Read Bawm Chin DANIAL 4 Bible Online

DANIAL 4 - Bawm Chin bible

DANIAL 4

¹Lal Nebukadnezar nih laikulh ah phun kip leh chi kip leh hawlh kip sinah hi thuchah hi a thanh na: “Chibai!

²Pathian rokual nih thilchê tla thilchê ti tla a hawng ka muhtir mi ngâi u.

³“Pathian nih thilchê hawng kan muhtir mi chu a rokaul châwk a! A thilchê ti tla chu a fâk a! Pathian chu lal asi kumza lai le, zeiliau zawngah lâi a rêl kumza lai.”

⁴“Ka umnâk mun ah ka vânṭhatnâk nuamchenh hen thlangam tak hen ka um.

⁵Sikhawmsele ka it karah mang ṭihnungkâi leh langhnâk ṭihnungkâi ka muh.

⁶Babulon ram sungah lal krai pêktu tla zawzawng ka mang umzia simhfiang ding hen ka sinah hawngpi na ding hen thu ka suah.

⁷Churawhchun, chamchawh thiam tla, mitdâwi thiam tla, dâwithiam tla, vân leikâng theihtu tla chu an hawng le, ka mang ka simh na, sikhawmsele an hawng ka simhfiang kho lo.

⁸Churawhchun Danial a hawng rawh, (anih chu ka pathian min put hen Beltesazar ti hen sak asi) pathian tla thenhlimh thlarau a lakah a um le, zei mang ka manh ti hen ka deih le, a sinah:

⁹Beltesazar, chamchawh thiam lakah a lû chem, pathian tla thlarau thenhlimh na sinah a um ti ka theih. Thuthup zawzawng theihtu na si, hi hi ka mang chu asi: A umzia hawng ka simh rawh.

¹⁰“Ka it karah tual lâi chirah thing lian tak langhnâk lakah ka muh.

¹¹Chu thing chu a lian dadauh le, vân a tawngh khet, laikulh mikip nih muh kho hen a um.

¹²A nah tla chu thungâi â dawh le, laikulh pumpi ei khawp ding hen kûr ût hen a rah, ramsa tla chu a dâidul ah anna dîn le, va tla nih a ngê lakah bû an khuar le, thilnung chi kip nih a rah an ei.

¹³“Chu langhnâk thu ka dawn liau chirah vânmifial râlring leh tîm chia zet hen vân thawk hen a hawng ṭum mi ka muh.

¹⁴Chu nih chun hâu fâk tak hen thu a sim le, “Thing kha hâu ule, a ngê tla thlangh ule, a nah thlawngh ule, a rah tla vawrh phin u, a tangah mi ramsa tla leh a ṭeng lakah mi va tla dâwi phin na u.

¹⁵Sikhawmsele a kûng bul chu thîr leh dâr hen banh ule, phâisen ah bua nâwngah siah thlap u. “Chu minung chu dâm nih tlâk nawh sele, ramsa leh belh lakah um seh.

¹⁶Kum sarih kar chu minung thinlung a put lai lo le, ramsa thinlung a put lai.

¹⁷Chu chu vânmifial tîm chia zet leh râlring zet mi thu suah asi. Chu tikah mun kipah mi tla nih Pathian rokual nih minung lalram tlûnah thu a nei mi leh âutal mi mêchem khawm a herh hen a thîm mi chu a pêk na kho ti an theih lai rawh.”

¹⁸‘Lal Nebukadnezar nih hi hi mang ka manh mi chu asi, Beltesazar, a umzia tuah hawng ka simhfiang rawh ne, lal krai pêktu âukhawm simfiang khotu an um lo, nang lam chu Pathian thenhlimh thlarau a um ruangah na hawng ka simh kho asi,” a ti.

¹⁹Chu thu a theih rawh chun Danial, Beltesazar an ti mi chu, thungâi a thinlung a nawk le, zeikhawm a sim kho lo. Lal nih a sinah, “Beltesazar, mang thu nih a nan nawktir lah seh,” a ti. Beltesazar nih a sâng le, “Bâwipa, mang chu nangmah lakah silo hen na mêlma tla lakah tlung sele ka duh.

²⁰Thing chu a sâng tuktarâi le, vân a tawngh mi chu laikulh mikip nih muh kho asi,

²¹a nah tla chu thungâi â dawh le, laikulh pumpi châwm kho ding hen rah a suah, ramsa tla a tangah anna dîn le, va tla nih a ngê lakah bû an khuar.

