Read Bawm Chin DANIAL 9 Bible Online

DANIAL 9 - Bawm Chin bible

DANIAL 9

¹Mede mi Darias, Zerzes fapa nih Babulon ram tlûnah lâi a rêl.

²A lal kum a kum khatnâk ah khuavâng Jeremia rangah LALPA nih a simh mi hâwi hen kum sâwmsarih ah Jerusalem a râwk ding mi thu lasuibu ah mi chu ka rêl.

³Buh ngei hen salâpuan aih hen, vachâm lakah ka to le, LALPA Pathian sinah ṭhanem semsê ngâi tak a ngiar bû hen thla ka cham.

⁴LALPA, ka Pathian sinah thla ka cham le, ka mi tla sualnâk thutluang ka vâwr. “LALPA, Pathian, nang chu na rokual le, ka nan zah asi. Nang chu na thutiam lakah zumh na kâi le, a nan dâwttu leh na thupêk hâwi hen thil titu tla sinah chun na dâwtnâk dawnglo na zauhtir na.

⁵“Thilsual kan ti le, thil diklo kan ti. Thu na kan pêk mi tla chu ti ding kan duh lo le, thil dik na hawng kan muhtir mi chu kan hertâk.

⁶Na to-aw khuavâng tla nih na min hen kan lal tla leh lâirêltu tla, hawng kan thlâktu tla leh kan phun zawzawng tla sinah thu an sim mi chu an ngâi duh lo.

⁷LALPA, nang lam chu thil dik na ti kumza le, sikhawmsele kannih chu kanmah karo ningzak kanna saih kumza. Na lakah kan diklo rawh ruangah, Israel tla ram nâi leh ram lât ah na rekrâwi tir mi zawzawng tla leh Judai ram leh Jerusalem ah um mi zawzawng tla chu kanna bang hep.

⁸LALPA, kan lal tla, kan lâirêltu tla leh hawng kan thlâktu tla nih na lakah ningzakkâi tak hen thilsual an ti asi.

⁹Na lakah hel menza khawmsele, kan lakah khua na ruat hen na kan ngaihdam.

¹⁰LALPA, kan Pathian, na to-aw khuavâng mang hen dân na hawng kan pêk mi hâwitê a um ding na kan simh liau khan na thu kan ngâi duh lo.

¹¹Israel tla zawzawng nih na dân tla an buar le, na thusim an ngâi duh lo, na lakah thilsual kan ti le, churuangah na to-aw Mosi dân ah rîn mi tla siat chu kan lakah na tlungtir.

¹²Kanmah leh kan lâirêltu tla sinah ti ding hen na sim mi chu na ti tâwn. Mosi dân lakah rêpnâk zawzawng rîn hen a um mi tla chu khua dang tla ngâk hen Jerusalem ah mi na rêpnâk a fâk dauh, sikhawmsele

¹³LALPA, Pathian, tutiang khawmah kan sual tla lêt hen thudik zûl hen nangmah lawmhtir kan tum lo nget rih.

¹⁴LALPA, kan Pathian nangnih rêp ding na kan awt le, na thu kan ngâi duh lo ruangah leh thil dik titu na si kumza ruangah na kan rêp.

¹⁵“LALPA, kan Pathian, na mi tla Aigupta ram thawk hen na suah mi lakah na thiltikho zia na langh le, na thiltikho zia chu theih asi kumza asi. Thilsual kan ti le, thil diklo kan ti.

¹⁶A lânah chun nangmah vêng mi kan si, churuang chun Jerusalem tlûnah na thinthawk lah rawh. Na khuapi leh na tlâng thenhlimh asi. Kan thlâktu tla nih thilsual an ti ruangah kan kiangkam ram minung zawzawng tla nih Jerusalem leh na mi tla an zauhnawmh.

¹⁷Pathian, thla ka cham mi leh ka nan ngiar mi hi ngâi rawh. Na Biakin â râwk mi chu dirh nawlh rawh, mikip nih Pathian na si zia an theihnâk ding hen.

¹⁸Pathian, hawng kan ngâi le; hawng kan zauhnik, kan lawksawng zia leh na min puttu khuapi nih a tuar zia hi theih rawh. Thildik kan ti mi ruangah silo hen, khuaruattu na si ruangah, na sinah thla kan hawng cham asi.

¹⁹LALPA, hawng kan ngâi rawh, LALPA, hawng kan ngaihdam rawh, LALPA, hawng kan ngâi le, thil ti rawh! Pathian na si zia mikip nih theih ding hen, tlâi lo hen ti rawh! Hi khuapi leh minung tla hi na tâ an si,” ka ti.

²⁰Thla ka cham vima le, keimah sualnâk leh Israel mi tla sualnâk thutluang ka vâwr le, LALPA, ka Pathian sinah Biakin dirh nawlh ding hen ka ngiar.

²¹Thla ka cham liau chirah a lânah langhnâk ah ka muh mi Gabriel chu, zuang hen ka umnâk ah a hawng. Zânlei bâwl tik asi.

²²Anih nih hawng ka simhfiang le, ‘Danial, simhkannâk thu na theihthiam ding hen ṭangpitu ah hawng mi ka si.

²³Pathian sinah na ngiar mi chu na dawmh liauah an sâng vima rawh. A nan dâwt le, churuangah a sângnâk a nan simh ding hen ka hawng mi asi. Langhnâk ka simhfiang mi chu tuah ngâi set.

²⁴“Hun sarih, kum sâwmsarih chu sual lo thlo hen khuapi thenhlimh leh na mi tla an um ding mi a sâwt kar zawng Pathian nih a ruat mi zat asi. Sualnâk chu ngaihdam asi lai le, repnâk chu birhtir asi lai, chu tikah langhnâk leh simhkannâk chu a dik lai rawh, Biakin thenhlimh khawm ap nawlh asi lai rawh.

²⁵Hi hi singsiah le, theihthiam rawh, Jerusalem sak nawlh ding hen thu pêknâk thawk hen Pathian nih ruitu a thîm mi a hawng tiang chu hun sarih leh kum sarih a ral lai. Jerusalem chu a khua lâi leh a kulh hen sak nawlh asi lai le, hun sarih leh kum sâwmruk leh kum nih kar a dîr lai, sikhawmsele chu chu nawknâk hun asi lai.

²⁶Chu chu hun dawngh ah chun Pathian nih ruitu a thîm mi chu dik lo tak hen thah hen a um lai. Lâirêltu thiltikho tak rûntu kawrsen tla nih khuapi leh Biakin khawm an râwk lai. A dawnghnâk chu tîlian hâwi hen Pathian nih a timhtuah mi râltuk leh siatnâk a hawng tlung lai.

²⁷Chu lâirêltu chu mi tamtak hen kum sarih sung chu remnâk an siam lai le, chu chu hun khingkhuai a kal rawh chun bâwlnâk leh thil ap a khap lai rawh, thil ṭihnungkâi Biakin tlûnah siah hen a um lai le, Pathian nih a rangah a siam piak mi a dawnghnâk tlungtirtu ding mi hen anna tawng tiang chunah chun a um kumza lai.