Read Bawm Chin OBADIAH 1 Bible Online

OBADIAH 1 - Bawm Chin bible

OBADIAH 1

¹Hi hi Obadiah thusim chu asi: LALPA Zahkâi nih Edom phun tla thu a sim mi asi. LALPA nih phun tla sinah thu a chah mi chu kan theih: “Edom tla do ding hen, kan kal lai a tîm u!”

²LALPA nih Edom sinah, “Chaklo tak hen ka nan siam lai le, mikip nih an zauhnawmh lai.

³Na zûmnâk nih an âttir rawh. Na khuapi lian tla chu lungpi hen kulh asi le, na in chu tlâng sâng hâwi a sâng le, churuangah na thinlung ah, Âu nih hawng ka niamtir kho lai?’ na ti.

⁴Na in chu mupi bû hâwi a sâng hen siam hen ârfi nâwngah lang hen um menza khawmsele, ka nan thlâk ving awt.

⁵Zân ah mifîr kal mi tla khawm nih an duh mi cho an lâk. Mi nih grep an kawih khawmah tâwm chu an mâk. Sikhawmsele na mêlma tla nih chun an lâwm phin lai.

⁶Esau thlâk tla, na thil-le-rî siahnâk chu rawk asi rawh.

⁷An ṭangpitu tla nih an perpet asi; na ram sungah mi an nar ving rawh. Nangmah hen rem tak hen nan um mi tla nih tu chun an neh rawh. Munkhat hen tî-le-râwl an ei mi nih na rangah thang an tunh. ‘Finghnâk a nei mi zeiah a um rawh,’ a nan ti.

⁸Edom ka rêp ni ah chun an mi fing tla chu ka veih lai le, an finghnâk zawzawng ka veih dep lai.

⁹Teman a mi râltuktu tla chu lauh an si lai. Edom ram ah kawrsen zawzawng thah an si lai.

¹⁰“Na unau Jakob thlâk tla na râwk hen na thah na ruangah na vei lai le, zahkâi lo hen na um pawt lai rawh.

¹¹An kulh kawtkâ mêlma nih an râwk piak ni ah chun an kiangah na dîr lai. Jerusalem neihnâk zawzawng kalpi hen anna ṭhentu ramdang mi tla hen nang khawm nan sual dân â bang cho lai.

¹²Na unau Juda tla vânduainâk lakah na diriam ding asi lo. An siat ni ah na lâwm ding asi lo, an tuar liauah na nihsanh na ding asi lo.

¹³An siat ni ah an neih va lâk ding hen leh ka mi le an tuarnâk lakah va diriamh ding hen khuapi sungah na va lût ding asi lo.

¹⁴An suak ding mi tla tleih na ding hen lamṭhuam ah dîr lah. An lawksawng ni ah mêlma kut ah na pêk na ding asi lo.

¹⁵“Kei, LALPA nih phun zawzawng lâi ka rêl ding ni chu a nâi rawh. Edom, na thilti hâwi hen na tlûnah ti hen a um lai. Na pêk na hâwitê hen na tawng lai.

¹⁶Ka tlâng thenhlimh ah ka mi tla nih rêpnâk hâi khâ tîk mi an din. Sikhawmsele a kiangkam ah phun tla nih rêpnâk hâi khâ dauh mi an din nget rih le, an din hep lai le, an vei hep lai.

¹⁷“Zion ah chun mi zeimaw mi an him lai le, tlâng thenhlimh asi lai. Ting dân asi hâwi hen Jakob mi tla nih anna ting lai.

¹⁸Jakob leh Josef mi tla chu mei hâwi an si lai le, Esau mi tla chu fâng kûngmui mei nih a khangh mi hâwi hen an vei lai. Esau thlâk tla chu pakhat khawm an âwl lai lo. Kei, LALPA nih ka sim mi asi.

¹⁹“Simlei mi Juda tla nih Edom ram an luah lai. Thlanglei kângah tlâng bul ah um mi tla nih Philistia ram an lâk lai. Israel tla nih Efraim leh Samaria ram anna ting lai. Benjamin mi tla nih Gilead ram an lâk lai.

²⁰“Israel marlei kângah thawk hen sal tâng kawrsen tla chu an hawng kîr lai le, Phoinikia chu marlei kângah Zarephath tiang an neh lai. Jerusalem a mi sal ah put mi Sardis ah um mi tla chu Juda simlei khuapi an lâk lai.

²¹Jerusalem ah mi nehtu tla nih Edom ram an do lai le, an tlûnah lâi a rêl lai. LALPA amah tak chu Lal asi lai.”