Read Bawm Chin DANIAL 11 Bible Online

DANIAL 11 - Bawm Chin bible

DANIAL 11

¹Anih chu hawng ka vêngtu leh ṭangpitu ah ruat asi.

²Ka nan simh ding mi thu hi a dik asi,” a ti. Vânmifial nih, “Persia ram ah lal lâirêltu a dang pathum nih lâi an rêl lai le, a palinâk chu a dang tla zawzawng ngâk hen a nei dauh lai. A thiltikhonâk a sâng mi leh a neihnâk ruangah Greek ram chu a zuam lai.

³“Churawhchun lal râlṭha a hawng um lai. Lalram kâu tak tlûnah lâi a rêl lai le, a duh duh hen a ti lai.

⁴Sikhawmsele a thiltikhonâk sâng tak ruangah a ram chu mun li hen a ṭhen lai. Lal tla amah thlâk silo mi tla nih amah mun ah lâi an rêl lai le, sikhawmsele a thuneihnâk hâwi an nei lai lo.

⁵“Aigupta lal chu chak tak hen a um lai. A milian lakah pakhat chu chak dauh hen a um lai le, lalram lian dauh tlûnah lâi a rêl lai.

⁶Kum tamtak nûnah Aigupta lal leh Siria lal chu tlâinâk an nei lai le, a fanu umpi tir ding hen a pêk lai. Sikhawmsele anna tlâinâk chu tam a sâwt lai lo, chu nunau, a pasal, a fa leh to-aw tla a sinah kaltu tla an ektê hen thah hep an si lai.

⁷Chu nehnûn sâwtlotê ah chu nunau ṭapa chu lal a hawng si lai. Siria lal kawrsen tla a do lai le, an kulh sungah a lût khumh na lai le, a neh na lai.

⁸An pathian lem tla leh an pathian tla sinah an ap mi ngûn leh tangka tla chu Aigupta ram leiah a kîrpi lai.

⁹Remnâk a um mi zeimaw zat nûnah Siria lal nih Aigupta a rûn lai le, sikhawmsele khirh ving asi lai.

¹⁰“Siria lal fapa tla nih râltuk ding anna tîm lai le, kawrsen tamtak an pumh na lai. An lakah pakhat nih tîlian hâwi hen a kal lai le, mêlma kulh chu a do lai.

¹¹Aigupta lal chu a ro a thawk lai le, Siria lal chu do ding hen a kal lai le, a kawrsen tamtak a tleih na lai.

¹²A nehnâk leh kawrsen tamtak a thah na mi ruangah thungâi â zûm lai. Sikhawmsele neh kumzatu asi lai lo.

¹³“Siria lal chu a kîr lai le, a lânah mi ngâk hen kawrsen tam dauh a pumh na lai. A tik a hawng tlung rawh chun kawrsen tamtak a timhtuah mi hen a hawng a thawh nawlh lai.

¹⁴Churawhchun mi tamtak chu Aigupta tlûnah an hel lai rawh. Na phun lakah mi siat leh râwktu tamtak an hawng suak lai le, sikhawmsele Danial nih langhnâk a muh mi hâwi hen neh hen an um lai.

¹⁵Churawhchun Siria lal nih kulhnei khua chu a hual lai le, a neh lai. Aigupta kawrsen tla nih an do lai lo rawh le, an lakah a mêchem tla khawm nih tha an nei lai lo rawh.

¹⁶Anmah rûntu Siria mi nih a duh duh hen a ti na lai. Ram tiam ah chun a dîr lai le, amah thiltikhonâk hen â ting hep lai.

¹⁷“Siria lal nih chun a kawrsen zawzawng hen ram ṭawl a tum. A mêlma chu a lalram tla râwk ding hen tlâinâk a siam le, a fanu umpi ding hen a pêk le; sikhawmsele a thiltum chu a tawng lo.

¹⁸Chu nûnah chun phun tla chu tipi kiangah a do na lai le, a neh na lai. Sikhawmsele ramdang minung ruitu nih amah chu an neh lai le, â zûmnâk chu a veih piak lai le; Siria lal zûmnâk chu amah tlûn lîlâ ah a tlungtir lai.

¹⁹Lal chu amah ram ah mi kulh lakah a kîr nawlh lai le, sikhawmsele neh hen a um lai le, amah rangah a dawnghnâk asi lai rawh.

²⁰“Lal dang amah ram neih pungtir ding duh ruangah zapi tla lakah siah khawlh hen nâunehtu dingah hotu fialtu ding mi nih a hawng zûl lai. Sâwtlotê ah chu lal chu thah hen a um lai le, sikhawmsele vântlâng mitmuh leh râltuknâk ah thah mi lam chu asi lai lo.”

²¹Vânmifial nih a simhfiang vima le: “Siria lal a hawng um nawlh ding mi chu misual tak asi lai le, lal silo ding mi lakah ruat lo tak hen a hawng si le, perpet hen thiltikhonâk â ting.

²²Âuzawng amah dotu chu bâwlpu lian sikhawmsele, veih ving ding asi.

²³Remnâk siam hen phun dang tla hen anna kawmh le, a phuntê lakah lâirêl khawmsele a hawng chak dadauh.

