Read Bawm Chin HOSEA 8 Bible Online

HOSEA 8 - Bawm Chin bible

HOSEA 8

¹LALPA nih, “Mêlma chu ka ram ah mupi hâwi hen a hawng a thlûr! Râlringnâk hâu âwntir u! Ka mi tla nih an sinah thudân ka tuk mi an buar le, ka sîntir na mi lakah an hel.

²Hi hâwi hen an um khawmah an Pathian ah an hawng ka lam le, keimah mi tla ah anna ruat,

³sikhawmsele an hawng ka theih lo. Thil ṭha chu duh ṭung ko hen an hawng ka nawng, churuang chun an mêlma tla nih an ṭhâwl na lai.

⁴“Ka mi tla nih lal an thîm le, sikhawmsele mah kawngkâ cho an ruat. Keimah rem tinâk silo hen ruitu tla an thîm. Anmah siat leh râwktu dingah an tangka leh ngûn chu an milem ah an siam.

⁵Samari khuapi mi tla nih ngûn chawchal lem an sawnh mi chu ka hua asi. An lakah thungâi ka thin a run. Milem an sawnh mi hi zeitik riamruam ah me an bâng awt?

⁶Israel lakah mi zungthiam tla milem an siam mi chu pathian asi lêm lo! Samari ah ngûn chawchal lem chu mântir dip asi lai.

⁷Thli an tuh le, ruahpi an ât lai! Phâisen fâng a min lo mi nih chun sang a suah dah lai lo, suah menza khawmsele ramdang mi nih an ei hep lai.

⁸Israel chu zei phun hâwi tal sikhawmsele bêl kuai mang tlâklo mi hâwi asi.

⁹Mâng ah mi sanatung ê-aw ngâilo mi hâwi hen Israel chu amah thu thu hen a um, Asiria chu ṭangpi deih ding leh phundang tla chu hum na ding deih hen a kal ving.

¹⁰Sikhawmsele tuah anmah rêp na ding hen ka pumh na awt, Sâwtlotê ah Siria lal nih a rêp na tikah nganfâk tuar hen an tâl dak lai.

¹¹“Israel mi tla nih an sual veih ding hen mâichâm an siam tam bilik leh an sualnâk mun a tam!

¹²Rêl châwklo rê hen anmah sîntirnâk ka rîn le, ramdang mi leh thil dang hâwi hen an nawng tlak.

¹³Ka sinah bâwlnâk an ap le, bâwlnâk sa chu anmah nih an ei. Sikhawmsele kei LALPA nih ka lawmh na lo, tu chun an sualnâk chu theih hen anmah ka rêp na lai le, Aigupta ram leiah ka kîrtir ving na awt!”

¹⁴“Israel tla nih in tamtak an sak le, sikhawmsele anmah Siamtu chu an philh ving. Juda mi tla nih kulhnei khuapi tla an dirh. Sikhawmsele an in leh an khuapi tla khanghtu mei ka fial mi nih a khangh hep lai,” a ti.