Read Bawm Chin JOEL 1 Bible Online

JOEL 1 - Bawm Chin bible

JOEL 1

¹Hi hi Pethuel fapa Joel sinah LALPA thuchah chu asi.

²Nannih tar tla leh Juda ram ah um mi zawzawng tla, nan nâ thlîr hen ngâi u. Hi bang hâwi mi thil hi nanmah san ah leh nan pa san ah a tlung dah tâwn ma?

³Chu thu chu nan fa tla simh ule, annih nih an fa tla an simh singsuan lai le, chu tla nih an thlâk a hawng um ding mi an simh singsuan lai.

⁴Khâubawk tla chu a rual rual hen thlâi lakah an kawp le, khâubawk pakhat nih a relh mi chu khâubawk dang nih a râwk vima.

⁵Nannih zurî tla leh uain rî tla, meng ule, ṭap hen âu u; uain thar suahtu ding grep chu a râwk rawh.

⁶Khâubawk kawrsen rual nih kan ram a râwk. Thungâi thil an ti kho hen rêl châwk khawm an si lo. An kâ tla chu chakeibaknei kâ hâwi hen a hâr.

⁷Kan grep zûn tla an râwk le, kan theipi kûng tla an ṭam ver. A ṭeng tla a hâwng menah kâwng tleng an lîk ver.

⁸Nan zapi tla, nungâk, a pasal ding mi a thi ruangah a lungfâk le, a ṭap mi hâwi hen ṭap u.

⁹Biakin ah ap ding mi fâng mawh uain mawh khawm a um lo rawh. LALPA rangah ap ding an nei lo rawh ruangah bâwlpu tla khawm an lung a fâk.

¹⁰Phâisen khawm a karo hen a um le; fâng tla a râwk hen, grep tla a châr ver ruangah tual khawm a lung a fâk, chun oliv thing tla khawm a châr ver.

¹¹Nannih phâisen tuahtu tla, ngaihsia tak hen um u. Nannih grep dûm zauhtu tla, wheat leh barley tla, thlâi zawzawng a râwk ver ruangah ṭap u.

¹²Grep zûn leh theipi kûng tla a uai ver; thingthei rah tla chu a uai le, a thi. Mi le tla lâwmnâk khawm a um lo rawh.

¹³Nannih bâwlpu, mâichâm rianṭuantu tla, salâpuan a aih ule, ṭap u. Nan Pathian sinah ap ding hen fâng leh uain a um lo rawh.

¹⁴Pumhpi kawh ule, buhngei ding hen thu suah u. Juda mi tla leh an rui natu zawzawng LALPA nan Pathian Biakin ah pumh na ule, a sinah ṭap u.

¹⁵LALPA ni chu a nâi rawh, Zeizawng tikho nih siatnâk a hawng tlungtir ding mi ni chu: Chu ni ah thil a hawng tlung ding mi chu ṭihnung a kâi a!

¹⁶Kan mîm-le-fâng tla zeitin khawm ti kho lo rawh mi chu kan zauh ko. Kan Pathian Biakin ah lâwmnâk zeikhawm a um lo rawh.

¹⁷Tual châr lakah thlâi chî chu a thi rawh. Fâng pumh ding zeikhawm a um lo rawh. Churuangah fângbâwk tla a karo hen a um le, â râwk ver rawh.

¹⁸Ran tla khawm belh ningno a um lo rawh ruangah tuar hen an bû le, dawrâ rual khawm nih an tuar bâk.

¹⁹LALPA, ram ningno tla a châr le mei nih a khangh hep ruangah ka nan auh asi.

²⁰Tiva tla a kang ver rawh ruangah ramsa tla tiang nih a nan auh.