²⁴Theihtir kanhnâk neilo thlo hen ram ṭhen lakah mi tla chu a rûn na le, a thlâktu tla âukhawm nih an ti dah lo mi a ti lai, râltuknâk ah thil-le-rî a lâk mi tla chu a hâwi le murui a ṭhenhzâr na, kulh do ding hen a tum le, sikhawmsele a hun chu tuko ah a dawng ving.

²⁵“Kawrsen tamtak a pumh na lai le, Aigupta lal a kawrsen tamtak leh thiltikho tak amah do ding tumtu chu do a tum. Sikhawmsele Aigupta lal chu perpet hen a um lai le, a neh lai lo.

²⁶A thuptê hen amah krai pêktu nih a râwk dep lai, a kawrsen tamtak thah hen an um lai le, an vei hep lai.

²⁷Churawhchun lal panih dawhkân ah buh ei ding an to vevê lai le, sikhawmsele an thiltum chu a sia lai, âwkrâwl anna simh tawnh lai. An duh mi khawm an tawng vevê lai lo, a tik a tlung lo rih ruangah.

²⁸Siria lal chu râltuknâk ah sum a lâk mi hen in leiah a kîr le, Pathian mi tla phung râwk piak na ding a tum, amah duh duh hen thil a ti lai le, a ram leiah a kîr lai rawh.

²⁹“A nehnûnah Aigupta khawm a rûn nawlh le, sikhawmsele chu tan chu thungâi thil a hawng a dang.

³⁰Rom sawrkar chu lawng hen an hawng lai le, amah an do hen an thi lai. “A thin a thawk lai le, Pathian mi tla phung chu râwk ding a tum lai. Chubang phung kaltâktu minung tla thu chu a ngâi lai.

³¹A kawrsen zeimaw mi nih Biakin an nawmh lai, nisiar bâwlnâk tla an khap lai le, thil ṭihnungkâi a siah lai.

³²Perpet hen lal chu phung thu kaltâktu tla nih an neh na le, sikhawmsele Pathian zûltu tla nih an do rûl lai.

³³Mifing ruitu tla nih midang tamtak tla rangah an finghnâk an ṭhenh na bâk lai. Sikhawmsele, sâwtlotê kar chu a zeimaw mi chu râltuknâk ah an thah lai le, a zeimaw mi mei hen thi thlo an duah lai le, a zeimaw mi rêngin ah an thlâk na lai.

³⁴Chu hâwi hen thahnâk a um liau chirah Pathian mi tla nih chun mah mâi sial mi zûltu tamtak um na menza khawmsele ṭangpinâk tâwm an tawng lai.

³⁵Ruitu fing zeimaw mi thah hen an um lai le, sikhawmsele chu zârah mi tla rang chun thiangnâk lam asi lai. Pathian nih hun a ruat mi a dawng lân lo chu, chu chu a um vima lai.

³⁶“Siria lal nih amah thu thu hen thil a ti lai. Zei pathian zawng, Pathian rokual chem khawm, Pathian rokual tak ngâk khawm hen lian dauh a ruat hen â khâwng lai. Pathian nih a rêpnâk tik a tlung lân lo chu, chubang chu a tikho lai. Pathian nih a thiltum mi hâwitê a ti lai.

³⁷Lal nih amah thlâktu tla pathian rianṭuan leh nunau tla khawm nih an dâwt mi a siar lai lo. “Âuzawng ngâk hen lian dauh hen â ruat ruangah pathian kip zeikhawm a siar awt lo.

³⁸Chu hâwi um ngâk hen kulh humtu pathian rangah a zah lai. Amah thlâktu tla nih an sawnh dah lo mi pathian sinah thilpêk ngûn, tangka, lungsung leh thil dang neih leh siahnâk a pêk lai.

³⁹A kulh tla hum ding hen ramdang pathian sawnhtu tla a mang na lai, amah rangah lâirêltu ding hen duhtu tla rangah zahkâinâk a pêk na lai le, rianṭuannâk sâng tak a pêk na lai le, ram tla a pêk na lai.

⁴⁰“Siria lal dawnghnâk chu a hawng tlung dêng rawh le, Aigupta lal nih amah chu a do lai le, Siria lal khawm nih a kari tla, a rang tla, a meilawng tla mang hen a do bâk lai. Ram tamtak chu tîlian tlung mi hâwi hen a do na lai.

⁴¹Ram tiam men a do na le, sâng tamtak a thah na lai le, sikhawmsele Edom ram, Amon relh mi tla chu an âwl lai.

⁴²Chubang ram tla a do tik chun Aigupta men a âwl lai lo.

⁴³Aigupta ram ah ro thuh mi tla, ngûn leh tangka tla leh a thilneih man tamtak tla a lâk lai. Libia leh Sudan khawm a neh lai.

⁴⁴Churawhchun saklei thawk leh marlei thu a hawng tlung mi nih lâunâk a pêk lai le, thinthawk tak bû a do hen minung tamtak a thah na lai.

⁴⁵A lal puanin tla khawm Biakin tlâng leh tipi karah a zâr lai. Sikhawmsele chunah âukhawm ṭangpitu umlo hen a thi lai,” a ti.