Read Bawm Chin DANIAL 1 Bible Online

DANIAL 1 - Bawm Chin bible

DANIAL 1

¹Jehoiakim Juda lalchem asi mi a kum thumnâk ah Babulon lalchem Nebukadnezar nih Jerusalem a do le, khuapi chu a hual.

²Lalpa nih lal Jehoiakim chu a tleihtir le, Biakin ah mi thil-le-rî zeimaw mi a lâk. A mi tleih tla chu Babulon ah mi a pathian biakin tla leiah a put na le, a thil lâk tla chu biakin ah thil siahnâk ah a siah.

³Lal nih a rianṭuantu lianchem Aspenaz chu Israel sal tâng lakah mi tlangvâl lal dâwngsung leh milian dâwngsung lakah mi thîm na ding hen thu a pêk.

⁴Chubang tla chu mi mêlṭha, mifing, sîn rawh mi, mi thil theihthiam sawm kho mi, taksa lei khawm sâwinâk umlo mi, an si ding asi le, lal lâirêlnâk in ah thiam tak hen an ṭuan khonâk ding hen. Aspenaz nih Babulon hawlh chu rêl leh rîn a sîntir na ding asi.

⁵Lal nih nisiar hen bang ver hen buh leh uain tla lâirêlnâk in ah mi tla hen pêk na ding hen thu a pêk na. Chu sînnâk kum thum anna lîm tikah lal mâika ah an va a langh ding asi.

⁶Chubang thîm mi lakah tel mi chu Danial, Hananiah, Misael leh Azariah, an ektê hen Juda phun lakah mi an si.

⁷Chu lal rianṭuantu lian nih chun min thar a sak na: Beltesazar, Sadrak, Mesak leh Abednego.

⁸Danial nih a thinlung hen a ruatnâk ah lal in ah mi uain din ding mi leh ei ding mi tla chu din leh ei thianglo hen a ruat le, churuang chun Aspenaz chu ṭangpi a deih le,

⁹Pathian nih Aspenaz chu Danial rangah dâwttu ding hen a siam.

¹⁰Aspenaz nih Danial sinah, “Lalchem nih din ding leh ei ding a ruat rawh mi chu na din hen na ei ding si, na ti lo chun midang tlangvâl tla hen nanna bang lo chun lal nih hawng ka thah lai ti ka ṭih,” a ti.

¹¹Churawhchun Danial chu vêngtu Aspenaz nih amah leh a hâwi pathum tla hotu ah a siah mi sinah a kal rawh.

¹²Danial nih, “Ni râ kar hawng kan nik. Thlâi leh tî din ding hawng kan pêk.

¹³Chu tikah tlangvâl dang tla lal in ah din leh ei hen um mi tla hen hawng kan tahkhiat le, zeise kan bangh hawng kan zauh le, sim,” ati.

¹⁴Ni râ kar chu zauhdik na ding hen rem a ti rawh.

¹⁵A tik a hawng tleng rawh chun, lal tî-le-râwl eitu tla ngâk hen dam leh chak dauh hen an lang.

¹⁶Chu thawk chun vêngtu nih chun lal nih a pêk na mi silo hen thlâi chu an eitir vima na rawh.

¹⁷Pathian nih tlangvâl pali tla chu theihnâk leh lasui thiamnâk leh finghnâk tla a pêk na. Chu lâwng khawm silo hen Danial rangah mang leh muhnâk simhfiang khonâk a pêk sap rih.

¹⁸A kum thumnâk ah lal nih a ruat mi â lîm rawh chun, Aspenaz nih tlangvâl zawzawng chu Nebukadnezar sinah a kalpi na.

¹⁹Lalchem nih thu an ektê hen a ruatpi na le, Danial, Hananiah, Misael leh Azariah thusim nih midang tla thusim ngâk hen a thinlung a purh dauh. Churawhchun lal lâirêlnâk ah tel mi an si bâk rawh.

²⁰Lal nih thu a deih na mi mawh thil theih har tak a siam mi chu hi minung pali tla nih a lalram pumpi ah thu simkantu tla mawh dâwithiam tla mawh ngâk hen a let râ hen an theih dauh.

²¹Danial chu Persia ram lalchem Kirus nih Babulon ram a neh tiang hen lal lâirêlnâk in ah a um.