Read Bawm Chin JONA 4 Bible Online

JONA 4 - Bawm Chin bible

JONA 4

¹Chu thu lakah chun Jona chu â lâwm lo thlo le, a ro a thawk rawh.

²Churawhchun thla a cham le, “LALPA, in thawk hen ka suak lânah chu hâwi hen na ti lai kan ti mi hâwi kha asi taktê lo ma? Hi ruangah asi Spain ram ah tek ding ka tum mi kha. Nang chu mi dâwttu leh khuaruattu Pathian na si ti ka theih, na dawnh kho kumza, vêl na nei kumza, rêplo hen thinlung lêt tum kumza mi na si ti ka theih.

³Tuah, LALPA, hawng ka thihtir, nung ngâk hen thih a ṭha dauh,” a ti.

⁴LALPA nih a sâng le, “Nang rangah thinthawk ding zei a um?” a ti.

⁵Jona chu khuapi saklei ah a kal le, a to rawh. Chunah chun a rangah um mun a khuar le, a dâidul ah a to. Ninevi khua lakah thil a hawng tlung ding mi chu zauh ding hen a ngâk ko.

⁶Churawhchun LALPA Pathian nih Jona rangah dâidul pêk ding hen thil a khotir le, Jona tlûnah a zâmtir, a rangah nuam dauh ding hen chu thil a hawng kho mi ruangah Jona thungâi â lâwm.

⁷Sikhawmsele a thâituan ah Pathian thupêk hen tholung nih zûnzâm chu a râwk le, a thi ving.

⁸Nî a hawng suak rawh chun, saklei thli lum a lêngtir le, chu nî sa nih Jona lû a sat le, a uai thlo. Churawhchun thih a duh rawh, “Kei rangah nung ngâk hen thih a ṭha dauh,” a ti.

⁹Sikhawmsele Pathian nih a sinah, “Hi thil a hawng kho mi thu ah nang zei thinthawk ding a um?” a ti. Jona nih a sâng le, “Thinthawk lo chun ne? Thih tiang a thawk awt!” a ti.

¹⁰LALPA nih a sinah, “Hi thil hi zân khat ko ah a kho le, a thâituan ah a vei ding mi asi, hi rangah zeikhawm na ti mi a um lo, na khotir mi khawm asi lo, sikhawmsele amah ruangah na lung a fâk, chu hâwi asi chun,

¹¹Ninevi khuapi rokual tak chu chu ngâk hen ka lungkham awt tuktarâi, chulo khawmah ngâksia sual lo mi nuaikhat leh sîng nih leh ran tam tak hen!” a ti.