Read Bawm Chin EZEKIEL 9 Bible Online

EZEKIEL 9 - Bawm Chin bible

EZEKIEL 9

¹Pathian âu hâu ka theih le, “Nannih khuapi rêptu ding mi tla hinah hawng u. Nan râlthuam hawng a put u,” a ti.

²Mawhsareh hen minung paruk chu Biakin marlei kâng a mi kulh kawtkâ thawk hen riamnâm put chiau hen an hawng. An lakah minung pakhat puannêm aih mi a um le, anih nih rînnâk ding thil zeimawh a put. An ektê hen an hawng le, dâr mâichâm kiangah an dîr.

³Churawhchun Israel Pathian umnâk chêu mit ser rê chu thilnung thla, a umnâk a mi chu a thawk le, Biakin tualmâi leiah â ṭhial.

⁴LALPA nih puannêm aihtu chu a kawh le, “Jerusalem khuapi chu ṭawl le khuapi sungah thil fihnungkâi zawzawng an ti mi ruangah hamh hen lawksawng mi zawng chu an chal lakah singsiahnâk siam piak khap na,” a ti.

⁵Midang tla sinah Pathian nih thu a sim mi chu ka theih le, “Khuapi sungah va zûl ule thah u. Pakhat khawm zuah lah na u; âu tlûn khawmah khua ruat lah u.

⁶Tar tla, tlangvâl tla, nungâk tla, nu tla, ngâksia tla thah na u. Sikhawmsele an chal ah singsiahnâk neitu tla chu tawngh lah na u. Hi ka Biakin thawk hen dawmh u,” a ti. Churawhchun Biakin ah dîr mi ruitu tla hen anna dawmh rawh.

⁷Pathian nih an sinah, “Biakin nawmh u. A kulh tla ruak hen khattir u. Ṭuan ding a dawmh u rawh!” a ti. Churawhchun khuapi a mi minung tla thah anna dawmh rawh.

⁸An thah na liauah chunah chun keimah lâwng hen ka um. Tual ah bawkbukhup hen ka tlû le, “LALPA Zahkâi, Jerusalem lakah chu tluk hen na thinthawk na maw, Israel ram ah a um lem mi chu na thah awt êu?” ti hen ka âu.

⁹Pathian nih a sâng le, “Israel leh Juda mi tla nih thilsual ṭihnungkâi tla an ti, ram pumpi ah mi an thah na le, Jerusalem chu buarnâk hen an khattir. Kei, LALPA nih an ram chu kaltâk hen anmah tla ka muh na lo rawh mi hâwi hen an sim.

¹⁰Sikhawmsele, anmah ka lungkham na awt lo rawh; midang lakah an ti hâwi hen an lakah ka ti awt,” a ti.

¹¹Churawhchun puannêm aihtu chu a hawng kîr le, LALPA sinah thu a sim, “Na sim mi hâwi hen ka ti rawh,” a ti.