Read Bawm Chin HOSEA 9 Bible Online

HOSEA 9 - Bawm Chin bible

HOSEA 9

¹Israel mi tla, lunglotu hâwi hen na kût ni khua na ulh mi chu bâng rawh, na Pathian chu na pialtâk le, zumhkâilo hen na um. Ram pumpi ah Baal pathian sinah na zuar le, a sinah pêk ding hen fâng tla na ruat ruangah thungâi hen na lawmh!

²Sikhawmsele sâwtlotê ah fâng leh oliv sariak tla a dih lai le, uain khawm a um lai lo.

³Israel mi tla chu LALPA ram ah an um kumza lai lo le, Aigupta ram ah kîr nawlh hen Asiria ram ah khap mi buh an ei lai.

⁴Ramdang ah chun LALPA sinah uain tla an ap kho lai lo rawh le, a sinah bâwlnâk tla an ap kho lai lo rawh. Thih ni ah mi buh hâwi hen an ei mi chu a nâwm lai, an sungvâng rehtirnâk cho asi lai le, LALPA Biakin ah lam chun zeikhawm pêk ding mi zât asi lai lo.

⁵LALPA zahnâk ding hen kût ni a hawng tlung tikah zei an ti lai rawh ne?

⁶Siatnâk ni a hawng tlung tikah mi tla chu anna rekrâwi lai le, Aigupta mi tla nih Memphis khua ah vûi na ding hen an pumh na lai! An tangka siahnâk leh an in tla dirh hen a um rawh mi tla chu belh leh bualingnei tla nih a khuh dep lai.

⁷Rêpnâk ding ni chu a hawng tlung rawh. Mi nih an tawng ding mi an sual man chu an tawng rawh chu chu a tlung tikah Israel nih a theih lai. Hi “Khuavâng hi a â mi asi, hi thu theihtu minung hi a â mi asi,” nan ti. Nannih tla nih chun nan sual a fâk tuktarâi ruangah thungâi nan hawng ka hua.

⁸Israel mi tla theihtirtu dingah Pathian nih khuavâng ah hawng ka fial. Sikhawmsele ka kalnâk mun kipah thang nih va a awh mi hâwi hen tleih ding nan hawng ka tum. Pathian ram ah mi tla chu khuavâng mêlma tla an si.

⁹Gibeah ah an um liau hâwitê hen an thilti lakah rinh an kâi lo. Pathian nih an sualnâk chu theih hen a rêp na lai.

¹⁰LALPA nih, “Israel tla chu ramkaro ah grep a kho mi hâwl ding mi hâwi hen a tîrah chun ka muh na. An thlâk natu chu ka muh tîr chun a tikah theipi a min masachem mi hâwi hen ka muh na. Sikhawmsele Peor tlâng ah an hawng le, Baal an sawnh le, an duh mi pathian tla hâwi hen fihnungkâi hen an hawng um sawm.

¹¹Israel tla rokualnâk chu va hâwi hen a zuang ving le, an lakah tê leh fa ringnâk a um lai lo le, nunau râi leh fa ringtu khawm a um lai lo rawh.

¹²Fa ring menza na khawmsele ka lâk ving lai le, pakhat khawm nung hen ka siah na awt lo. Hi minung tla hi ka kaltâk na tikah chun, thil ṭihnungkâi an lakah a hawng tlung lai,” a ti.

¹³LALPA, an fa tla an râl le, an thah na mi chu ka muh na.

¹⁴Hi bang hâwi mi tla hi zei hâwi ti ding me kan deih lai? An nunau tla chu fa ring lo hen siam na le, tê leh fa sang kho lo ding hen siam na!

¹⁵LALPA nih, “An thilsual ti zawzawng chu Gilgal ah anna dawmh, chu mun thawk hen anmah ka hua na rawh. Thilsual an ti mi ruangah ka ram sungah mi ka suah na awt. An ruitu tla ka lakah an hel le, ka dâwt na awt lo rawh.

¹⁶Israel mi tla chu thil phun a ram châr fêk hen rah suah kho lo mi hâwi an si. Fa rêng an nei lai lo le, nei khawmsele an dâwt tak mi chu ka thah na awt.

¹⁷A thu an ngâilo ruangah, a rian a ṭuan mi Pathian nih a mi tla chu a nawng na lai, phun tla nâwngah vei leh vâk hen an um lai.