Read Bawm Chin DANIAL 3 Bible Online

DANIAL 3 - Bawm Chin bible

DANIAL 3

¹Lalchem Nebukadnezar nih ngûn milem a nei le, a sânglei feet 20, a lianh lei feet 9 tling dêng asi. Babulon ram ṭhen Dura phâi ah a siah.

²Churawhchun lal nih a rianṭuantu tla zawzawng, lal tla, governor, leutanant governor, commissioner, tangka kiltu tla, lâirêltu tla, Magistrate leh ram ṭhen lakah mi rianṭuantu zawzawng hawng ver ding hen thu a pêk. Lal Nebukadnezar nih milem a siah mi apnâk ah kal chiau ding asi.

³Chubang rianṭuantu zawzawng tla chu apnâk ah an hawng a pûm le, milem mâika ah an dîr,

⁴hâu fâk tak hen thu phuangnâk a um le, “Phun zawzawng lakah mi tla, chi-le-kuang mi tla, hawlh chikip tla!

⁵Tâwtawrâwt hâu nan theih lai le, theikhang, rîrâwt, ṭingṭang, harmoniam tla nih a zûl lai le, churawhchun tumphung dang tla nih a zûl lai; chu hâwi tumphung tla an hawng dawmh kâ hen Nebukadnezar nih ngûn milem a siah mi chu nan mâimûk hen nan sawnh ding asi.

⁶Âuzawng mâimûk hen sawnhlotu chu meihum lakah lawnh sawm asi lai,” ti hen an phuang.

⁷Churawhchun, tumphung hâu an theih kâ hen, phun zawzawng, chi zawzawng leh hawlh kip hawlhtu tla nih Nebukadnezar nih a siah mi ngûn milem chu an mâimûk le, an sawnh.

⁸Churawhchun Babulon mi tla nih Juda mi tla sâwinâk ding hen tik ṭha an tawng rawh.

⁹Lal Nebukadnezar sinah, “Bâwipa, dam kumza rawh!

¹⁰Nang lal nih tumphung rihâu theih asi kâ hen, mikip nih ngûn milem chu mâimûk hen sawnh ding asi,

¹¹Chu lakah kûn hen mâimûk duhlotu vial chu meipi lakah lawnh ding an si ti hen thu na suah.

¹²Juda lakah mi Babulon ram ṭhen ah hotu ah na siah na mi: Sadrak, Mesak leh Abednego tla nih na thupêk an ngâi lo, na pathian khawm an sawnh lo, milem na siah mi khawm an mâimuk lo,” an ti.

¹³Chu kâ hen lal chu thungâi a thin a thawk le, minung pathum chu hawng put na ding hen thu a suah.

¹⁴An sinah, “Sadrak, Mesak leh Abednego, ngûn milem ka siah mi sawnh hen nan mâimûk duh lo an ti mi hi a dik ma?

¹⁵Tuah, thil tumphung, theikhang, rirâwt, ṭingṭang, harmoniam hâu leh tumphung dang rihâu theih asi kâ hen milem mâimûk ule, sawnh u, nan tilo mi asi chun meihum lakah lawnh sawm nan si lai, nanmah sanhtu pathian um hen ma nan ruat?” a ti.

¹⁶Sadrak, Mesak leh Abednego nih an sâng le, “Bâwipa, mah a hum ding kan tum lo.

¹⁷A rian kan ṭuan mi Pathian nih meihum lakah mi leh na thiltikhonâk lakah mi hawng kan hum kho asi, amah nih a ti ko lai.

¹⁸Sikhawmsele, a ti lo khawmah lal nih ngûn milem na siah mi na pathian chu kan mâimûk hen kan sawnh awt lo ti theih rawh,” an ti.

¹⁹Nebukadnezar chu a thinthawk tuk ah a mêl sen rê hen, Sadrak, Mesak leh Abednego tla a zauh na, churawhchun a mi tla rangah meihum chu a leh sarih hen fâk dauh ding hen a tuahtir na.

²⁰A kawrsen lakah michak chem tla chu, chu minung pathum tla chu ṭêm hen meihum lakah lawnh ding hen thu a pêk.

²¹Churawhchun an nipuan thuamhnâk kawrdawh, lukhuh tla hen an ṭêm na le, meihum lakah an lawnh na rawh.

²²Churawhchun meihum chu lal thupêk khauh ruangah a sa tuktarâi le, meihum lakah minung lawnhtu kawrsen chu mei nih a khangh ving.

²³Chun, Sadrak, Mesak leh Abednego chu mei sungah phuar pang hen an rîl ko.

²⁴Mawhsareh hen Nebukadnezar chu chê a ti tuk ruangah a hawng thawk sawm, a rianṭuantu tla sinah, “Minung pathum kha phuar bû hen meihum ah nan lawnh na mi asi lo ma?” a ti. Annih nih an sâng le, “Si ta a, Bâwipa, kan phuar ta a,” an ti.

²⁵Lal nih, “Zei zia mesi, mei lakah minung pali zî lemang hen ka muh na ne? Phuar hen khawm an lang lo, nganfâk tuar hen khawm an lang lo, a palinâk chu pathian ko a bangh,” a ti.

²⁶Churawhchun Nebukadnezar chu meialh kiangah a va kal le, “Sadrak! Mesak! Abednego! Chungnungchem Pathian to-aw tla! hawng suak u!” ti hen a âuh na. Churawhchun an suak sawm rawh.

²⁷Lal zawzawng, governor tla, leutanant governor tla leh lal rianṭuantu dang tla lal nih a pumh na mi zawzawng nih chu minung pathum zeikhawm an pawi lo mi chu an zauh. An sam khawm a kir lo, an nipuan khawm a kâng lo, mei rim khawm an nam lo.

²⁸Lal nih, “Sadrak, Mesak leh Abednego Pathian chu sawr hen um seh. Hi minung tla amah lungtu hum ding hen a vânmifial a hawng fial, ka thupêk khawm an ngâi lo le, anmah Pathian lo chu zei pathian khawm an mâimûk lo ruangah an nungnâk chu ruangsuah hen an um.

²⁹Tuah âuzawng zei phun leh zei chi zawng, hawlh kip tla khawm nih Sadrak, Mesak leh Abednego Pathian zahlotu chu, an kut kê thlêk ver hen, a in chu nâwmpawng ah siam asi lai, hi hâwi hen ruangsuahtu dang a um lo,” a ti.

³⁰Churawhchun lal nih Sadrak, Mesak leh Abednego chu Babulon ram ṭhen ah sâng dauh ah a siah na.