Read Bawm Chin DANIAL 12 Bible Online

DANIAL 12 - Bawm Chin bible

DANIAL 12

¹Puan nêm aih mi vânmifial nih, “Chu tik chun na mi tla vêngtu vânmifial rokual tak Mikael a hawng lang lai. Churawhchun lawksawngnâk tik a hawng um lai le, phun tla a hawng um dawmhnâk hen a fâk chem mi asi. Chun hun chu a hawng tlung tik chun na mi tla Pathian lasuibu lakah an min rîn hen a um mi vial an him lai.

²Chu lakah mi tamtak thi rawh mi tla an hawng nung nawlh lai: a zeimaw mi chu zungzâl nungnâk ah anna lâwm lai le, a zeimaw mi chu zungzâl ningzaknâk an tuar lai.

³Ruitu fing chu vân a mi chêunâk zawzawng hen an chêu lai le, mi tamtak thil ti ding hen sîntirtu chu ârfi hâwi hen an chêu kumza lai,” a ti.

⁴Anih nih chun ka sinah, “Tuah, Danial, lasuibu kha zual le, laikulh dawngh tiang hen singsiahnâk siam. Chu liau chir chun mi tamtak nih thil hawng um mi theih ding hen anna ṭang lai le, sikhawmsele anna ṭangnâk chu a thawt asi lai,” a ti.

⁵Churawhchun, minung panih, pakhat chu khatlei kapah, pakhat chu khatlei kâng kapah dîr mi ka muh.

⁶Chu minung pakhat dauh nih chun thu a deih le, “Hi thilchê a hawng tlung mi tla hi zeitiang ding me asi awt?” a ti.

⁷Chu vânmifial nih chun a kut vân leiah zangh bû hen zungzâl Pathian min hen thu bir tak hen a tiam. A thusim ka theih mi chu, “Kum thum leh a khing asi lai. Pathian mi tla nehsawhnâk a dawng tikah chubang thil zawzawng tla hi a hawng tlung lai,” a ti.

⁸A thusim chu ka theih le, sikhawmsele a ngaihtawnh dân ka thiam lo. Churawhchun kei nih, “Sikhawmsele, Pu, chubang zawzawng chu zei hâwi hen a hawng dawng awt?” ti hen ka deih.

⁹Anih nih hawng ka sâng le, “Danial, hi thu tla a thuptê hen kil hen, laikulh dawnghnâk a hawng tlung lân lo chu thuh thlir ding asi ruangah tu chun kal ko rih.

¹⁰Mi tamtak anna thianh lai. Misual tla nih an theihthiam lai lo le, sual leiah an kal vima lai; a fing mi tla cho nih an theihthiam lai.

¹¹“Nisiar bâwlnâk khap hen a um mi thawk hen, chu chu ṭhiautu Fihnungkâi hun ni sâng khat zanih sâwm kua a len tiang hen.

¹²Ni sâng khat leh zathum leh sâwmthum panga len tiang hen zumhkâi hen umtu tla chu an thaw a suak.

¹³“Danial, nang lam chu a dawngh tiang hen zumhkâi hen um rawh. Na thi lai le, sikhawmsele na lâwmman tawng ding hen tik dawnghnâk ah na thawk lai,” a ti.