Read Bawm Chin DANIAL 10 Bible Online

DANIAL 10 - Bawm Chin bible

DANIAL 10

¹Kirus, Persia lal asi nâk a kum thumnak ah, Danial, Beltesazar an ti mi sinah thuchah a hawng tlung. Thuchah chu a dik le, sikhawmsele theihthiam ding hen thungâi a har, langhnâk lakah a sinah simhfiang hen a um.

²Chu liau chun zarhkar thum chu lungfâk tuar hen ka um.

³Zarhkar thum a len lân lo chu buh leh an thaw ka ei lo, uain khawm ka din lo, sam khawm ka riat lo.

⁴Chu kum thla masachem ni kul leh ni li ni ah Tigris Tiva lian tak kapah ka dîr le,

⁵tlûnlei ka zauh le, âumawh puan nêm aih hen ngûn tâisâwm â sâwm mi ka muh.

⁶A taksa chu lungsung hâwi hen a chêu. A mêl chu mîmthlalek hâwi hen a chêu, a mit tla chu mei hâwi hen a chêu. A kut leh a kê chu dâr a tlêu mi hâwi asi le, a hâu chu zapi tamtak hâu hâwi asi.

⁷Chu langhnâk muhtu chu keimah lâwng ka si. Ka sinah um mi tla nih chun zeikhawm an muh lo, sikhawmsele an ṭih le, an tek le, anna thup.

⁸Chunah chun keimah lâwng an hawng ka mâk thlap le, langhnâk chê tak chu keimah lâwng hen ka zauh le, ka um ko. Ka tha a zuai thlo le, ka mêl khawm â dang ving le, âukhawm nih an hawng ka theih kho lo.

⁹A hâu chu ka theih kâ hen zeikhawm theihlo hen tual ah ka tlû le, bawkbukhup hen ka bawk.

¹⁰Churawhchun kut nih a ka tleih le, hawng ka thawh le, hawng ka dîrtir, chu khawmah ka thir nget rih.

¹¹Vânmifial nih ka sinah, “Danial, Pathian nih a nan dâwt, dîr le, thu ka sim ding mi chiamchiriamtê hen ngâi, na sinah fial mi ka si,” a ti. Hi thu a sim liau khawm ka thir kumza rih.

¹²Churawhchun anih nih “Danial, ṭih lah, Pathian nih theih ding duh hen nâu tak hen a ni khat ni ah thla na cham mi kha Pathian nih a theih le, na thlachamnâk sâng ding hen hawng mi ka si.

¹³Persia ram vêngtu vânmifial nih ni kul leh ni khat kar hawng ka do, churawhchun Persia ram ah keimah lâwng siah hen ka um ruangah vânmifial lakah a lianchem mi Mikael keimah ṭangpi ding hen a hawng.

¹⁴Hi nûnthâi ah na mi le tla lakah thil a hawng tlung ding mi an theihthiam tir ding hen hawng kal mi ka si, hi hi mâilei a hawng um ding mi thu ah langhnâk asi,” a ti.

¹⁵Hi thu a sim liau hin hawlh lo thlo hen tual lei ka zauh.

¹⁶Churawhchun vânmifial minung ko a bangh mi nih a bân a zangh le, ka mûr a tawngh. Kei nih a sinah, “Pu, hi langhnâk nih hin hawng ka dîttir tuktarâi le, ka thir mi ka bâng kho lo thlo.

¹⁷Kei chu sal a pu mâika ah dîr mi hâwi ka si rawh. Zeitin nang rangah kan sawnh kho lai? Chaknâk leh thaw khawm ka neilo rawh,” ka ti.

¹⁸A hawng ka tleih dîr le, chak dauh hen ka theih.

¹⁹Anih nih, “Pathian nih a nan dâwt, zeikhawm nih a nan dîttir hen a nan lâutir lah seh,” a ti. Hi a sim liau chirah tâwm chak dauh hen ka theih le, kei nih, “Pu sim ding na duh mi chu hawng ka simh. Na ka ṭhattir dauh rawh,” ka ti.

²⁰Anih nih, “Ka hawng nâk san hi na theih ma? Thudik bu ah rîn mi tla na sinah hawng langh ding hen hawng mi ka si. Tuah Persia ram vêngtu vânmifial do ding hen ka kîr awt rawh. Chu nehnûnah Greek ram vêngtu vânmifial a hawng lang lai. Israel vêngtu vânmifial Mikael lo chu âukhawm hawng ka ṭangpitu an um lo.