmah an mang kho lo rawh. Ngûn leh tangka nih sualnâk ah a kalpi na.

²⁰An lungmantam chu veikhat rang chun anna zûm phah le, sikhawmsele milem fihnungkâi rangah an siam. Churuangah an neih chu LALPA nih an rangah thil fihnungkâi ah a siam piak na.

²¹“Ramdang minung ka râwktir na awt, dân buartu tla nih an neih zawzawng an lâk lai le, an nawmh lai, “LALPA nih a ti.

²²Ka Biakin thil siah an nawmh tikah leh rawkmang tla nih an râwk hen an nawmh tikah ka âwva awt lo.

²³“Thil zeizawng a nawk hep, ram chu thahnâk hen a khat le, khuapi tla chu siatnâk hen a khat.

²⁴Ramdang minung sual tak ka hawng put lai le, nan in tla ka pêk na awt. Phun tla chu nan sawnhnâk mun ka nawmhtir na tikah nan mi chak chem tla khawm anna zûm lai lo rawh.

²⁵Lungdawngnâk a hawng tlung rawh. Thlangamnâk nan hâwl lai le, nan tawng lai lo rawh.

²⁶Siatnâk lakah siatnâk dang a hawng tlung lai, tivatê dusah a luang mi thâwng ṭha lo a hawng tlê lai. Khuavâng tla sinah langhnâk an muh mi nan deih na lai. Bâwlpu tla khawm nih mi zapi tla sîntir ding zeikhawm an nei lai lo, upa tla khawm nih thu simh ding an nei lai lo rawh.

²⁷Lalchem khawm a ngaih a sia lai le, lal fa tla khawm an lung a dawng lai le, zapi minung tla khawm lâu hen anna nîn lai. Nan thilti zawzawng ruangah kan rêp na lai le, midang tlûnah lâi an rêl mi hâwitê hen nan tlûnah lâi ka rêl lai. Hi nih LALPA ka si ti a nan theihtir na lai,” a ti.