Read Bawm Chin AMOS 4 Bible Online

AMOS 4 - Bawm Chin bible

AMOS 4

¹Nannih Samaria ram mi nunau, Basan chawpinu bit tal a châwm mi hâwi tla, mi chaklo leh mipâm tla nehsawhtu, din phung hen nan pasal le nih an châwm na ding hen hauhtu tla, ngâi u!

²LALPA Zahkâi thenhlimh nih thu a tiamh le, “Siau hen an nûk na ding ni chu a hawng tlung awt; mikip siau nih nga a awh mi hâwi asi lai.

³Vâm a pem mi lakah an nûk na lai le, lênglei ah an lawnh ving na lai,” a ti.

⁴LALPA Zahkâi nih, “Israel mi tla, ti ding na tum chun mun thenhlimh Bethel ah va kal le, thilsual va ti rawh. Gilgal ah na ti kho rirî hen thilsual va ti. Zîng siar hen a masachem ah bâwlnâk dingah ran tla put hen kal le, a ni thum ni kipah parâ lû ah pakhat na put mi pêk.

⁵Mâilei ah kal le, Pathian sinah lâwmthu sim hen na sang tla ap le, na ap mi a leifuan chu zumh phahnâk ah mang rawh! Chu tak chu na thil duhkâng asi.

⁶“Nan khuapi zawzawng ah pâmnâk tlungtirtu chu keimah ka si le, chu khawmah ka sinah nan hawng kîr lo.

⁷Nan thlâi chîng tla nih ruah tî an herh thlo liauah ruah sûr ding ka khap. Khuapi pakhat ah ka sûrtir khawmsele khuapi dangah chun ka sûrtir lo. Phâisen pakhat ah ruah ka sûrtir le, sikhawmsele phâisen dang tla chu sûrlo hen a hul hiam.

⁸Tîhâl ruangah dî hen, khuapi ah um mi tla zeimaw mi chu khuapi dangah tî tawng ding lungum hen an kal le, sikhawmsele duh tâwk din ding a um lo. Chu khawmah ka sinah nan hawng kîr lo nget rih.

⁹“Nan thlâi ka chârtir ding hen thli lum ka hawng lêngtir. Khâubawk tla nih nan dûm ah mi grep dûm tla, oliv leh theipi tla an ei hep.Chu khawmah ka sinah nan hawng kîr lo nget rih.

¹⁰“Aigupta ram ah a tlung mi hâwitê hen nan lakah râi ka hawng tlungtir. Nan tlangvâl tla râltuknâk ah ka thah na le, nan rang tla kan lâk piak ver na. Nan um mun ah ruak thû rim hen nan nârkua tla ka khattir. Chu khawmah ka sinah nan hawng kîr lo nget rih.

¹¹“Nan lakah mi zeimaw mi chu Sodom leh Gomorah mi hâwitê hen ka veih na. Nan lakah a thibang tla chu ṭhianṭhunh mei nih a khangh mi lakah thuak mi hâwi nan si. Chu khawmah ka sinah nan hawng kîr lo nget rih,” LALPA nih a ti.

¹²Churuangah, LALPA nih, “Israel mi tla, ka nan rêp na awt, hi hâwi thil ka ti awt ruang chun ka lâirêlnâk chu tuar ding hen a tîm rawh!” a ti.

¹³Pathian chu tlâng tla leh thli siamtu asi. A thinlung tum chu minung rang a theihtir le, sûn chu zân ah a changtir. Tual mun sâng tlûnah a kâi. Hi hi a min chu: LALPA Pathian Zeizawng tikho chu asi!