Read Bawm Chin EZEKIEL 8 Bible Online

EZEKIEL 8 - Bawm Chin bible

EZEKIEL 8

¹Sal ah kan tâng mi a kum ruknâk a thla ruknâk a ni nga ni ah Juda phun lakah mi sal tâng tla ruitu tla hen ka in ah tohâwngnâk kan nei. Lâkkhatko ah LALPA Zahkâi thiltikhonâk chu ka tlûnah a hawng tlung.

²Tlûnlei ka zauh le, muhnâk lakah meialh minung hâwi mi ka muh. A tâi thawk hen a tanglei vial chu mei hâwi asi, a tâi thawk hen tlûnlei kâng vial chu dâr rawng a tlêu mi hâwi asi.

³Kut hâwi hen a hawng ka vuanh le, ka sam ah hawng ka tleih. Churawhchun hi Pathian muhnâk lakah hin Pathian thlarau nih vân leiah hawng ka châwi le, Jerusalem leiah hawng ka put. Biakin mârlei mi kulh kawtkâ a sunglei kângah mi zâwllâi ah Pathian thinthawktirtu milem umnâk ah hawng ka kalpi.

⁴Chunah chun Kebar tiva kapah ka muh mi hâwitê hen Israel Pathian a um ti theihnâk chêu mit ser rê mi chêu ka muh.

⁵Pathian nih ka sinah, “Thikho mi minung, marlei kâng zauhnik,” a ti. Ka van zauh le, chu kulh kawtkâ ah mi mâichâm kiangah Pathian thinthawktirtu milem ka muh.

⁶Pathian nih ka sinah, “Thikho mi minung, thil a hawng tlung mi na muh ma? Thil fihnungkâi hinah Israel mi tla nih an ti mi hi zauhnik, ka mun thenhlimh lakah mi lât dadauh hen an hawng ka nar. Hi ngâk hen thil ningzakkâi tam dauh na muh lai,” a ti.

⁷Kulh lênglei tualmâi ah a hawng ka kalpi le, kulh dâi a kua mi hawng ka zauhtir.

⁸“Thikho mi minung, hi kulh dâi tla hi siat,” a ti. Ka siat le, inkhâr ka muh.

⁹Anih nih ka sinah, “Va lût le, khinah sualnâk thil fihnungkâi an ti mi khi zauhnik,” a ti.

¹⁰Churawhchun ka va lût le, ka zauh. Vâm lakah rûl lem an rîn mi tla leh ran thianglo tla leh thil dang Israel tla nih an sawnh dingah an rîn mi tla ka muh.

¹¹Chunah chun Israel ruitu sâwmsarih, Saphan fapa Jaazaniah rêlsih hen an um. Rimthâw duah mi anna put seng, rimthâw thawk hen meikhû a hawng suak.

¹²Pathian nih, “Thikho mi minung, Israel ruitu tla nih a thup hen thil an ti mi na muh ma? In kardang khat zat mi milem tla an sawnh. Anna phelhsawlhnâk chu: ‘LALPA nih a hawng kan muh lo! Ram a kaltâk ving rawh an ti,” a hawng ka ti.

¹³Churawhchun LALPA nih ka sinah, “Hi ngâk hen thil fihnungkâi tam dauh an ti mi na muh na lai,” a ti.

¹⁴Churawhchun Biakin marlei kawtkâ ah hawng ka put le, Tamuz pathian a thi mi ṭappitu nunau tla a hawng ka zauhtir.

¹⁵Pathian nih, “Thikho mi minung, kha kha na muh ma? Hi ngâk tam dauh thil fihnungkâi na muh lai,” a ti.

¹⁶Churawhchun Biakin kulh sung leiah a hawng ka kalpi. Chunah mun thenhlimh tualmâi kiangah mi mâichâm leh latnâk karah minung kul leh panga an um. Mun thenhlimh chu dunglei sît hen saklei kângah nî a suak mi mâimûk hen an sawnh le an kûn.

¹⁷LALPA nih ka sinah, “Thikho mi minung, kha kha na muh ma? Hi Juda mi tla nih hin ah thil fihnungkâi zawzawng ti hen na muh na hen ram pumpi ah siat leh râwknâk an zanh. Chu lâwng khawm silo hen, ka Biakin sung khawm an hawng lai le, ka thinthawknâk an zualtir khun lai. An hawng ka zauhnawmh hen sual kho rirî an sual mi hi zauhnik!

¹⁸Ka thinthawknâk fâk tak an tawng teh lai. Ka zuah na hen an lakah khua ka ruat ding asi lo. An hâu a fâk kho rirî hen ka sinah thla an cham lai le, sikhawmsele ka ngâi piak na ding asi lo,” a ti.