Read Bawm Chin AMOS 2 Bible Online

AMOS 2 - Bawm Chin bible

AMOS 2

¹LALPA nih, “Moab mi tla chu sual nûnah an sual nawlh le, churuangah ka rêp na nget awt. Edom lal ruh chu zahnâk neilo thlo hen vachâm ah kal dep hen an râwk.

²Moab ram ah mei ka thlah lai le, Kerioth kulh chu a kâng hep lai. Moab mi tla chu râltuk hâu, kawrsen tla âu hâu leh tâwtawrâwt hâu ah an thi lai.

³Moab ram lâirêltu leh ram lakah ruitu zawzawng tla chu ka thah na lai,” a ti.

⁴LALPA nih, “Juda mi tla chu an sual nûnah an sual nawlh le, churuang chun ka rêp na nget awt. Ka sîntirnâk an siarlo le, ka thupêk khawm an zûl lo. An thlâktu tla nih an sawnh mi pathian diklo leiah pial hen an um.

⁵Churuangah Juda tlûnah mei ka thlah lai le, Jerusalem kulh chu a kâng lai,” a ti.

⁶LALPA nih, “Israel mi tla chu sual nûnah an sual nawlh le, churuang chun anmah ka rêp nget na awt. Mi zumhkâi tla lei sam kholotu tla chu sal ah an zuar na le, mipâm an pheikawk man rulh kholotu tla khawm sal ah an zuar na.

⁷Mi chaklo leh ṭangpi neilo chu an lamhbêk na le, mipâm tla lampi ah mi chu an tul ving na. Mi nih an pa hen an salnu chu an ihpi le, ka min thenhlimh an nawmh.

⁸Sawnhnâk munkip ah mipâm thawk hen an leiba ruangrûl ah an lâk piak mi puan aih hen an it. An Pathian biakin ah lei anna taih mi sinah uain an lâk mi an din.

⁹“Sikhawmsele, ka mi tla, nanmah ruangah Amor mi tla sidar thing hâwi a sâng mi leh oak thing hâwi an khauh mi chu ka veih dep na.

¹⁰Aigupta ram a mi chu kan suakpi na le, ramkaro mun ah kum sâwmli kar vial ka rui na le, Amor ram chu nanmah tâ si ding hen kan pêk na.

¹¹Nan fapa zeimaw mi chu khuavâng rangah ka thîm na le, nan tlangvâl zeimaw mi tla chu Nazirit ah ka siam na. Israel mi tla, kei, LALPA nih ka sim mi hi a diklo ma?

¹²Nazirit mi tla chu uain nan dinh na le, khuavâng tla chu ka thuchah an sim ding mi nan khap.

¹³Tuah tual ah ka nan mân dip na lai le, kari nih fâng rit tak a phurh mi hâwi hen nan rûm lai.

¹⁴Mi tek chak men a âwl lai lo le, michak tla khawm nih chaknâk an nei lai lo, kawrsen tla khawm nih anmah nungnâk khawm an hum kho lai lo.

¹⁵Chanhtiang kahtu tla khawm an dîr kho lai lo le, mi tek chak tla khawm an suak kho lai lo, rang tlûnah totu tla khawm an âwl lai lo.

¹⁶Chu ni ah chun kawrsen râlṭha chem men an râlthuam an mâk thlap lai le, an tek lai,” LALPA nih a sim mi asi.