Read Bawm Chin DANIAL 8 Bible Online

DANIAL 8 - Bawm Chin bible

DANIAL 8

¹Lalchem Belsazar a lalnâk kum thumnâk ah langhnâk a veinihnâk ka muh.

²Keimah khawm Elam ram ṭhen Susa khuapi kulh mi khuapi sungah um hen ka theih sawm. Ulai Tiva kapah ka dîr le,

³chu tiva kapah chun dawrâ chal ka muh le, chu dawrâ chal nih ki sâu tak panih a nei, pakhat chu pakhat dang ngâk hen a sâu dauh hen a thar dauh.

⁴Ka zauh ko le, a ki hen thlanglei, marlei leh simlei a suk, zeitin mi ramsa khawm nih a thiltikhonâk lakah mi chu an do kho hen an suak kho lo. A duh duh hen a um le, a lung a khungtir dadauh.

⁵Zei zia mesi ti hen ka dawn thlo liauah kêl chal pakhat thlanglei thawk hen a hawng tek le, a chak tuktarâi le, a kê nih tual khawm a tawngh lo. A mit panih kar chirah ki fawngvut mi pakhat a nei.

⁶Dawrâ chal tiva kapah mi ka muh mi chu a va fûk le, a tha zawzawng suah hep hen a va nam le,

⁷chu dawrâ chal a suk mi chu ka zauh ko, a thinthawk tuk le, a hawng suk chiam le, a ki panih a khiak piak ving. Dawrâ chal nih do ding hen chaknâk a nei lo rawh. Tual ah a rilh thlo le, a chîl dep le, âukhawm amah humtu ding pakhat khawm an um lo.

⁸Chun, kêl chal chu a lung a khungtir dadauh le, a thiltikhonâk sâng tak nih a ki chu a khiak ving. Chu a kiak mi mun ah chun ki sâu tak pali a hawng kho le, mun dang chiau an khît.

⁹Chu ki pali tla lakah ki metê a hawng kho le, a thiltikhonâk nih simlei, saklei leh ram tiam leikâng a dêng khet.

¹⁰Vân ah mi kawrsen tla do kho rê hen a hawng chak le, ârfi tla tiang men zeimaw zat tual ah a thlâk na le, a lamhbêk na.

¹¹Vân kawrsen hotu men a zuam le, nisiar hen a sinah bâwlnâk ap mi tla a khap hen Biakin a nawmh.

¹²Mi nih bâwlnâk nisiar khuah tak hen ap mi tla lei ngâk hen sualnâk leikâng an kal dauh le, phung dik chu tual ah lawnh hen a um. Chu ki nih thil a ti mi zawng chu a dingchang vima.

¹³Vânmifial pakhat nih a dang rangah thu a deih mi ka theih le, “Hi langhnâk lakah mi thil tla hi zeitiang me a um vima awt? Hi nisiar bâwlnâk hi zeitiang hi sualnâk ṭihnungkâi nih a luah awt? Vân ah mi kawrsen tla leh Biakin chu zeitiang riamruam me lamhbêk hen a um awt?” a ti.

¹⁴Vânmifial dang nih a hawng sâng mi ka theih le, “Zînglei leh zânlei bâwlnâk ap lo hen a um kar ni sâng khat leh zâ leh sâwmnga kar vial chu a hawng um lai. Chu tikah Biakin chu dirh nawlh asi lai,” a ti.

¹⁵Chu langhnâk umzia chu theih ding ka tum liauah minung pakhat âumawh ka mâika ah mawhsareh hen a hawng dîr sawm.

¹⁶Ulai Tiva tlûnlei ah chun aw-hâu ka theih le, “Gabriel, kha minung nih a muh mi kha simhfiang,” a ti.

¹⁷Gabriel chu a hawng le, ka kiangah a hawng dîr, ka ṭih tuktarâi le, tual ah ka tlû thlo. Anih nih ka sinah, “Thikho mi minung, a umzia hi theih rawh. Hi langhnâk hi laikulh dawnghnâk leikângah ti ding mi asi,” a ti.

¹⁸Thu a sim liauah chun lungfianglo hen ka â thlo. Sikhawmsele anih nih hawng ka tleih le, ka kê hen hawng ka dîrtir le,

¹⁹ka sinah, “Pathian thinthawknâk um ding mi ka nan zauhtir mi asi. Hi langhnâk nih hun dawnghnâk leikâng a zauhtir.

²⁰“Dawrâ chal ki panih nei na muh mi chu Media leh Persia ram lal zauhtirnâk asi.

²¹Kêl chal na muh mi nih chun Greek lalram zauhtirnâk asi le, a mit karah fawng vat mi ki chu lal masachem asi.

²²A masa mi ki a kiak ving le, ki pali a hawng kho mi chu lalram pali, phun tla ṭhenkhuai hen a um ding mi a zauhtir. A tîr mi lalram hâwi hen a bir lai lo rawh.

²³“Chubang lalram tla dawnglei kângah chun, an sual zia a fâk lai, rêp hen an um lai, lal lungkhung leh sual tak leh perpet mang a hawng um lai rawh.

²⁴A chak thlo lai le, khawmsele amah chaknâk tak asi lai lo, siatnâk ṭihnungkâi tatak a tlungtir lai le, a thilti zawzawng chu a dingchang vima lai. Mi thiltikho tak tlûnah leh Pathian mi tla tlûnah siatnâk a tlungtir lai.

²⁵Krai thiam tak asi ruangah a perpetnâk ah chun a dingchang vima lai, thungâi hen â zûm lai le, zeikhawm simhkannâk umlo hen mi tamtak a veih na lai, lal zawzawng lakah a lianchem mi men a zuam lai le, sikhawmsele minung thiltikhonâk manglo hen veih hen a um.

²⁶Zînglei leh zânlei bâwlnâk langhnâk ah na muh mi thu chu na sinah simhfiang hen a um mi chu a hawng tlung ngelchel lai. Sikhawmsele hun sâwt ual tikah a hawng tlung ding mi asi ruangah na thinlung ah a thuptê hen kil ziar ko,” a ti.

²⁷Ni zeimaw zat ding chu ka damlo le, ka uai thlo. Sikhawmsele, a thawk le, lal nih ṭuan ding hawng ka ruat mi ṭuan ding hen ka kal nawlh le, sikhawmsele langhnâk ruangah ka thinlung a nawk le, theihthiamnâk ka nei kho lo.