Read Bawm Chin HOSEA 4 Bible Online

HOSEA 4 - Bawm Chin bible

HOSEA 4

¹LALPA nih hi ram ah um mi tla tlûnah simsâwinâk a hawng tlungtir awt. Israel, thu a sim mi chu ngâi rawh, “Ram lakah mi zumhkâi leh dâwttu âukhawm an um lo, mi tla nih Pathian ah khawm an hawng ka ruat lo.

²Thu an tiamh le, an buar lîlâ, âwkrâwl an sim, mi an thah, an fîr, ṭângdang an pawm, buarnâk a pung, pakhat leh pakhat thahnâk a um.

³Churuangah ram chu a châr lai le, a tlûnah um mi thil zawzawng a thi lai. Ran zawzawng leh va tla, nga tiang an thi lai,” a ti.

⁴LALPA nih, “Âukhawm nih mi zapi tla sâwi na hen lehrûl sam lah na seh, nannih bâwlpu lakah hin lungsilonâk ka nei.

⁵Sûn leh zân hen mi nan râwk le, khuavâng tla khawm nannih ngâk hen an ṭha khun lêm lo. Israel, nan nu ka veih awt.

⁶Ka mi tla chu an hawng ka theih lo ruangah an vânduai asi. Nannih bâwlpu tla, hawng ka theih ding nan duh lo hen kan sîntir na nâk khawm nan duh lo, churuangah nannih khawm kan nawng na, nan fapa tla khawm bâwlpu si ding hen kan theih na awt lo rawh.

⁷“Nan lakah bâwlpu an tam bilik leh ka lakah nun sualtu nan tam; churuangah zah nan kâinâk chu nan rangah ningzakkâinâk ah ka siam lai.

⁸Ka mi tla sual chu nan rangah neih phahnâk ah nan mang le, churuangah sual dadauh ding hen nan duh na.

⁹Mi nih rêp an tawng mi hâwitê nan tawng bâk lai. Sualnâk nan ti mi ruangah rêpnâk a man kan pêk na awt.

¹⁰Bâwlnâk ah nan vo nan ei lai le, sikhawmsele nan khim lo nget lai. Pathian dang zûl ding duh hen nan ka hertâk ruangah, thlâi ṭhattirtu pathian chu nan sawnh lai le, sikhawmsele fa tla nan nei lai lo,” a ti.

¹¹LALPA nih, “Uain, a li mi leh a thar mi nih ka mi tla thinlung a veih!

¹²Thing phel tla rangah thu an deih le, ṭhianṭhunh nih an duh mi thu a simh na! Kei lam chu an ka nawng, nunau â zuar mi hâwi hen pathian dang tla sinah anna pêk.

¹³Tlâng sâng tak tlûn mun thenhlimh ah bâwlnâk an ap le, tlâng tênâu tlûn tla ah chun a dâidul a nuam ruangah thing sâng a thlaliah tangah rimthâw tla an duah. “Churuangah chun nan fanu tla chu anna zuar le, nan monu tla khawm nih ṭângdang an pawm.

¹⁴Sikhawmsele, chu mi ruangah annih tla chu ka rêp na awt lo, nanmah ngelchel khawm â zuar mi biakin ah nan kal hen anmah tla hen bâwlnâk ap mi nan si ruangah. Thufing nih, ‘Theihnâk neilo mi tla chu anna râwk lai, a ti mi hâwi hen.

¹⁵“Nang, Israel chu ka lakah zumhkâilo hen um menza khawmsele, chu thil lakah Juda tla chu sual rîlmâl lah seh. Gilgal mawh Bethel ah mawh Pathian sawnh hen chunah chun LALPA a nung mi min hen thu tiamh lah u.

¹⁶Israel mi tla chu sanatung hâwi hen an lung a khung. Zeitin ram ningnonâk ah dawrâ hâwi hen ka châwm kho na lai?

¹⁷Israel mi tla chu milem thu thu hen an um mi. Anmah duhzia hen umtir na ko u.

¹⁸Uain cherkhet an din rawh chun, anna zuarnâk lakah anna lâwm le, zahkâinâk ngâk hen ningzaknâk an thîm dauh.

¹⁹Thli nih a put mi hâwi hen put ving hen an um lai le, lunglotu bâwlnâk ah anna bâwlnâk ah chun ningzak saih hen an um lai.