Read Bawm Chin JONA 3 Bible Online

JONA 3 - Bawm Chin bible

JONA 3

¹LALPA nih Jona sinah thu a sim nawlh fâwn le,

²“Khuapi rokual tak Ninevi khua ah thu ka nan chah mi hi va sim rawh,” a ti.

³Churawhchun Jona nih LALPA thu chu a âwi le, Ninevi khuapi a kauh lei ni thum kal tling rê mi khuapi ah chun a va kal rawh.

⁴Jona chu chu khuapi chu a lût a dawmhnâk thawk hen ni khat kal a tling rawh chun thu a sim le, “Ni sâwmli karah Ninevi khua chu a râwk lai!” a ti.

⁵Ninevi khua mi tla nih Pathian thuchah chu an lung rawh. Churawhchun mikip nih buh ngei ding hen thu an thlûk le, mi zawzawng a lianchem thawk hen a mêchem tiang nih an rim ti theihnâk ding hen salâpuan anna aih.

⁶Ninevi khua lal khawm nih chu thu chu a theih rawh chun, a laltophah a mi chu a thawk le, a nipuan a lit le, salâpuan â aih le, vachâm lakah a to.

⁷Ninevi khuapi sungah mi tla sinah thu phuang ding hen a fial na. “Hi hi lal leh a rianṭuantu tla thupêk chu asi, âukhawm nih zeikhawm ei ding asi lo; minung zawzawng, ran tla, dawrâ tla khawm ei leh din khap asi.

⁸Minung leh ran zawzawng khawm nih salâpuan aih hep ding asi. Mikip nih thinlung tak hen thlacham chiau hen thilsual ti duhnâk leh thilsual ti mi tla lêt hep ding asi.

⁹Pathian nih a thinlung a lêt hen a thinthawknâk a bâng hen kan nung kho kekkawk lai mawh!” a ti.

¹⁰Pathian nih an thilti dân leh thilsual ti duhnâk an lêt mi chu a muh na rawh. Churawhchun a thinlung a lêt le, rêp ding a tum na mi chu a lêt rawh.