²²Bâwipa, thing sâng tak leh khauh tak chu nangmah na si, nang chu na rokual tuk le, vân na tawngh, na thiltikhonâk hen laikulh pumpi a khat.

²³Na ngâichâng liau chirah vân thawk hen a hawng ṭum mi nih, “Thing chu hâu ule, râwk dep u, sikhawmsele a kûng bul chu tual ah siah u. Thîr leh dâr hen banh u, phâisen bua nâwngah siah thlap u, chu minung chu dâm tlâktir ule, ramsa tla lakah kum sarih kar umtir u.”

²⁴“Chu chu a umzia chu asi le, Pathian rokual nih na lakah a hawng tlung ding zia a sim mi chu asi.

²⁵Minung thawk hen nar hen na um lai le, ramsa lakah na um lai, kum sarih sung chu chawchal hâwi hen belh na ei lai le, lêng ah dâm tlâknâk ah na it lai, churawhchun Pathian rokual nih lalram tlûnah thu a neih zia leh a duh mi sin zawngah a pêk kho ti na theih lai rawh.

²⁶Vânmifial tla nih a kung bul chu tual ah siah thlap ding hen thu an pêk mi umzia chu Pathian nih laikulh zawzawng ah lâi a rêl ti na theih tikah lal na si nawlh lai, tinâk asi.

²⁷Churuangah Bâwipa, ka thusim hi ngâi rawh. Sual thilti bâng le, thil dik ti rawh, mipâm tla lakah khuaruat. Chu tikah na sul-le-lam a tluang lai,” a ti.

²⁸Chu zawzawng chu lal Nebukadnezar tlûnah a hawng tlung rawh.

²⁹Thla leinih si nûnah Babulon ah a lal in tlûnah a zî lemang liauah,

³⁰“Babulon hi a rokual châwk a! Ka thiltikhonâk leh ka chaknâk, ka rokualnâk leh ka lalnâk a langnâk ding hen ka khuapi rangah ka siam mi asi,” a ti.

³¹Chu hâwi hen a hawlh liau chirah, vân thawk hen âu hâu a hawng suak le, “Lalchem Nebukadnezar, ka thusim hi ngâi rawh! Na lal thiltikhonâk chu na sinah mi lâk ving asi rawh.

³²Minung thawk hen nar na si lai le, ramsa hen mun khat hen nan um lai le, chawchal tla hâwi hen kum sarih kar belh na ei lai, chu tikah Pathian rokual, nih minung lalram tlûnah thu a neih zia leh a duh mi âu sin zawngah a pêk kho ti na theih lai,” a ti.

³³Chu thu chu mawhsareh hen a hawng tlung taktê rawh. Nebukadnezar chu minung lakah mi nar hen a um le, chawchal hâwi hen belh a ei rawh, a tak chu dâm nih a tlâk nawh le, a sam tla chu mupi mul tla hâwi hen a sâu le, a tin khawm va tin hâwi hen a sâu.

³⁴Lal nih, “Kum sarih a hawng vei rawh chun, vân lei ka zauh le, ka thinlung ah theihnâk a hawng kîr nawlh. Pathian rokual chu ka sawr le, zungzâl um kumza mi sinah zahnâk leh rokualnâk ka pêk. “Anih nih lâi a rêl kumza lai le, a lalram chu zeiliau zawngah a um kumza lai.

³⁵Tual tlûnah mi tla chu zeikhawm ah a ruat na lo le; vân ah mi vânmifial tla leh tual tlûnah mi tla chu amah thu thu hen an um. Amah dotu leh a thilti sâwi khotu âukhawm an um lo.

³⁶“Ka theihnâk a hawng kîr nawlh rawh chun zah ka kâinâk, lal ka sinâk, ram lakah ka rokualnâk tla ka sinah pêk nawlh hen a um. Ka milian leh ka rianṭuantu tla nih an ka lawmh le, ka lal thiltikhonâk chu a lân ngâk hen zah a kâi dauh.

³⁷“Tu chun, kei Nebukadnezar nih Vân Lalchem chu ka sawr hen ka zah hen ka chawnglawmh rawh. Thil a ti mi zawng chu a dik hen a rep, zûm tak hen thil titu tla chu âuzawng a nâutir kho,” a ti.