Read Bawm Chin AMOS 9 Bible Online

AMOS 9 - Bawm Chin bible

AMOS 9

¹Mâichâm kiangah LALPA a dîr mi ka muh, thu a pêk le; “Biakin tung tlûnlei vuak le, a sârbûk zawzawng â nîn hep lai. Râwk dep le, mi zapi lû tlûnah thlâk, a thibang chu râltuknâk ah ka thah na lai. Pakhat khawm an suak lai lo.

²Laikulh thihnâk leiah an lampi chawh na khawmsele ka tleih na nget awt. Vân ah kâi na menza khawmsele ka thlâk ving na awt.

³Karmel Tlâng tlûnah a thup na khawmsele ka hâwl na lai le, ka tleih na lai. Tipi sungah an hawng ka thuptâk ving khawmsele tî lakah thilnung lian thu ka pêk lai le, a seh na lai.

⁴An mêlma nih sal ah put na khawmsele thah na ding hen thu ka pêk na awt, anmah ṭangpi na ding ka tum lo le, veih na ding ka tum asi,” a ti.

⁵LALPA Zahkâi Zeizawng tikho nih tual a tawngh le, â nîn le, a sungah um mi zawzawng chu an lawksawng. Nile Tiva tî hâwi hen laikulh pumpi chu a thawk le a tlû.

⁶LALPA nih vân ah in a sak le, tual tlûnah vândum a siah. Tisumsumriat tî a kawh le, tual tlûnah a thlêt. A min chu LALPA asi!

⁷LALPA nih, “Israel mi tla, Sudan mi tla chu nanmah hâwi ber hen ka thinlung ah ka ruat na. Aigupta ah mi ka nan kalpi na hâwi hen Philistia tla chu Kret thawk hen ka kalpi na le, Siria mi tla khawm Kir thawk hen ka kalpi na.

⁸Kei, LALPA Zahkâi nih Israel ram sual tak hi ka vêng le, hi tual tlûnah mi ka veih dep awt, sikhawmsele Jakob thlâk an ektê lam chu ka veih na awt lo.

⁹“Israel minung tla chu thu ka pêk lai le, ṭawlâwn ah fâng an khei mi hâwi hen anna nîn lai. Mi rualo tla zawzawng chu phun tla nâwngah ka ninh na lai le, ka lawnh ving na awt.

¹⁰Ka mi lakah misual tla, ‘Pathian nih kan lakah nganfâk a tlungtir lai lo’ titu zawzawng chu râltuknâk ah thah hen an um lai,” a ti.

¹¹LALPA nih, “David lalram, in a tlû le, â râwk mi hâwi chu dirhnawlhnâk ding ni chu a hawng tlung awt rawh. A kulh vâm tla chu ka remh nawlh lai le, a lânah mi hâwitê hen ka dirh nawlh lai. A lânah mi hâwitê hen ka sak hen ka siam nawlh lai.

¹²Israel mi tla nih Edom ram leifuan leh a lânah mi phun ka tâ si rawh mi tla chu an neh na lai,” hi hâwi hen hawng tlung tirtu LALPA nih a sim.

¹³“LALPA nih, Fâng tla zûn châwklo rê hen ṭhang ding leh grep khawm uain ah siam châwklo rê hen a ningno lai. Tlâng sâng tla chu uain thlum hen a zut lai le, tlângtê tla khawm uain hâng hen a luang ding ni chu a hawng tlung awt rawh.

¹⁴Ka mi tla chu an ram ah ka kîrpi nawlh na lai. An khuapi â râwk rawh mi tla chu an sak lai le, chunah chun an um lai; grep dûm tla an siam lai le, a hâng tla an din lai le; dûm tla an tuah lai le, chunah an chîng mi tla chu an ei lai.

¹⁵Ram ka pêk mi lakah ka mi tla chu ka umtir na lai le, an siat nawlh lai lo rawh,” a ti. LALPA na Pathian nih a sim mi asi.