Read Bawm Chin HOSEA 6 Bible Online

HOSEA 6 - Bawm Chin bible

HOSEA 6

¹Mi tla nih, “LALPA sinah kan kîr lai, nganfâk hawng kan pêk khawmsele hawng kan damh ngelchel lai, hawng kan liamh khawmsele hawng kan tuam piak lai lo mazei?

²Ni nih mawh ni thum karah hawng kan panhlâutir lai le, a mâika ah kan um lai.

³LALPA theih kanna tum lai. Ni tla a hawng suak mi hâwi hen, tifûr tla nih tual a chîntir mi hâwi hen kan sinah a hawng lai,” an ti.

⁴Sikhawmsele LALPA nih, “Israel leh Juda, zeitin ka nan ti na awt? Nan hawng ka dâwtnâk chu zînglei sûm a vei chawlh mi hâwi asi, damtî zînglei ah a vei mi hâwi asi.

⁵Churuangah asi ka khuavâng tla chu rêpnâk ding thuchah leh siatnâk lâirêl ding hen ka hawng fialnâk chu. Nan lakah ka duh mi chu fiang tak leh lang ker hen ka duh:

⁶Ran hen bâwlnâk silo hen nan dâwtnâk dawnglo ka duh, duahphung thil ap ngâk hen ka mi tla nih nan hawng ka theih ding kan duh na.

⁷“Adam ram ah an lût kâ hen anmah hen thudântuk ka siam mi chu an buar.

⁸Gilead chu misual leh mi thahtu umnâk khuapi asi.

⁹Bâwlpu tla khawm rawkmang tla nih mi an bawh mi hâwi asi. Sekem mun thenhlimh lei mi lampi tiang khawmah mi an thah. Ngelchel hen chubang hâwi sual tla chu an ti.

¹⁰Israel ram ah thil ṭihnungkâi tak ka muh. Ka mi tla nih milem sawnh hen anmah anna nawmh.

¹¹“Juda mi tla, nannih rangah lam chun nan thilti mi ruangah an rêp na ding hen tik ka ruat rawh.