Read Bawm Chin AMOS 1 Bible Online

AMOS 1 - Bawm Chin bible

AMOS 1

¹Hi bang tla hi Tekoa khuapi ah mi dawrâ vêngtu Amos thu tla asi. Lînîn kum nih lânah Uziah, Juda lalchem asi liauah leh Jehoash fapa Jeroboam Israel lal asi liauah Israel leikâng thu ah Amos sinah Pathian nih a muhtir.

²Amos nih, “LALPA nih Zion thawk hen a hâu a suah le, Jerusalem thawk hen a hâu chu khua rît hâwi a suah. Ram ningno chu a châr le, Karmel Tlâng ah belh tla chu a râu ver,” a ti.

³LALPA nih, “Damaska mi tla chu an sual nûnah an sual nawlh vima le, chubang tla ruangah ka rêp na nget awt. Gilead mi tla chu fâk tak hen an nehsawh na.

⁴Churuang chun lal Hazalel nih in a sak mi chu mei hen ka duah lai le, Benhadad in tla chu ka duah phin lai.

⁵Damaska kulh kawt tla chu ka râwk lai le, Aven Kuam ah um mi tla leh Betheden lâirêltu chu ka ṭhial ving awt. Siria mi tla chu Kir ram leiah sal ah put hen an um lai,” a ti.

⁶LALPA nih, “Gaza mi tla chu an sual nûnah an sual nawlh le, churuang chun annih tla chu ka rêp nget na awt. Phun zawzawng an put na le, Edom mi tla sinah sal ah an zuar na.

⁷Churuangah Gaza khua kulh leh a in kulh tla chu ka duah awt.

⁸Asdod khuapi ah lâirêltu leh Askelon lâirêltu tla ka ṭhial na awt. Ekron khuapi chu ka rêp lai le, Philistia thibang tla chu an thi lai,” a ti.

⁹LALPA nih, “Tura mi tla chu an sual nûnah an sual nawlh le, churuang chun ka rêp na nget awt. Phun zawzawng Edom ram ah sal ah an put na le, remnâk thu zûl lo hen thil an ti.

¹⁰Churuangah Tura khua kulh leh an in kulh tla chu mei hen ka duah awt,” a ti.

¹¹LALPA nih, “Edom mi tla chu an sual nûnah an sual nawlh ruangah ka rêp nget na awt. An unau Israel tla an thah na le, an lakah khuaruatnâk an nei lo. An thinthawknâk chu a dawng hen a bâng kho lo.

¹²Churuangah Teman khuapi leh Bozrah in kulh tla chu mei hen ka duah awt,” a ti.

¹³LALPA nih, “Amon mi tla chu an sual nûnah an sual nget ruangah ka rêp nget na awt. An râltuknâk mun tamtak ah Gilead ram nunau râi mi paw an khei piak na.

¹⁴Churuangah Rabah khuapi kulh leh in tla chu mei hen ka duah awt, râltuk ni ah chun râk hâu tla a um lai le, tuknâk chu thlipi hâwi hen a fâk lai.

¹⁵An lal leh a milian tla chu sal ah put hen an um lai,” a ti.